Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Kɛzi Gyihova Alasevolɛ Bu Ɛzɛneyɛlɛ Ɛ?

Kɛzi Gyihova Alasevolɛ Bu Ɛzɛneyɛlɛ Ɛ?

Nyɛleɛ mɔɔ yɛda ye ali nee adwenle mɔɔ yɛlɛ ye wɔ ɛzɛneyɛlɛ nwo la gyi Baebolo ngilehilelɛ mɔɔ bie mɔ a doa zo la azo:

  • Nvonleɛ biala ɛnle nwo kɛ ɛbali nyane wɔ dɔvolɛ bie ewule nwo. Gyisɛse ɛdoavolɛma ne lile bɛ alɔvolɛ mɔɔ wule la anwo nyane. (Dwɔn 11:33-35, 38; Gyima ne 8:2; 9:39) Yemɔti, yɛmbu ɛzɛneyɛlɛ kɛ ɔle anyelielɛ mekɛ. (Nolobɔvo ne 3:1, 4; 7:1-4) Emomu, yɛnwu ye kɛ ɔle mekɛ mɔɔ yɛ nee menli mɔɔ ɛlɛdi nyane la di nyane a.​—Wulomuma 12:15.

  • Mowuamra ɛnze ɛhwee. Ɔnva ɔnwo ɛleka mɔɔ yɛvi anzɛɛ yɛ amaamuo ne, yɛmmaa diedi mɔɔ ɛngyi Baebolo ne azo mɔɔ kile kɛ mowuamra de aze la ɛnnyia yɛ ɛbɛlabɔlɛ ne azo tumi. (Nolobɔvo ne 9:5, 6, 10) Amaamuo ɛhye mɔ bie mɔ a le epezilɛ, ɛzɛneyɛlɛ mgbole nee pelasilililɛ, afɔle mɔɔ bɛbɔ bɛmaa mowuamra, mowuamra mɔɔ bɛ nee bɛ tendɛ nee kunlane ɛhyilɛ. Yɛdi Baebolo folɛdulɛ ne mɔɔ se: “Bɛhwe bɛ nwo bɛvi bɛ nwo. Bɛmmafa bɛ sa bɛka debie mɔɔ anwo ɛnde la” azo.​—2 Kɔlentema 6:17.

  • Anyelazo wɔ ɛkɛ ne maa mowuamra. Baebolo ne kilehile kɛ, mekɛ bie bara mɔɔ menli mɔɔ ɛwu la badwazo na ewule ɛnrɛdɛnla ɛkɛ ne bieko. (Gyima ne 24:15; Yekile 21:4) Anyelazo ɛhye ɛmmaa yɛnli nyane somaa, kɛ mɔɔ ɔboale alimoa Kilisienema ne la.​—1 Tɛsalonaekama 4:13.

  • Baebolo tu yɛ folɛ kɛ yɛbɛlɛ yɛ nwo aze. (Mrɛlɛbulɛ 11:2) Yɛdie yɛdi kɛ ɛzɛneyɛlɛ ɛnle mekɛ mɔɔ ‘yɛfa ɛbɛlabɔlɛ nu’ ninyɛne yɛadu yɛ nwo a. (1 Dwɔn 2:16) Yɛnyɛ ɛzɛne mgbole yɛnva yɛnlielie yɛ nye anzɛɛ yɛndɔ funli ɛlɛka nee tɛladeɛ mɔɔ ye bolɛ yɛ se la kɛ yɛfa yɛalie duma.

  • Yɛnva diedi mɔɔ yɛlɛ ye wɔ ɛzɛneyɛlɛ nwo la yɛtinlitinli awie mɔ. Wɔ ɛhye anwo, yɛdi ngyinlazo ɛhye azo: “Yɛ nuhua ko biala babu ye mgbonda ahile Nyamenle.” (Wulomuma 14:12) Noko, saa yɛnyia nwolɛ adenle kɛ yɛkilehile yɛ diedi ne anu yɛahile awie mɔ a, yɛbɔ mɔdenle kɛ yɛbayɛ ye wɔ “bɛtɛɛyɛlɛ” nee ɛbulɛ kpole nu.​—1 Pita 3:​16.

Kɛzi bɛyɛ Dasevolɛ mɔɔ kɛwu la ɛzɛne ɛ?

Ɛleka: Saa abusua bie kulo kɛ bɛyɛ awie ɛzɛne a, bie a bɛbayɛ ye wɔ ɛleka biala mɔɔ bɛkulo la le kɛ, Belemgbunlililɛ Asalo, ɛleka mɔɔ bɛyɛ ɛzɛne, awie sua nu anzɛɛ azie zo.

Ɛzonlenlɛ: Bɛmaa ɛdendɛlɛ bɛfa bɛkyekye menli mɔɔ bɛ awie ɛwu la arɛle na bɛkilehile mɔɔ Baebolo ne ka ye wɔ ewule nee ewudwazo ne anwo la anu. (Dwɔn 11:25; Wulomuma 5:12; 2 Pita 3:13) Ɛzɛne ɛdendɛlɛ ne baha subane kpalɛ mɔɔ ahenle mɔɔ ɛwu la lɛ, bie a ɔbaha debie kpalɛ mɔɔ yɛbahola yɛazukoa ye wɔ ye ɛkɛ la.​—2 Samoɛle 1:17-27.

Bɛbado edwɛne mɔɔ gyi Ngɛlɛlera ne azo la. (Kɔlɔsaema 3:16) Bɛfa asɔneyɛlɛ mɔɔ kyekye bɛ rɛle la bɛwie ɛzonlenlɛ ne.​—Felepaema 4:6, 7.

Ezukoa ɛdualɛ: Yɛnlie ezukoa wɔ abusua ne mɔɔ bɛ awie ɛwu la ɛkɛ yɛɛ yɛnlielie ezukoa wɔ ɛzonlenlɛ nu ngyehyɛleɛ anzɛɛ yɛ debiezukoalɛ ne mɔ abo.​—Mateyu 10:8.

Menli mɔɔ kola kɔ bie: Menli mɔɔ ɛnle Alasevolɛ la bahola ara ɛzɛne ne bie wɔ yɛ Belemgbunlililɛ Asalo. Bɛyɛ ye kɛ mɔɔ yɛyɛ yɛ debiezukoalɛ ne mɔ la, awie biala kola ba bie.

Asoo Alasevolɛ kɔ asɔne gyɛne ɛzɛne ɔ?

Dasevolɛ biala gyinla ye adwenle ne mɔɔ yeva Baebolo ne yetete ye la azo si kpɔkɛ. (1 Temɔte 1:19) Noko akee, yɛnva yɛ nwo yɛnwula ɛzonlenlɛ nu nyɛleɛ biala mɔɔ Baebolo ne tendɛ tia la anu.​—2 Kɔlentema 6:14-17.