Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

MGBAVOLƐ NEE MBƐLƐRA BIZA KƐ

Nzɔne Ati A Mebodɛboda Me Nwo A?

Nzɔne Ati A Mebodɛboda Me Nwo A?

 Nzɔne a le bɛ nwo ɛbodɛbodalɛ?

Bɛ nwo ɛbodɛbodalɛ kile kɛ awie anye fuu fa debie apɛ ɔ nwo anzɛɛ aboda ɔ nwo. Ɔle adenle ko mɔɔ menli dua zo yɛ bɛ nwo amumuyɛ. Bie noko a le senle mɔɔ bɛfa bɛyela bɛ nwo, bɛ nwo mɔɔ bɛfa bɛsisi debie. Edwɛkɛ ɛhye fale debie mɔɔ bɛfa bɛpepɛ bɛ nwo la anwo noko ngyinlazo mɔɔ wɔ nu la fale ɛbodalɛ ngakyile mɔɔ awie anye fuu ɔboda ɔ nwo la anwo.

Sɔ wɔ adwenle nea: Ɛhɛe anzɛɛ Kyɛkyɛ.

  1. Ngakula mraalɛ ala a dahuu bodɛboda bɛ nwo a.

  2. Saa ɛbodɛboda ɛ nwo a, ɛnee ɛlɛbu ɛ nye wɔagua Baebolo edwɛkɛ mɔɔ wɔ Sɛlɛvolɛma 19:28, mɔɔ ka kɛ: “Ɔnle kɛ bɛbodɛboda bɛ nwo” la azo.

Mualɛ:

  1. Kyɛkyɛ. Ɔwɔ nuhua kɛ ngakula mraalɛ dɔɔnwo lɛ ngyegyelɛ ɛhye ɛdeɛ, noko ngakula mrenyia bie mɔ noko ɛva bɛ nwo ɛwula nyɛleɛ ɛhye anu.

  2. Kyɛkyɛ. Sɛlɛvolɛma 19:28 ka nyɛleɛ mɔɔ menli mɔɔ sonle awozonle wɔ tete ne lale ye ali la anwo edwɛkɛ na tɛ bɛ nwo ɛbodalɛ mɔɔ bɛlɛka nwolɛ edwɛkɛ wɔ ɛke la ɔ. Noko akee, nrɛlɛbɛ wɔ nu kɛ yɛbaha kɛ yɛ Bɔvolɛ ne mɔɔ lɛ ɛlɔlɛ la ɛngulo kɛ yɛbaboda yɛ nwo.​—1 Kɔlentema 6:12; 2 Kɔlentema 7:1; 1 Dwɔn 4:8.

 Nzɔne ati a menli yɛ a?

Sɔ wɔ adwenle nea: Edwɛkɛ ne boni a ɛnea ɔle nɔhalɛ a?

Menli bodɛboda bɛ nwo . . .

  1. ɔluakɛ bɛlɛbɔ mɔdenle kɛ bɛbagyinla nganeɛdelɛ nu ngyegyelɛ bie anloa.

  2. ɔluakɛ bɛkulo kɛ bɛku bɛ nwo.

Mualɛ: A. Menli mɔɔ bodɛboda bɛ nwo la ɛngulo kɛ bɛkɛwu. Bɛkulo kɛ ngyegyelɛ bie mɔɔ bɛlɛ la fi ɛkɛ ala.

Yɛ edwɛkɛ mɔɔ mgbavolɛ nee mbɛlɛra bie mɔ ɛha ye wɔ bɛ nwo ɛbodɛbodalɛ nwo la nzonlɛ.

Celia: “Ɔmaanle me nwo dɔle me.”

Tamara: “Ɔzɔho kɛ zɔhane deɛ ne liele me. Nyane mɔɔ wɔ bɛ nwo ɛbodalɛ nu la le kpalɛ tɛla mɔɔ nganeɛdelɛ ɛtane maa mete la.”

Carrie: “Ɛnee mengulo kɛ medi alɔbɔlɛ. Me nwo mɔɔ membodale la maanle menyele me adwenle menvile alɔbɔlɛ mɔɔ melɛdi la azo na menvale me adwenle menziele me ɛbodalɛ ne azo.”

Jerrine: “Mekɛ biala mɔɔ mebaboda me nwo la, ɔye me adwenle ɔfi mɔɔ ɛlɛkɔ zo la azo yɛɛ eza ɔmmaa menva me adwenle menzie me ngyegyelɛ ne azo. Menliele nzenzaleɛ ne mendole nu.”

 Saa ɛlɛ ngyegyelɛ ɛhye bie a, kɛ ɔkɛyɛ na wɔagyakyi ɛ?

Asɔne mɔɔ ɛbayɛ wɔahile Gyihova Nyamenle la le adenle kpalɛ mɔɔ bamaa ɛ nwo adɔ wɔ a. Baebolo ne ka kɛ: “Bɛvuandi bɛ adwenleadwenle muala bɛgua ɔ nwo zo ɔluakɛ ɔdwenle bɛ nwo.”​—1 Pita 5:7.

Nzuzulɛ: Yɛ asɔne sikalɛ na ka kile Gyihova kɛ, “Mehyia moalɛ.” Mekɛ ɛlɛkɔ la, akee ɛbahola wɔaha kɛzi ɛte nganeɛ la wɔahile “arɛlekyekyelɛ muala Nyamenle ne.”​—2 Kɔlentema 1:3, 4.

Asɔneyɛlɛ ɛmmaa yɛnde nganeɛ kpalɛ wɔ mekɛ sikalɛ bie ala. Emomu, ɔle adwelielilɛ mɔɔ kɔ zo wɔ ɛ nee wɔ anwuma Selɛ ne mɔɔ ɛbɔ ɛwɔkɛ kɛ: ‘Mebaboa wɔ, mebava me konimlilɛ tumi ɛsalɛ ne meazɔ wɔ’ la avinli a.​—Ayezaya 41:10.

Menli dɔɔnwo mɔɔ bɛta bɛboda bɛ nwo la ɛnwu ye kɛ saa bɛka nwolɛ edwɛkɛ bɛkile bɛ awovolɛ anzɛɛ kpanyinli bie mɔɔ bɛdie ye bɛdi la a, ɔmaa bɛ rɛle kyekye. Tie ɛ tipɛnema nsa bie mɔɔ bɛhanle bɛ edwɛkɛ bɛhilele awie mɔ la anloa nu edwɛkɛ.

 Kpuya mɔɔ ɔwɔ kɛ ɛdwenledwenle nwo

  • Saa ɔba ye kɛ ɛkpondɛ moalɛ a, nwane a ɛbahola wɔaha wɔ edwɛkɛ wɔahile ye a?

  • Nzɔne a ɛbaha nwolɛ edwɛkɛ wɔahile Gyihova Nyamenle wɔ asɔneyɛlɛ nu a?

  • Ɛbahola wɔaha ninyɛne nwiɔ (mɔɔ bɛ nwo ɛbodalɛ ɛmboka nwo) mɔɔ ɛbahola wɔayɛ amaa wɔaye wɔ adwenleadwenle wɔavi ɛkɛ la ɔ?