Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

MGBAVOLƐ NEE MBƐLƐRA BIZA KƐ

Kɛ Ɔkɛyɛ Na Meagyakyi Alɔbɔlɛlilɛ Ɛ?

Kɛ Ɔkɛyɛ Na Meagyakyi Alɔbɔlɛlilɛ Ɛ?

“Saa awie mɔ anwo kyele bɛ a, meboa bɛ memaa bɛdi bɛ ngyegyelɛ nwo gyima na bɛ nwo tɔ bɛ. Noko, menli dɔɔnwo ɛnze ye kɛ saa mekɔ sua nu a mefea mesu.”​—⁠Kellie.

“Saa me rɛle bɔ a, mengɔ menli nu. Saa awie to ɛsalɛ fɛlɛ me a, mekpondɛ edwɛkɛ bie meka amaa meangɔ. Mebɔ mɔdenle kɛ menrɛmaa me abusua ne ɛnrɛnwu ye kɛ melɛdi alɔbɔlɛ. Bɛdwenle kɛ ninyɛne ɛlɛkɔ boɛ amaa me.”​—⁠Rick.

Ɔyɛ a ɛte nganeɛ kɛ mɔɔ Kellie anzɛɛ Rick dele nganeɛ la ɔ? Saa zɔhane a ɔde a, mmadwenle kɛ debie ɛlɛgyegye wɔ. Nɔhalɛ ne a le kɛ, awie biala arɛle bɔ ɔvi mekɛ mɔɔ kɔ mekɛ la. Mrenyia nee mraalɛ nɔhavoma mɔɔ bɛha bɛ nwo edwɛkɛ wɔ Baebolo ne anu la bɔbɔ dele nganeɛ ɛhye bie.​—⁠1 Samoɛle 1:​6-8; Edwɛndolɛ 35:14.

Ɔdwu mekɛ ne bie a ɛbanwu deɛmɔti ɛ rɛle ɛbɔ la; ɔyɛ noko a ɛnnwu ye. Anna mɔɔ ɛnyia ɛvolɛ 19 la ka kɛ, “Ɔnle kɛ edwɛkɛ bie to wɔ kolaa na wɔali alɔbɔlɛ. Saa bɔbɔ ɛnlɛ ngyegyelɛ biala a alɔbɔlɛ kola ka wɔ. Ɛdwenle nwo a, ɛnde ɔ bo noko ɔsi!”

Saa edwɛkɛ to wɔ ɔmaa ɛdi alɔbɔlɛ anzɛɛ ɛhwee ɛtɛsile bɔbɔ na ɛlɛdi alɔbɔlɛ a , boni a ɛbahola wɔayɛ a? Sɔ mɔɔ doɔdoa zo la nea:

  1. Ka nwolɛ edwɛkɛ kile awie. Mekɛ mɔɔ Dwobu yiale ngyegyelɛ la ɔhanle kɛ: “Mebaha me ahonle nu nyane muala!”​—⁠Dwobu 10:1.

    Kellie: Kɛzi mendele nganeɛ wɔ mekɛ mɔɔ menganle edwɛkɛ ne mengilele awie la yɛ nwanwane. Kɛkala, awie ze ngyegyelɛ mɔɔ mewɔ nu la. Bɛbahola bɛalie me bɛavi kuma ne mɔɔ mela nu la anu.​—⁠menyia moalɛ!

  2. Kɛlɛ nwolɛ edwɛkɛ to ɛkɛ. Saa ɛlɛdi alɔbɔlɛ bie wɔ wɔ ɛbɛlabɔlɛ nu a, bie a ɛbahulo kɛ ɛbahɛlɛ wɔ edwɛkɛ ne wɔ kɛlata zo. Wɔ Devidi edwɛndolɛ ne anu, ɔdwu mekɛ ne bie a ɔkɛlɛ edwɛkɛ mɔɔ yɛ alɔbɔlɛ la. (Edwɛndolɛ 6:6) Saa ɛkɛlɛ kɛzi ɛte nganeɛ la ɛto ɛkɛ a, ɔbahola yeaboa wɔ yeamaa ‘wɔazɔ nrɛlɛbɛ nee adwenlenunwunlɛ nu boɛ amaa bɛanvi ɛ sa.’​—⁠Mrɛlɛbulɛ 3:21.

    Heather: Saa mekɛlɛ mɔɔ ɛlɛgyegye me la meto ɛkɛ a, ɔboa ɔmaa mesiezie me adwenle kpalɛ amaa alɔbɔlɛlilɛ anvo me nwo zo. Saa ɛkɛlɛ mɔɔ ɛlɛgyegye wɔ la na ɛdi nwolɛ gyima a, ɔmmaa alɔbɔlɛlilɛ ne ɛnyɛ kpole.

  3. Yɛ nwolɛ asɔne. Baebolo ne ka kɛ saa ɛyɛ mɔɔ ɛlɛgyegye wɔ la anwo asɔne a, ‘Nyamenle anzodwolɛ ne mɔɔ bo ndelebɛbo muala azo la babɔ wɔ ahonle ne nee wɔ adwenle nzuzulɛ nwo bane.’​—⁠Felepaema 4:6, 7.

    Esther: Ɛnee melɛbɔ mɔdenle kɛ mebanwu mɔɔ ɛlɛgyegye me la, noko meannwu ye. Yemɔti menzɛlɛle Gyihova kɛ ɔboa me ɔmaa me nye ɛlie. Ɛnee ɔgyegye me kɛ dahuu medi nyane la. Akee me nwo dɔle me. Mmabu tumi mɔɔ wɔ asɔneyɛlɛ nu la kɛ ɔle debie ekyi!

    Moalɛ mɔɔ ɛbanyia ye nee mɔdenle mɔɔ ɛbabɔ la bahola amaa alɔbɔlɛlilɛ ne avi ɛkɛ

    Nzuzulɛ: Fa Edwɛndolɛ 139:23, 24 kɛ neazo la yɛ asɔne kile Gyihova. Ka wɔ ahonle nu edwɛkɛ kile ye na sɛlɛ ye kɛ ɔboa wɔ ɔmaa ɛnwu debie mɔɔ ɛmaa ɛlɛdi alɔbɔlɛ la.

Ɛye nzuzulɛ mɔɔ wɔ anwuma ɛke la ɛsie ahane a, ɛlɛ Nyamenle Edwɛkɛ Baebolo ne mɔɔ sonle bolɛ la. Saa ɛfa anwosesebɛ mɔɔ ɛbanyia ye wɔ Baebolo ne anu la ɛsie wɔ adwenle nu a, ɔbahola yeaha wɔ nganeɛdelɛ ne wɔ adenle kpalɛ zo.​—⁠Edwɛndolɛ 1:1-3.

Mekɛ mɔɔ alɔbɔlɛlilɛ bie bahyɛ la

Ryan ka kɛ, “Ɔdwu mekɛ ne bie a, ɔyɛ se kɛ mebadwazo meavi ɛkpa zo ɔluakɛ mengulo kɛ medwazo na mebayia ngyegyelɛ fofolɛ wɔ kenle ne anu.” Ryan ɛnyia adwenle nu ngyegyelɛ, noko tɛ ɔ ngomekye ɔ. Neɛnleanu bie mɔɔ bɛyɛle la kile kɛ saa ɛye mgbavolɛ nee mbɛlɛra 4 ɛsie ɛkɛ a, bɛ nuhua 1 nyia adwenle nu ngyegyelɛ kolaa na yeayɛ kpanyinli.

Kɛ ɔkɛyɛ na wɔanwu kɛ wɔnyia adwenle nu ngyegyelɛ ɛ? Sɛkɛlɛneɛ mɔɔ bamaa wɔanwu ye la bie a le wɔ nyɛleɛ anzɛɛ wɔ subane mɔɔ ɔbahakyi, ɛ nwo mɔɔ ɛbahwe wɔavi menli nwo, gyima bie mɔɔ ɛ nye ɛnrɛlie nwo bieko, wɔ aleɛlilɛ nee wɔ nafelɛ mɔɔ bahakyi yɛɛ nganeɛ mɔɔ ɛbade kɛ ɛmfɛta la.

Nɔhalɛ nu, ɔzɔho kɛ awie biala ɛnyia sɛkɛlɛneɛ ɛhye anu ko anzɛɛ mɔɔ bo zɔ la wɔ mekɛ bie anu. Noko saa sɛkɛlɛneɛ ɛhye ɛdɛnla ɛ nwo ɛhyɛ a, nzɔne ati a ɛnga nwolɛ edwɛkɛ ɛngile wɔ awovolɛ na ɛnwu dɔketa a? Bie a, awie mɔɔ yɛ ayile la bahola anwu ye saa wɔ alɔbɔlɛlilɛ ne le ewule a.

Saa ɛlɛ adwenle nu ngyegyelɛ a, ɔnle debie mɔɔ ɔwɔ kɛ ɛse nwolɛ nyiane a. Ɔlua ayileyɛlɛ zo, menli mɔɔ bɛnyia adwenle nu ngyegyelɛ la bie mɔ anwo ɛdɔ bɛ​—bɛ nye eza ɛlie bieko. Saa adwenle nu ngyegyelɛ anzɛɛ debie gyɛne bie a ɛlɛmaa wɔali nyane a, kakye edwɛkɛ mɔɔ wɔ Edwɛndolɛ 34:18 mɔɔ se: ‘Gyihova bikye mɔɔ nyane ɛha ye la, na ɔdie mɔɔ ye anyelazo ɛwie la.’