Wulu kɔ nuhua edwɛkɛ ne azo

MGBAVOLƐ NEE MBƐLƐRA BIZA KƐ

Asoo Medwu Agyalɛ Ɛhɔlɛ Ɔ?

Asoo Medwu Agyalɛ Ɛhɔlɛ Ɔ?

Kolaa na wɔabua kpuya ɛhye la, ɔwɔ kɛ ɛnwu ɛ nwo kpalɛ. Kɛ neazo la, suzu edwɛkɛ mɔɔ doɔdoa zo la anwo:

Agɔnwolɛvalɛ

Kɛzi ɛ nee wɔ awovolɛ nee ɛ mediema di ɛ? Saa ɛlɛkile wɔ adwenle wɔ edwɛkɛ bie anwo a, asoo ɛta ɛfa ɛya na ɛtendɛ ɛtane ɛkile bɛ ɔ? Boni a bɛbaha ye wɔ ɛ nwo a? Kɛzi ɛyɛ wɔ mbusuafoɔ la bahile mɔɔ saa ɛgya a ɛbava wɔayɛ ɛ ye anzɛɛ ɛ hu la.​—Ɛfɛsɛsema 4:31.

Wɔ subane

Ɛlɛ ninyɛne nwo adwenle kpalɛ anzɛɛ ɔnle zɔ ɔ? Ɛlɛ ndelebɛbo, anzɛɛ dahuu ɛkulo kɛ bɛyɛ debie biala kɛ mɔɔ ɛkulo la ɔ? Saa ɛlɛyia ngyegyelɛ a ɛkola ɛkomo ɛ nwo zo ɔ? Ɛlɛ abotane ɔ? Saa ɛso Nyamenle sunsum ma ne kɛkala a, ɔbaziezie wɔ amaa wɔayɛ kunli anzɛɛ yelɛ kpalɛ kenle bie.​—Galeehyeama 5:22, 23.

Kɛzi ɛnea wɔ ezukoa zo

Kɛzi ɛnea wɔ ezukoa zo ɛ? Dahuu ɛtua awie kakɛ ɔ? Ɛkola ɛyɛ gyima ko ɛkyɛ ɔ? Saa tɛ ye zɔ a, ɛnee nzɔne ati ɔ? Kɛzi gyima ne de la ati ɔ? Wɔ gyima menle ne ati ɔ? Anzɛɛ wɔ subane bie mɔɔ ɔwɔ kɛ ɛkakyi la ati ɔ? Saa ɛngola wɔ ezukoa zo nea a, kɛ ɔkɛyɛ na wɔanlea wɔ abusua ne ezukoa zo boɛ ɛ?​—1 Temɔte 5:8.

Ɛ nee Nyamenle agɔnwolɛvalɛ

Saa ɛle Gyihova Dasevolɛ a, nzɔne a ɛlɛyɛ wɔava wɔamia ɛ nee Nyamenle agɔnwolɛvalɛ ne anu a? Asoo ɛkenga Nyamenle Edwɛkɛ ne, ɛkɔ daselɛlilɛ na eza ɛmaa mualɛ wɔ debiezukoalɛ bo ɔ? Awie mɔɔ ɛbagya ye la kulo kɛ ɛyɛ awie mɔɔ ɛ nee Nyamenle agɔnwolɛvalɛ le kpalɛ.​—Nolobɔvo ne 4:9, 10.

Ɛnwu ɛ nwo kpalɛ a, ɔnrɛyɛ se kɛ ɛbanyia awie mɔɔ baboa wɔ yeamaa wɔava wɔ adwenle wɔazie mɔɔ ɛkola ɛyɛ la azo na tɛ mɔɔ ɛngola ɛnyɛ la azo ɔ.