Wulu kɔ nuhua edwɛkɛ ne azo

MGBAVOLƐ NEE MBƐLƐRA BIZA KƐ

Asoo Menyia Nwo Kɛ Me Nee Awie Tu Ɔ?

Asoo Menyia Nwo Kɛ Me Nee Awie Tu Ɔ?

 Ɛdulɛ mɔɔ kɔwie agyalɛ nu la a le nzɔne?

  • Ɛ nee awie mɔɔ asolo ye awodeɛ la ta finde. Ɔle ɛdulɛ mɔɔ kɔwie agyalɛ nu ɔ?

  • Ɛ nye die awie mɔɔ asolo ye awodeɛ la anwo yɛɛ ɔdaye noko ɔ nye die ɛ nwo. Ɛta ɛfa edwɛkɛ ɛnwa ye anzɛɛ ɛ nee ye tendɛ dahuu wɔ fonu zo. Ɔle ɛdulɛ mɔɔ kɔwie agyalɛ nu ɔ?

  • Saa ɛ nee ɛ gɔnwo mɔ finde a, dahuu ɛkulo kɛ ɛ nee awie bie mɔɔ asolo ye awodeɛ la a tɛnla a. Ɔle ɛdulɛ mɔɔ kɔwie agyalɛ nu ɔ?

Bie a yeanyɛ se kɛ ɛbaye kpuya ne mɔɔ limoa la anloa. Noko wɔannea a ɛbagyinla ekyi na wɔabua kpuya mɔɔ tɔ zo nwiɔ nee nsa ne. Boni a ɛdulɛ mɔɔ kɔwie agyalɛ nu la kile amgba a?

Ɛdulɛ mɔɔ kɔwie agyalɛ nu la a le nyɛleɛ biala mɔɔ maa ɛ nye die awie anwo na ɔdaye noko ɔ nye die ɛ nwo la.

Yemɔti kpuya nsa ne mualɛ a le ɛhɛe. Saa ɔle fonu zo, ɛ nye gyi ɔ nyunlu, menli nu anzɛɛ fealera nu bɔbɔ na ɛ nee ɛ gɔnwo bie mɔɔ asolo ye awodeɛ la lɛ ɛhulolɛ maa bɛ nwo na eza bɛdi adwelie dahuu a, ɔle ɛdulɛ mɔɔ kɔwie agyalɛ nu.

 Ɛdulɛ mɔɔ kɔwie agyalɛ nu la bodane a le boni?

Ɔwɔ kɛ ɛdulɛ mɔɔ kɔwie agyalɛ nu la nyia bodane kpalɛ​—mɔɔ yemɔ a le kɛ ɔboa nrenyia nee raalɛ amaa bɛanwu ye saa bɛbahola bɛagya a.

Nɔhalɛ nu, bie a ɛ gɔnwo mɔ ɛnrɛva ɛdulɛ mɔɔ kɔwie agyalɛ nu la anyebolo zo. Bie a ɛnee bɛkulo kɛ bɛ nee awie mɔɔ asolo ye awodeɛ la tu ala mɔɔ ɔnle bɛ adwenle nu kɛ bɛgya ye a. Bie mɔ bɔbɔ bu agɔnwolɛvalɛ zɛhae kɛ ɔle duma ɛlielɛ anzɛɛ awie mɔɔ bɛ nee ye dua menli nu amaa bɛabu bɛ.

Fane dɔɔnwo ne ala agɔnwolɛvalɛ zɛhae mɔ ɛngyɛ. Kakula raalɛ bie mɔɔ bɛfɛlɛ ye Heather la ka kɛ, “Mgbavolɛ nee mbɛlɛra dɔɔnwo nee awie mɔɔ asolo ye awodeɛ la tu a bie a dapɛne ko anzɛɛ dapɛne nwiɔ anu ɛnee bɛgyakyi. Bɛmbu agɔnwolɛvalɛ zɛhae mɔ bie ɔti ɔndɛnla ɛkɛ ne ɔngyɛ​—na kɛ anrɛɛ ɔbahɔwie agyalɛ nu la ɔkɔwie ewolebɔlɛ nu.”

Ɔda ali kɛ saa ɛ nee awie tu a ɔka ye nganeɛdelɛ noko. Yemɔti nyia adwenle kpalɛ wɔ nwo.​—Luku 6:31.

Saa ɛ nee awie tu na tɛ wɔ adwenle a le kɛ ɛbagya ye a, ɛnee ɛlɛyɛ wɔ nyɛleɛ kɛ kakula bie mɔɔ fa toy fofolɛ di nwɔhoa wie a ɔngulo ye bieko la

Dwenle nwo: Asoo ɛbahulo kɛ awie bava wɔ nganeɛdelɛ ali nwɔhoa kɛ asɛɛ ɛle toy mɔɔ ɔhyia ɛ nwo a yɛɛ ɔkpondɛ wɔ a? Ɛnee noko mmayɛ awie mɔ zɔ! Baebolo ne ka kɛ ɛlɔlɛ “ɛnyɛ ninyɛne mgbane mgbane.”​—1 Kɔlentema 13:4, 5.

Kakula bɛlɛra bie mɔɔ bɛfɛlɛ ye Chelsea la ka kɛ: “Ɔdwu mekɛ ne bie a menyia adwenle kɛ ɛdulɛ mɔɔ kɔwie agyalɛ nu la le nwɔhoa debie noko ɔnle zɔ, titili saa bɛ nuhua ko fa ye anyebolo zo a.”

Nzuzulɛ: Amaa wɔaziezie ɛ nwo wɔamaa agyalɛ la, kenga 2 Pita 1:5-7 na kpa subane ko mɔɔ ɛkulo kɛ ɛdi nwolɛ gyima la. Wɔ siane ko anzi, nea kɛzi wɔnyia anyuhɔlɛ wɔ zɔhane subane ne anu la.

 Medwu agyalɛ ɛhɔlɛ ɔ?

  •  Ɛvolɛ boni a ɛkulo kɛ ɛgya a?

  •  Akee biza wɔ awovolɛ kpuya ko ne ala.

Bie a wɔ mualɛ ne nee wɔ awovolɛ ɛdeɛ ne ɛnrɛyɛ ko. Anzɛɛ ɔbayɛ ko!

Wɔannea a ɛboka mgbavolɛ nee mbɛlɛra mɔɔ bɛkulo kɛ bɛkendɛ na bɛnwu kɛ bɛdi kolaa na bɛagya la anwo.

Ɛhye a Danielle mɔɔ ɛnyia ɛvolɛ 17 la bɔle kpɔkɛ kɛ ɔbayɛ a. Ɔka kɛ: “Saa mefa ɛvolɛ nwiɔ mɔɔ ɛze ɛhɔ la metoto kɛkala anwo a, mɔɔ ɛnee mekpondɛ ye wɔ nrenyia mɔɔ mekulo kɛ megya ye la anwo la ɛhakyi. Kɛkala bɔbɔ, menwu ye kɛ metɛdwule kɛ mebazi kpɔkɛ zɛhae. Saa menwu ye kɛ me adwenle ɛdi kpalɛ a yɛɛ mebadwenle agyalɛ nwo a.”

Debie bieko wɔ ɛkɛ mɔɔ ɔti nrɛlɛbɛ wɔ nu kɛ ɛbahendɛ a. Baebolo ne fa edwɛkɛkpɔkɛ “kakula” kilehile mekɛ mɔɔ awie nla nwo nganeɛdelɛ nu yɛ se la anu. (1 Kɔlentema 7:36) Saa ɛtɛdwule mɔɔ ɛgya na ɛ nee awie mɔɔ asolo ye awodeɛ la tu a ɔbahola yeamaa nganeɛdelɛ mɔɔ ɛlɛ la ayɛ kpole na wɔabɔ ɛbɛla ɛtane.

Nɔhalɛ nu, bie a ɛ tipɛnema ɛnrɛbu ɛhye kɛ nwolɛ hyia. Bɛ nuhua dɔɔnwo kulo kɛ bɛfa bɛ nwo bɛwula nla nu. Noko ɛbahola yɛɛ ɔwɔ kɛ ɛkpo adwenle ɛhye! (Wulomuma 12:2) Yeanyɛ boɛ fee la, Baebolo ne tu wɔ folɛ kɛ “ɛnriandi adwɔmane ɛbɛla.” (1 Kɔlentema 6:18) Saa ɛkendɛ mekɛ mɔɔ ɛnle kakula bieko la a, ɛbahola wɔakpo “anwofofolɛ biala.”​—Nolobɔvo ne 11:10.

 Nzɔne ati a ɔwɔ kɛ ɛsi abotane a?

Saa bɛtinlitinli ɛ nwo kɛ ɛva ɛ nwo ɛwula ɛdulɛ mɔɔ kɔwie agyalɛ nu la a ɔle kɛ asɛɛ bɛlɛka bahile wɔ kɛ ɛhɛlɛ sɔnea bie wɔ mekɛ mɔɔ ɛtɛsieziele ɛ nwo la. Ɔba ye zɔhane a, ɔnrɛboa. Ɔwɔ kɛ ɛnyia mekɛ ɛsukoa na ɛsiezie ɛ nwo kpalɛ amaa wɔanyia debie wɔahɛlɛ.

Zɔhane ala a ɛdulɛ mɔɔ kɔwie agyalɛ nu la de a.

Ɛdulɛ mɔɔ kɔwie agyalɛ nu la ɛnle nwɔhoa debie. Ɔti, kolaa na wɔakpa awie ko kɛ ɛ nee ye tu la, nyia mekɛ sukoa kɛzi bɛfa agɔnwolɛ kpalɛ la.

Na saa nzinlii, ɛnyia awie mɔɔ ɛkulo ye la a wɔahola wɔava ye agɔnwolɛ kpalɛ. Ɔluakɛ, menli nwiɔ mɔɔ bɛle agɔnwolɛma kpalɛ la a gya bɛ nwo a.

Saa ɛkendɛ na nzinlii ɛgya a, ɔngile kɛ ɛnrɛnyia fanwodi. Emomu, ɔbamaa wɔanyia fanwodi dɔɔnwo na ‘wɔali fɛlɛko wɔ mekɛ mɔɔ ɛtɛde kpavolɛ anzɛɛ bɛlɛra la.’ (Nolobɔvo ne 11:9) Eza ɛbanyia mekɛ wɔaziezie ɛ nwo na wɔanyia subane kpalɛ na mɔɔ tɛla ɛhye la ɛ nee Nyamenle banyia agɔnwolɛvalɛ kpalɛ.​—Awolɛyelɛ 3:27.

Noko kɛkala mɔ, ɛbahola ɛ nee menli mɔɔ asolo bɛ awodeɛ la abɔ nu avinde. Adenle kpalɛ boni azo a ɛbahola wɔalua wɔayɛ ɛhye a? Ɛ nee mgbavolɛ nee mbɛlɛra mɔɔ kpanyinli bie boka nwo la ɛvinde. Kakula bɛlɛra bie mɔɔ bɛfɛlɛ ye Tammy la ka kɛ: “Menea a yemɔ yɛ anyelielɛ kpalɛ. Ɔle kpalɛ kɛ ɛbava menli dɔɔnwo agɔnwolɛ.” Monica nee ye yɛ adwenle. Ɔka kɛ, “Saa ɛ nee menli dɔɔnwo bɔ nu finde a ɔboa kpalɛ, ɔluakɛ ɔmaa ɛnyia subane ngakyile.”

Noko, saa ɛfa wɔ adwenle ɛsie sonla ko anwo zo a, mɔɔ vi nu ba la a le nyanelilɛ. Ɔti mmapele ɛ nwo. Fa mekɛ ɛhye sukoa kɛzi ɛbava agɔnwolɛ kpalɛ la. Na saa nzinlii ɛnyia adwenle kɛ ɛ nee awie tu na wɔagya ye a, ɛbanwu mɔɔ ɛyɛ a bɛ agɔnwolɛvalɛ ne bayɛ kpalɛ la.