Yɛmkpo menli mɔɔ bɛzɔne bɛ kɛ Gyihova Alasevolɛ na bɛgyakyi edwɛkpa ne nolobɔlɛ, bie a bɛ nee yɛ ɛnzonle bieko la. Nɔhalɛ nu, yɛtwe yɛbikye bɛ na yɛbɔ mɔdenle kɛ yɛbaboa bɛ yɛamaa bɛazonle bieko.

Saa awie yɛ ɛtane kpole a ɔngile kɛ yɛbadu ye. Noko saa awie fa yɛ ye subane kɛ ɔbahɔ zo yeabulu Nyamenle mɛla zo na ɔnnu ɔ nwo a, yemɔ yɛ nee ye ɛndu anzɛɛ yɛtu ye. Baebolo ka ye wienyi kɛ: “Bɛye amumuyɛ sonla ɛhye bɛvi bɛ avinli.”—1 Kɔlentema 5:13.

Na saa bɛtu awie na ɔ ye nee ɔ mra tɛde Gyihova Alasevolɛ ɛ? Ɛzonlenlɛ nu agɔnwolɛvalɛ mɔɔ bɛlɛ la bahakyi noko bɛtɛde ye mbusuafoɔ. Agyalɛ ne nee ɛlɔlɛ mɔɔ bɛda ye ali wɔ abusua ne anu la abo ɛmpɛ.

Menli mɔɔ bɛdu bɛ la kola ba debiezukoalɛ. Saa bɛkulo a asafo ne anu mgbanyima bɛadu bɛ fofolɛ. Bodane ne a le kɛ bɛboa ahenle bɛamaa yeazia yearayɛ Gyihova Dasevolɛ. Bɛdie menli mɔɔ bɛdu bɛ na bɛkpo ɛbɛlatane ɛbɔlɛ, bɛfi ahonle nu bɛbɔ ɛbɛla mɔɔ nee Baebolo ngyinlazo yia la bɛba asafo ne anu bieko.