MGBAVOLƐ NEE MBƐLƐRA BIZA KƐ
Na Saa Mengulo Sukulu Ɛhɔlɛ Ɛ?
Kilehilevolɛma mɔɔ bɛ edwɛkɛ yɛ se. Atipɛnema ngyegyelɛ. Sɔnea mɔɔ yɛ se yɛɛ homework ngome. Ɔti saa ɛka kɛ ɛngulo sukulu a, ndelebɛbo wɔ nu. a Kakula bɛlɛra bie mɔɔ bɛfɛlɛ ye Rachel b la ka kɛ:
“Kɛ anrɛɛ mebahɔ sukulu la, mebava meahɔ ɛleka gyɛne. Anrɛɛ mebahɔ ɛnweazo anzɛɛ mebahɔ me gɔnwo mɔ ɛkɛ anzɛɛ mebaboa me awovolɛ meamaa bɛado aleɛ anzɛɛ bɛaziezie sua nu!”
Saa ɛte nganeɛ kɛ Rachel a, ɛnee sukuluhɔlɛ le kɛ bɛdo wɔ efiade mɔɔ ɛnrɛhola finde too kɔkpula kɛ ɛbawie sukulu la. Asoo ɛbahola wɔanyia sukuluhɔlɛ nwo adwenle kpalɛ ɔ?
Asoo ɛze? Saa ɛnyia sukuluhɔlɛ nwo adwenle kpalɛ a, ɔnrɛmaa ɛnrɛbu ye kɛ ɔle ngyegyelɛ mɔɔ ɔwɔ kɛ ɛgyinla ɔ nloa a. Wɔ adenle bie azo, ɔbamaa wɔanwu sukuluhɔlɛ kɛ ɔle debie mɔɔ anwo hyia mɔɔ baboa wɔ wɔ mekɛ mɔɔ wɔyɛ kpanyinli la.
Amaa wɔanyia sukuluhɔlɛ nwo adwenle kpalɛ la, bɔ mɔdenle fa wɔ adwenle sie ɛhye mɔ azo:
Sukulu batete wɔ. Saa ɛsukoa ninyɛne dɔɔnwo a, ɔbaboa wɔ yeamaa wɔali ngyegyelɛ mɔɔ ɛbayia ye kenle bie wɔ gyima nu nee ɛbɛlabɔlɛ nu la anwo gyima na ɛnrɛyɛ awie mɔɔ dahuu kyesɛ bɛboa wɔ a. Biza ɛ nwo kɛ, ‘Saa me nye ɛnlie ninyɛne bie mɔ anwo wɔ sukulu bɔbɔ a, nvasoɛ boni mɔ a melɛnyia ye wɔ me ndetelɛ ne azo a?’
Baebolo ngyinlazo: “Bɔ nrɛlɛbɛ kpalɛ nee adwenlenubukelɛ nwo bane.”—Mrɛlɛbulɛ 3:21.
Amaa wɔanwu nwolɛ edwɛkɛ dɔɔnwo la, kenga edwɛkɛ “What if I’m Failing at School?”
Wɔ subane. Sukuluhɔlɛ bamaa wɔanwu kɛzi ɛbava wɔ mekɛ wɔali gyima kpalɛ, wɔatete ɛ nwo na wɔahulo gyima ɛsesebɛ ɛyɛlɛ la—subane ɛhye mɔ baboa wɔ wɔ mekɛ mɔɔ wɔyɛ kpanyinli la. Biza ɛ nwo kɛ: ‘Kɛzi sukuluhɔlɛ ɛlɛboa me yeamaa meatete me nwo na meayɛ gyima kpalɛ ɛ? Anyuhɔlɛ boni a mebahola meanyia a?’
Baebolo ngyinlazo: “Gyima ɛsesebɛ biala azo lɛ nvasoɛ.”—Mrɛlɛbulɛ 14:23.
Amaa wɔanwu nwolɛ edwɛkɛ dɔɔnwo la, kenga edwɛkɛ “Kɛ Ɔkɛyɛ Na Meanlea Me Mekɛ Zo Boɛ Ɛ?”
Ɛ nee menli agɔnwolɛvalɛ. Kɛzi ɛ nee ɛ gɔnwo mɔ tu wɔ sukulu la bamaa wɔaze anwunvɔne na wɔabu awie mɔ. Kpavolɛ bie mɔɔ bɛfɛlɛ ye Joshua la ka kɛ, “Ɔhyia kɛ ɛsukoa kɛzi ɛ nee menli badendɛ la kɛ mɔɔ ɔhyia kɛ ɛsukoa tetedwɛkɛ nee abɔdeɛ nwo nrɛlɛbɛ la. Ɔle debie mɔɔ ɛbava wɔabɔ wɔ ɛbɛla a.” Biza ɛ nwo kɛ, ‘Duzu a mezukoa ye wɔ sukulu mɔɔ baboa me yeamaa me nee awie mɔ adɛnla anzodwolɛ nu a—bɔbɔ menli mɔɔ asolo ɛleka mɔɔ bɛvi anzɛɛ bɛ diedi la?’
Baebolo ngyinlazo: “Bɛkpondɛ anzodwolɛ wɔ bɛ nee menli kɔsɔɔti avinli.”—Hibuluma 12:14.
Amaa wɔanwu nwolɛ edwɛkɛ dɔɔnwo la, kenga edwɛkɛ “How Can I Improve My Conversation Skills?”
Wɔ kenle bie. Sukuluhɔlɛ bahola aboa wɔ yeamaa wɔanwu ninyɛne mɔɔ ɛze ye yɛ la na wɔava nwolɛ bodane wɔazie ɛ nye zo. Bɛlɛra bie mɔɔ bɛfɛlɛ ye Brooke la ka kɛ: “Ɛbahola wɔazukoa debie fɔɔnwo bie ɛyɛlɛ kɛ mɔɔ menyɛle la amaa saa ɛwie sukulu a wɔanyia gyima wɔayɛ.” Biza ɛ nwo kɛ: ‘Saa mewie sukulu a kɛzi mebanlea me nwo ɛ? Kɛ ɔkɛyɛ na meanwu debie mɔɔ mesukoa a ɔbaboa me wɔ me gyimayɛlɛ nu la ɛ?’
Baebolo ngyinlazo: “Maa ɛ gyakɛ abo adenle ɛyɛ sɛsɛ.”—Mrɛlɛbulɛ 4:26.
Bie A Eza Ɛ Nye Balie
MƆƆ Ɛ TIPƐNEMA KA LA
Kɛ Ɔkɛyɛ Na Meagyinla Nzisi Nloa Ɛ?
Bie a ɛnrɛhola ɛnrɛhakyi nzisima ne, noko ɛbahola wɔahakyi kɛzi ɛyɛ wɔ nyɛleɛ wɔ mekɛ mɔɔ ɛ nee bɛ wɔ la.
