Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Duzu Ati A Gyihova Alasevolɛ Ɛnye Ɛzonle Mɔɔ Bɛto Bɛ La Amuala Anloa A?

Duzu Ati A Gyihova Alasevolɛ Ɛnye Ɛzonle Mɔɔ Bɛto Bɛ La Amuala Anloa A?

Gyihova Alasevolɛ di Baebolo folɛdulɛ mɔɔ se, ɔnle kɛ bɛye ɛzonle nee agolobɛnwo edwɛkɛ bie mɔ anloa la azo. Kɛ neazo la, Baebolo nu ɛrɛlɛ bie ka kɛ: “Sonla mɔɔ twi sonlamgbane nyunlu la die aholoba.” (Mrɛlɛbulɛ 9:7, 8; 26:4) Kɛ anrɛɛ yɛbava yɛ adwenle yɛazie adalɛ edwɛkɛ zo na yeamaa yɛali butule la, yɛfa yɛ adwenle yɛsie Nyamenle ɛhulolɛdeɛ ɛyɛlɛ zo.​—Edwɛndolɛ 119:69.

Nɔhalɛ nu, yɛlɛ “mekɛ mɔɔ bɛyɛ koonwu, yɛɛ mekɛ mɔɔ bɛtendɛ.” (Nolobɔvo ne 3:7) Yɛfa mualɛ yɛmaa anyelielɛma mɔɔ bɛkpondɛ kɛ bɛnwu nɔhalɛ ne la noko yɛ nee bɛ ɛnzu kpolera. Ɛhye maa yɛdi Gyisɛse nee alimoa Kilisienema ngilehilelɛ nee bɛ neazo nzi.

  • Mekɛ mɔɔ bɛdole Gyisɛse ɛzonle wɔ Paelɛte anyunlu la yeanye ɔ nloa. (Mateyu 27:11-14; 1 Pita 2:21-23) Eza Gyisɛse anye ɛzonle mɔɔ bɛdole ye kɛ ɔle nzanli nee adidikpoku la anloa. Emomu, ɔmaanle ye nyɛleɛ dendɛle maanle ye kɛ mɔɔ ngyinlazo ɛhye ka la: “Nrɛlɛbɛ dua mɔɔ vi ye gyimayɛlɛ nu ba la azo di benle.” (Mateyu 11:19) Noko saa tɛnlabelɛ ne maa nwolɛ adenle a, ɔfa akɛnrasesebɛ ɔbua menli mɔɔ sɛkye ye duma la.​—Mateyu 15:1-3; Maake 3:22-30.

    Gyisɛse hilehilele ye ɛdoavolɛma kɛ bɛmmamaa adalɛ edwɛkɛ maa bɛ sa nu to. Ɔhanle kɛ: “Anyelielɛ ɛha bɛ kɛ medame ti menli bɔ bɛ aholoba na bɛyɛ bɛ kpɔdekpɔde na bɛbɔ adalɛ bɛfa edwɛkɛ bɛto bɛ nwo zo la.” (Mateyu 5:11, 12) Noko Gyisɛse eza hanle kɛ saa nwolɛ adenle ne ba kɛ ye ɛdoavolɛ ne mɔ bali daselɛ a, ɔbali ye ɛwɔkɛ zo: “Mebamaa bɛ nrɛlɛbɛ meamaa bɛanwu mɔɔ bɛbaha mɔɔ bɛ kpɔvolɛma ɛnrɛhola ɛnrɛha nwolɛ ɛhwee a.”​—Luku 21:12-15.

  • Ɛzoanvolɛ Pɔɔlo dule Kilisienema folɛ kɛ bɛkpo kpolerazulɛ mɔɔ nrɛlɛbɛ ɛnle nu mɔɔ bɛ nee dwazotiama su la, ɔhilehilele kpolerazulɛ ɛhye anu kɛ “nvasoɛ ɛnle zo yɛɛ ɔle debie mgbane.”​—Taetɛse 3:9; Wulomuma 16:17, 18.

  • Ɛzoanvolɛ Pita maanle Kilisienema anwosesebɛ kɛ bɛgyinla bɛ diedi ne anzi. (1 Pita 3:15) Noko ɔhanle kɛ yɛbahola yɛalua yɛ nyɛleɛ zo yɛayɛ ɛhye wɔ adenle kpalɛ zo yɛadɛla yɛ edwɛkɛhanlɛ zo. Ɔhɛlɛle kɛ: “Saa bɛyɛ kpalɛ a, bɛbamaa bɛdabɛ mɔɔ bɛnlɛ adwenle na bɛtendɛ mgbane mgbane la aha bɛ nloa ado nu.”​—1 Pita 2:12-15.