Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

MGBAVOLƐ NEE MBƐLƐRA BIZA KƐ

Kɛ Ɔkɛyɛ Na Meanyia Fanwodi Ɛ?

Kɛ Ɔkɛyɛ Na Meanyia Fanwodi Ɛ?

 Duzu ati a awovolɛ kulo kɛ bɛnwu debie biala anu a?

Wɔ awovolɛ se bɛdwenle ɛ nwo. Ɛdawɔ noko ɛnwu ye kɛ bɛmmaa ɛnyia wɔ fanwodi. Kɛ neazo la:

  • Bɛlɛra bie mɔɔ bɛfɛlɛ ye Erin la ka kɛ: “Me papa fa me moba fonu ne, ɔdie me password na ɔkenga me tɛse message ne mɔ. Saa meanyɛ a ɔnyia adwenle bie kɛ melɛfa debie meazie ye.”

  • Denise mɔɔ wɔ ye ɛvolɛ 20 ne anu la kakye mekɛ mɔɔ ye mame hulole kɛ ɔnwu menli mɔɔ fɛlɛ ye nee menli mɔɔ ɔfɛlɛ bɛ la. “Ɔnea nɔma ne mɔ amuala na yeabiza me menli mɔɔ nɔma ne le bɛ ɛdeɛ nee edwɛkɛ mɔɔ me nee bɛ hanle la.”

  • Bɛlɛra bie mɔɔ bɛfɛlɛ ye Kayla la ka kɛ ye mame gengale ye fealeranu edwɛkɛ bie mɔɔ ɔhɛlɛle la. “Ɛnee kɛzi mete nganeɛ nee ɔ nwo edwɛkɛ a wɔ nu a! Meangɛlɛ me nwo edwɛkɛ wɔ buluku nu bieko ɛlɛ.”

Nɔhalɛ edwɛkɛ: Ɔle wɔ awovolɛ ɛzonlelilɛ kɛ bɛbayɛ mɔɔ baboa wɔ la, yɛɛ ɛnrɛhola ɛnrɛhile kɛzi ɔwɔ kɛ bɛdi ɛzonlelilɛ ɛhye anwo gyima la. Asoo ɔyɛ a bɛyɛ bɛmaa ɔbo zo ɔ? Bie a. Anyelielɛ edwɛkɛ ne a le kɛ ɛbahola wɔayɛ ninyɛne bie mɔ amaa wɔade nganeɛ mɔɔ ɛte kɛ bɛlɛfedevede edwɛkɛ nu la azo.

 Mɔɔ ɛbahola wɔayɛ la

Mmafa debie biala ɛfea bɛ. Baebolo ne tu yɛ folɛ kɛ ‘yɛva nɔhalɛlilɛ yɛbɔ yɛ ɛbɛla wɔ debie biala anu.’ (Hibuluma 13:18) Bɔ mɔdenle kɛ ɛbayɛ zɔ wɔamaa wɔ awovolɛ. Saa ɛka wɔ edwɛkɛ ɛkile bɛ na ɛdi nɔhalɛ ɛmaa bɛ a, bɛbamaa wɔ fanwodi dɔɔnwo.

Dwenle ɛhye anwo: Asoo wɔ awovolɛ nwu wɔ kɛ ɛle awie mɔɔ bɛbahola bɛava bɛ nwo bɛado ɛ nwo zo ɔ? Ɛnli mekɛ mɔɔ bɛva bɛmaa wɔ la azo ɔ? ɛmmaa bɛnnwu menli mɔɔ ɛ nee bɛ tu la ɔ? ɛmmaa bɛnnwu ninyɛne mɔɔ ɛyɛ la anu ɔ?

“Ɔwɔ kɛ medie mɔɔ me awovolɛ ka la meto nu. Mefi me ahonle nu meka me ɛbɛlabɔlɛ nu edwɛkɛ mekile bɛ. Meka debie biala mɔɔ ɔwɔ kɛ bɛnwu ye la mekile bɛ, ɛhye ati bɛdie me bɛdi yɛɛ bɛmaa me fanwodi.”​—Delia.

Nyia abotane. Baebolo ne ka kɛ: “Bɛhɔ zo bɛnleɛnlea bɛ nu.” (2 Kɔlentema 13:5) Ɔdie mekɛ na awie anyia subane mɔɔ maa bɛkola bɛfa bɛ nwo bɛto ɔ nwo zo a, noko wɔ ɛvɛlɛ ɛnrɛyɛ gyɛne.

Dwenle ɛhye anwo: Mekɛ bie ɛnee wɔ awovolɛ noko le mgbavolɛ nee mbɛlɛra. Abusuabɔlɛ boni a ɛsuzu kɛ nɔhalɛ edwɛkɛ zɔhane lɛ wɔ ɛ nwo edwɛkɛ mɔɔ hyia bɛ la anu ɛ?

“Mesuzu kɛ awovolɛ kakye nvonleɛ mɔɔ bɛyɛle la na bɛngulo kɛ bɛ mra yɛ nvonleɛ ko ne ala bie.”​—Daniel.

Te bɛ edwɛkɛ bo. Bɔ mɔdenle kɛ ɛbanwu ninyɛne kɛ mɔɔ wɔ awovolɛ nwu bɛ la. Baebolo ne ka kɛ yelɛ kpalɛ ‘nea ye sua nu amra boɛ wɔ bɛ ɛbɛlabɔlɛ nu’ yɛɛ selɛ kpalɛ fa “Gyihova folɛdulɛ nee ye adehilelɛ” tete ɔ mra. (Mrɛlɛbulɛ 31:27; Ɛfɛsɛsema 6:4, ɔbodwɛkɛ) Amaa bɛahola bɛayɛ zɔ la, ɔwɔ kɛ bɛyɛ gyima ɛsesebɛ: ɔwɔ kɛ wɔ awovolɛ nwu mɔɔ ɛlɛkɔ zo wɔ wɔ ɛbɛlabɔlɛ nu la.

Dwenle ɛhye anwo: Saa ɛle awovolɛ mɔɔ ɛze mgbavolɛ nee mbɛlɛra anwo edwɛkɛ la a​—asoo ɛbamaa ɛ ra fanwodi bɔkɔɔ mɔɔ ɛmbiza ye ɛbɛlabɔlɛ nu edwɛkɛ biala ɔ?

“Saa ɛle kpavolɛ anzɛɛ bɛlɛra a, ɛnwu ye kɛ wɔ awovolɛ ɛmmaa wɔ fanwodi. Noko kɛkala mɔɔ meyɛ kpanyinli la menwu deɛmɔti ɔwɔ kɛ awovolɛ yɛ zɔ la. Ɔda ɛlɔlɛ mɔɔ bɛlɛ la ali.”​—James.