Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

BAEBOLO NE KAKYI SONLA

“Mende Nganeɛ Kɛ Me Nwo Yɛ Nyiane Bieko”

“Mende Nganeɛ Kɛ Me Nwo Yɛ Nyiane Bieko”
  • Bɛwole Ye: 1963

  • Maanle Mɔɔ Ɔvi Nu: Mexico

  • Alimoa Ne: Ɛnee mebɔ ɛko yɛɛ mete nganeɛ kɛ nvasoɛ ɛnle me nwo zo

ME ƐBƐLA DƐBA

Bɛwole me wɔ Ciudad Obregón mɔɔ wɔ northern Mexico la, ɛnee yɛle mediema ngɔnla, medame a metɔ zo nnu a. Ɛnee yɛde sua ne kandiba, ɛleka mɔɔ me papa sie nyɛmoa na yezo ye ɛya ekyi bie la. Ɔle ɛleka kɛnlɛma kpalɛ, yɛɛ anzodwolɛ nee anyelielɛ wɔ yɛ abusua ne anu. Alɔbɔlɛ edwɛkɛ a le kɛ, mɔɔ menyianle ɛvolɛ nnu la, ahumuakyima bie zɛkyele yɛ ninyɛne na ɛnee ɔwɔ kɛ yɛtu yɛkɔtɛnla sua fofolɛ zo.

Me Papa bɔle ɔ bo nyianle ezukoa ekyi. Noko akee, ɔ nye raliele nza nwo. Ɛhye hanle ye agyalɛ ne nee yɛdayɛ ngakula ne mɔ. Me nee me mediema mgbanyima nwiɔ bɔle ɔ bo wuale me papa sigalɛte veale nlonle. Mekɛ mɔɔ limoa mɔɔ membole la ɛnee meli ɛvolɛ nsia pɛ. Yeangyɛ me awovolɛ gyakyile agyalɛ na akee menyɛle ninyɛndane dɔɔnwo.

Me mame dule doale nrenyia fofolɛ na ɔvale yɛ ɔhɔle. Ɛnee nrenyia ne ɛmmaa ye ezukoa yɛɛ ɛnee ezukoa ekyi mɔɔ ɔnyia ye la ɛnza yɛ nea. Yemɔti me nee me mediema ne mɔ yɛle gyima biala mɔɔ yɛ sa kɛzɔ nu la, noko ɛnee ezukoa mɔɔ yɛnyia ye la ɛnza ninyɛne mɔɔ yɛhyia nwo la totɔ. Ɛnee mebɔ mgbɔlaboa nu, metɔne paano, adwelie ngɛlata, chewing gum nee mɔɔ bokɛboka nwo la. Eza ɛnee mekpɔsa mekpondɛ aleɛ wɔ sukoavolɛma ewula nu.

Menyianle ɛvolɛ bulu la, nrenyia bie zele me kɛ memaa yɛhɔyɛ gyima wɔ sua ne azo bɔla ne azo. Menliele mendole nu, mengyakyile sukulu na menvile sua nu. Ɛnee ezukoa mɔɔ ɔfa ɔmaa me kenle ko la ɛndwu dɔla ko yɛɛ ɔmaa me aleɛ mɔɔ yɛnyia ye wɔ bɔla ne azo la bie. Ɛnee mede sua ekyi bie mɔɔ menvale bɔla zo ninyɛne menyɛle la anu. Menli mɔɔ ɛnee wɔ ɛleka mɔɔ mede la ɛdendɛlɛ ɛnle kpalɛ yɛɛ ɛnee bɛ ɛbɛlabɔlɛ ɛzɛkye bɔkɔɔ. Ɛnee nyiletane yɛɛ nza ɛgya bɛ nuhua dɔɔnwo. Ɛhye le mekɛ mɔɔ me rɛle bɔle kpalɛ wɔ me ɛbɛlabɔlɛ nu a, ɛnee mesu nɔsolɛ biala yɛɛ ɛnee mesulo. Ɔluakɛ ɛnee mele ehyianli yɛɛ meangɔ sukulu meandwu moa la ati, ɛnee ɔyɛ me nyiane. Mendɛnlanle bɔla zo ɛvolɛ kɛyɛ nsa kolaa na meadu meahɔ sua fofolɛ zo wɔ Mexico. Wɔ ɛkɛ ne menyɛle gyima wɔ awie mɔ ɛya nu. Ɛnee yɛyɛ felawɔse, asawa, akɛnla yɛɛ nrɛlɛbɛta nwo gyima.

Mendɛnlanle ɛleka mɔɔ bɛto ɛwula bɛgua le kɛ ɛke ɛvolɛ nsa

Ɛvolɛ nna anzi menziale mengɔle Ciudad Obregón. Me papa adiema raalɛ kpanyinli mɔɔ ɛnee ɔle kɔmenle la maanle me sua ekpumgbunli ko wɔ ye aako nu. Membɔle ɔ bo kɛ meka ɛlalɛ mgbane mgbane yɛɛ me adwenle gyegyele me dedee mɔɔ anrɛɛ meku me nwo a. Kenle ko nɔsolɛ menzɛlɛle Nyamenle kɛ: “Awulae, saa ɛwɔ ɛkɛ a maa menwu wɔ, na mebava me ngoane mekɛ kɔsɔɔti meazonle wɔ. Saa nɔhalɛ ɛzonlenlɛ bie wɔ ɛkɛ a, mekulo kɛ menwu ye.”

KƐZI BAEBOLO NE HAKYILE ME LA

Ɛnee mekulo Nyamenle ɛzonlenlɛ. Mele kakula bɔbɔ la, mengɔle asɔne ngakyile mɔɔ asolo biala ngilehilelɛ la anu, noko bɛ nuhua ko bɔbɔ amboa me. Biala ɛnle ɛkɛ mɔɔ ɔhanle Baebolo ne anu edwɛkɛ dɔɔnwo anzɛɛ ɔlile me sunsum nu ngyianlɛ nwo gyima a. Ɛnee bɛ nuhua dɔɔnwo kulo ezukoa somaa yɛɛ ɛnee asɔnema ne bie mɔ ɛbɛlabɔlɛ ɛzɛkye kpalɛ.

Menyianle ɛvolɛ 19 la, me diema raalɛ kpanyinli ko ahu hanle hilele me kɛ Gyihova Alasevolɛ ne mɔ ɛhile ye mɔɔ Baebolo ne ka ye wɔ anaaze mɔɔ bɛfa bɛdi gyima wɔ ɛzonlenlɛ nu la anwo debie. Ɔgengale Adendulɛ 20:4, 5 ɔhilele me. Ɛkɛ ne ka kɛ ɔnle kɛ yɛyɛ anaaze biala. Ngyɛnu 5 ne ka kɛ: “Bɛmmabɔ bɛ ti aze bɛmaa bɛ anzɛɛ bɛmmasonle bɛ. Ɔluakɛ medame [Gyihova] bɛ Nyamenle ne, mele nungule Nyamenle.” Akee ɔbizale me kɛ, “Saa Nyamenle fa anaaze yɛ nwanwane ninyɛne anzɛɛ ɔkulo kɛ yɛfa yɛdi gyima wɔ ɛzonlenlɛ nu a, ɛnee duzu ati a ɔse ɔkyi a?” Ɛhye maanle membizale kpuya dɔɔnwo. Yemɔ anzi, yɛbɔle Baebolo nu adawu dɔɔnwo. Me nye liele adawubɔlɛ ne anwo kpalɛ ɔti meannwu kɛ mekɛ ɛhɔ bɔbɔ.

Nzinlii, ɔ nee me hɔle Gyihova Alasevolɛ ayia bo. Me nye liele mɔɔ menwunle ye wɔ ɛkɛ yɛɛ mɔɔ mendele la anwo kpalɛ. Ngakula mɔɔ wɔ bɛ avinli bɔbɔ la yɛle gyimalilɛ ne bie wɔ bama ne azo Menganle ye me ti anu kɛ, ‘Menli ɛhye mɔ sukoa debie kpalɛ!’ Ɔnva nwo kɛ ɛnee metɛpepɛle me enrinli ne na me nwo ɛyɛ basabasa la, Alasevolɛ ne mɔ liele me kɛnlɛma. Abusua bie bɔbɔ maanle me nee bɛ hɔlile aleɛ zɔhane nɔsolɛ ne mɔɔ yɛkpɔnenle debiezukoalɛ la!

Mɔɔ me nee Gyihova Alasevolɛ ne mɔ zukoale ye wɔ Baebolo ne anu la maanle menwunle kɛ Gyihova Nyamenle le ɛlɔlɛ Nyamenle mɔɔ dwenle yɛ nwo ɔnva nwo yɛ ezukoa gyinlabelɛ, ɛleka mɔɔ yɛde, aneɛ mɔɔ yɛka, anzɛɛ yɛ nwomazukoalɛ. Ɔnnea sonla nyunlu. (Gyima ne 10:34, 35) Akee menlile boɛ wɔ sunsum nu. Meande nganeɛ bieko kɛ me nye ɛnlie ɛbɛlabɔlɛ nu.

KƐZI YEBOA ME LA

Debie biala bɔle ɔ bo kɛ ɔyɛ boɛ wɔ me ɛbɛlabɔlɛ nu! Mengyakyile sigalɛte ɛnlonlɛ, nzabolɛ yɛɛ ɛdendɛlɛ evinli ɛhanlɛ. Nyane mɔɔ ɔvi me ngakula nu meli dedee la yɛɛ ɛlalɛ mgbane mgbane mɔɔ ɛnee meka la bɔle ɔ bo kɛ ɔminli. Menlile nganeɛ mɔɔ ɛnee mete kɛ nvasoɛ biala ɛnle me nwo zo ɔlua amaneɛ mɔɔ menwunle ɔvi me ngakula nu yɛɛ sukulu mɔɔ meangɔ meandwu moa la azo.

Megya raalɛ mɔɔ kulo Gyihova na ɔboa me kpalɛ la. Kɛkala, mesonle kɛ maangyebakyi zo neavolɛ. Mekpɔlɔkpɔla Gyihova Alasevolɛ asafo ngakyile ne mɔ memaa bɛ anwosesebɛ na mekilehile bɛ. Me nye sɔ tumi mɔɔ Baebolo ne lɛ kakyi sonla la yɛɛ ndetelɛ mɔɔ Nyamenle fa maa yɛ la kpalɛ. Kɛkala, mende nganeɛ kɛ me nwo yɛ nyiane bieko.

Me nee me ye yɛ nye die kɛ yɛbaboa awie mɔ kɛ mɔɔ bɛboale me la