Wulu kɔ nuhua edwɛkɛ ne azo

MGBAVOLƐ NEE MBƐLƐRA BIZA KƐ

Asoo Ɔfɛta Kɛ Megya Sonla Ɛhye Ɔ?

Asoo Ɔfɛta Kɛ Megya Sonla Ɛhye Ɔ?

Wɔnwu awie mɔɔ ɛnea a ɛbahola wɔagya ye ɔ? Saa ɔle zɔ a, kɛ ɔkɛyɛ na wɔanwu ye kɛ ɔfɛta kɛ ɛgya ye ɛ?

Ɔnle kɛ ɛfa wɔ adwenle ɛsie mɔɔ ɛnwu ye la ala azo. Ɔluakɛ, bie a bɛlɛra ne mɔɔ anwo yɛ fɛ la ɛnli nɔhalɛ anzɛɛ kpavolɛ ne mɔɔ ɛlie duma la ɛnlɛ subane kpalɛ. Kpondɛ awie mɔɔ ɛbahola ɛ nee ye adɛnla na eza ɛ nee ye lɛ bodane ko la.​—Mɔlebɛbo 2:18; Mateyu 19:4-6.

Nea Ninyɛne Kɔ Moa

Gua ɛ nye aze nea ahenle mɔɔ ɛkulo ye la kpalɛ. Wɔannea a ɛbanwu mɔɔ ɛkulo kɛ ɛnwu ye la ala. Ɔti anrɛɛ si abotane. Bɔ mɔdenle kɛ ɛbanwu ɛ gɔnwo ne subane mɔɔ ɔlɛ la.

Menli dɔɔnwo nee awie mɔ ɛlɛtu a bɛnnea ninyɛne bɛngɔ moa. Emomu, bɛka ye ndɛndɛ kɛ bɛ subane le ko: “Yɛkulo edwɛne ko.” “Yɛ nye die debie ko ne ala anwo.” “Yɛ adwenle yia wɔ debie biala anwo!” Noko, ɔwɔ kɛ ɛnea ninyɛne ɛkɔ moa kpalɛ. Bɔ mɔdenle kɛ ɛbanwu “ahonle nu sonla mɔɔ vea” la. (1 Pita 3:4; Ɛfɛsɛsema 3:16) Kɛ anrɛɛ ɛbava wɔ adwenle wɔazie ninyɛne mɔɔ bɛ adwenle yɛ ko wɔ nwo azo la, bie a ɛbahola wɔava wɔ adwenle wɔazie ninyɛne mɔɔ bɛ adwenle ɛnyɛ ko wɔ nwo la azo.

Kɛ neazo la, suzu edwɛkɛ mɔɔ doa zo la anwo:

  • Kɛzi ahenle yɛ ye nyɛleɛ wɔ akɛsakɛsa nwo ɛ​—asoo ɔbɔ mɔdenle kɛ ɔbayɛ ninyɛne kɛ mɔɔ ɔkulo la, bie a ɔbava “ɛya” anzɛɛ ɔbaha “edwɛkɛ ɛtane” ɔ? (Galeehyeama 5:19, 20; Kɔlɔsaema 3:8) Anzɛɛ saa edwɛkɛ ne ɛnle Nyamenle mɛla mɔɔ bɛbulu zolɛ la a, asoo ɔda ndelebɛbo ali yɛɛ ɔlɛ ɛhulolɛ kɛ ɔbagyakyi edwɛkɛ nu amaa anzodwolɛ ara ɔ?​—Gyemise 3:17.

  • Asoo ɔle awie mɔɔ ɔle mɛlɛbɛla, angomedi anzɛɛ debie yɛ ye ahyi ɔ? Asoo ɔkpondɛ kɛ dahuu ɔnwu debie biala mɔɔ ɛlɛyɛ la anu ɔ? “Nicole ka kɛ, “Ɔyɛ a mete kɛ menli mɔɔ ɛyɛ agyalɛ ngyehyɛleɛ la bie mɔ ko ɔluakɛ bɛ nuhua ko kpondɛ kɛ dahuu ɔ gɔnwo ne fɛlɛ anzɛɛ ka ɛleka biala mɔɔ ɔlɛkɔ la ɔkile ye. Menwu ye kɛ ɛhye le subane ɛtane.”​—1 Kɔlentema 13:4.

  • Kɛzi awie mɔ nwu ahenle ne ɛ? Saa ɛbiza ɔ nwo edwɛkɛ ɛfi menli mɔɔ ze ye, kɛ neazo la menli mɔɔ ɛnyi wɔ sunsum nu mɔɔ wɔ asafo ne anu la ɛkɛ a ɔbaboa wɔ. Ɛyɛ zɔ a ɛbanwu ye saa menli “ka ɔ nwo edwɛkɛ kpalɛ” a.​—Gyima ne 16:1, 2.