Wulu kɔ nuhua edwɛkɛ ne azo

MGBAVOLƐ NEE MBƐLƐRA BIZA KƐ

Kɛ Ɔkɛyɛ Na Meakpo Adwenle Ɛtane Ɛ?

Kɛ Ɔkɛyɛ Na Meakpo Adwenle Ɛtane Ɛ?

 Kɛzi ɛnwu ɛ nwo ɛ?

  • Melɛ debie biala anu anyelazo

    “Mebɔ mɔdenle kɛ mebamaa me nye alie yɛɛ memmaa ninyɛne ɛngyegye me. Duzu ati a memmaa me nyunlu ɛnyɛ ɛzelekɛ ɛzelekɛ dahuu a?”​—Valerie.

  • Menlɛ ninyɛne nwo adwenle kpalɛ

    “Mekɛ biala mɔɔ debie kpalɛ bie bazi la, adwenle mɔɔ dimoa ba me ti anu a le kɛ, menlie menli kɛ ɔle nɔhalɛ.”​—Rebecca.

  • Medie me tɛnlabelɛ ne meto nu

    “Saa menyia anyelazo kɛ debie biala bahɔ zo boɛ a me sa bazi aze wɔ mekɛ mɔɔ ninyɛne angɔ ye boɛ la yɛɛ saa meannyia ninyɛne nwo adwenle kpalɛ noko a, dahuu me nye ɛnrɛlie. Saa medie me tɛnlabelɛ ne meto nu a, ɔboa me ɔmaa menwu ninyɛne kɛ mɔɔ bɛde la.”​—Anna.

 Duzu ati a nwolɛ hyia a?

Baebolo ne ka kɛ “mɔɔ ɛlɛdi fɛlɛko la mekɛ kɔsɔɔti le anyelielɛ.” (Mrɛlɛbulɛ 15:15) Nɔhalɛ nu, menli mɔɔ kpo adwenle ɛtane na bɛfa adwenle kpalɛ bɛbɔ bɛ ɛbɛla la anye die. Eza bɛnyia agɔnwolɛma dɔɔnwo. Nwane a bahulo kɛ ɔbikye awie mɔɔ dahuu ɔdi nyane na ɔlɛ adwenle ɛtane la a?

Noko, saa ɛle awie mɔɔ dahuu ɛlɛ debie biala anu anyelazo bɔbɔ a, ɔwɔ kɛ ɛgyinla ninyɛne mɔɔ sisi ɛbɛlabɔlɛ nu la anloa. Kɛ neazo la:

  • Ɛbahola wɔade konle, amumuyɛyɛlɛ nee ɛtanelilɛ nwo amaneɛbɔlɛ dɔɔnwo.

  • Bie a ɔwɔ kɛ ɛdi wɔ abusua ne anu ngyegyelɛ bie anwo gyima.

  • Kpolerazulɛ biala ɛnle nwolɛ kɛ, ɛlɛ wɔ sinlidɔlɛ mɔɔ ɔwɔ kɛ ɛdi nwolɛ gyima a.

  • Bie a ɛ gɔnwo bie ɛha edwɛkɛ anzɛɛ ɛyɛ debie ɛmaa yeyɛ wɔ nyane.

Kɛ anrɛɛ ɛbabu ɛ nye wɔagua ngyegyelɛ ɛhye mɔ azo anzɛɛ ɛbadwenle nwo dedee la, bɔ mɔdenle die to nu. Saa ɛdie ɛto nu a ɔbade adwenle ɛtane mɔɔ ɛlɛ wɔ nwo la azo na yeamaa wɔanyia ninyɛne mɔɔ sisi ɛbɛlabɔlɛ nu la anwo adwenle kpalɛ mɔɔ ɛ rɛle ɛmbɔ a.

Ɛbahola wɔagyinla ɛbɛlabɔlɛ nu ngyegyelɛ mɔɔ le kɛ ahumu la anloa. Nyia anwodozo kɛ wɔ mekɛ kpalɛ nu ewia ne bavinde bieko

 Mɔɔ ɛbahola wɔayɛ la

  • Die wɔ sinlidɔlɛ to nu.

    Baebolo ne ka kɛ: “Nɔhalɛ, tenlenenli biala ɛnle azɛlɛ ye azo mɔɔ kpalɛ ngome ala a ɔyɛ na ɔnyɛ nvonleɛ ɛlɛ a.” (Nolobɔvo ne 7:20, Good News Translation) Ɔluakɛ ɛle sonla na ɛtɔ sinli la ati a ɛyɛ nvonleɛ a na yemɔ ɛngile kɛ ɛ nwo ɛngyia.

    Kɛzi ɛbalie wɔ tɛnlabelɛ wɔado nu la: Di wɔ sinlidɔlɛ ne mɔ anwo gyima, noko kakye kɛ ɛnli munli. Kpavolɛ bie mɔɔ bɛfɛlɛ ye Caleb la ka kɛ, “Menva me adwenle menzie me nvonleɛ ne mɔ azo somaa, emomu mebɔ mɔdenle kɛ mebazukoa debie meavi nu amaa meanwu ɛleka mɔɔ ɔwɔ kɛ mebɔ mɔdenle la.”

  • Mmafa ɛ nwo ɛtoto awie mɔ anwo.

    Baebolo ne ka kɛ: “Bɛmmamaa yɛmemaa yɛ nwo zo, yɛ nee yɛ gɔnwo mɔ su, na yɛ nye bolo bɛ.” (Galeehyeama 5:26) Saa ɛkɔnea gyimalilɛ ngakyile mɔɔ bɛando ɛsalɛ bɛanvɛlɛ wɔ la anwo nvoninli mɔɔ wɔ yintanɛte ne azo a, ɛbahola wɔava ɛya na ɛ sa nu ado. Ɔbahola yeamaa ɛ gɔnwo mɔ bɔbɔ arayɛ wɔ agbɔvolɛ.

    Kɛzi ɛbalie wɔ tɛnlabelɛ wɔado nu la: Die to nu kɛ bɛnrɛvɛlɛ wɔ wɔ ayia biala abo. Bieko, tɛ ninyɛne mɔɔ kɔ zo wɔ awie ɛbɛlabɔlɛ nu la amuala a ɛbanwu ye wɔ yintanɛte ne azo a. Kpavolɛ bie mɔɔ bɛfɛlɛ ye Alexis la ka kɛ: “Menli fa bɛ ɛbɛlabɔlɛ nu ninyɛne mgbalɛ ala a to yintanɛte ne azo a. Ninyɛne mɔɔ ɛnle mgbalɛ la ɛdeɛ, bɛnva bɛndo ɛkɛ.”

  • Kpondɛ anzodwolɛ​—titili wɔ wɔ abusua ne anu.

    Baebolo ne ka kɛ: “Saa ɔkɛyɛ boɛ a, nee menli kɔsɔɔti ɛdɛnla anzodwolɛ nu.” (Wulomuma 12:18) Ɛnlɛ tumi wɔ awie mɔ nyɛleɛ zo, noko wɔmɔ ɛlɛ wɔ nyɛleɛ zo tumi. Ɛbahola wɔakpa kɛ ɛ nee menli badɛnla anzodwolɛ nu.

    Kɛzi ɛbalie wɔ tɛnlabelɛ wɔado nu la: Bɔ mɔdenle kɛ ɛnrɛmaa ngyegyelɛ mɔɔ wɔ wɔ abusua ne anu la ɛnrɛyɛ kpole, emomu kpondɛ anzodwolɛ, kɛ mɔɔ anrɛɛ ɛ nee ɛ gɔnwo mɔ bayɛ la. Kakula bɛlɛra bie mɔɔ bɛfɛlɛ ye Melinda la ka kɛ: “Awie biala ɛnli munli, ɔti kɛ ɔde ye biala la yɛbatia anzɛɛ awie mɔ batia yɛ gyakɛ azo. Mɔɔ ɔwɔ kɛ yɛyɛ la a le kɛ yɛbazi kpɔkɛ wɔ mɔɔ yɛkulo kɛ yɛyɛ la anwo​—yɛbakpondɛ anzodwolɛ anzɛɛ yɛnrɛkpondɛ.”

  • Da anyezɔlɛ ali.

    Baebolo ne ka kɛ: “Bɛhile anyezɔlɛ.” (Kɔlɔsaema 3:15) Saa ɛda anyezɔlɛ ali a, ɔbamaa wɔaye wɔ adwenle wɔavi ninyɛne mɔɔ ɛngulo la azo na wɔava wɔazie ninyɛne mgbalɛ mɔɔ kɔ zo wɔ wɔ ɛbɛlabɔlɛ nu la azo.

    Kɛzi ɛbalie wɔ tɛnlabelɛ wɔado nu la: Die wɔ ngyegyelɛ ne mɔ to nu noko mmabu ɛ nye ɛgua ninyɛne mgbalɛ mɔɔ ɛlɛkɔ zo wɔ wɔ ɛbɛlabɔlɛ nu la azo. Bɛlɛra bie mɔɔ bɛfɛlɛ ye Rebecca la ka kɛ: “Kenle ko biala, mekɛlɛ debie kpalɛ ko wɔ me buluku nu. Mekulo kɛ mekakye kɛ, melɛ ngyegyelɛ ɛdeɛ noko melɛ ninyɛne mgbalɛ dɔɔnwo medwenledwenle nwo.”

  • Nea wɔ agɔnwolɛvalɛ boɛ.

    Baebolo ne ka kɛ: “Agɔnwolɛ ɛtane sɛkye ɛbɛla kpalɛ.” (1 Kɔlentema 15:33) Saa ɛ nee menli mɔɔ tendɛ tia debie biala, bɛle agolobɛnwo anzɛɛ fa ɛya la tu a, bɛ subane ɛtane ne banyia ɛ nwo zo tumi.

    Kɛzi ɛbalie wɔ tɛnlabelɛ wɔado nu la: Saa ɛ gɔnwo mɔ kɔ ngyegyelɛ nu a, bie a bɛbanyia adwenle ɛtane wɔ mekɛ ekyi anu. Boa bɛ, noko mmamaa bɛ ngyegyelɛ ne nyia ɛ nwo zo tumi somaa. Bɛlɛra bie mɔɔ bɛfɛlɛ ye Michelle la ka kɛ: “Ɔnle kɛ yɛ nee menli mɔɔ lɛ adwenle ɛtane la angomekye tu.”

 Kenga nwolɛ edwɛkɛ dɔɔnwo

Baebolo ne ka kɛ yɛde “mekɛ mɔɔ anu yɛ se la” anu. (2 Timote 3:1) Asoo ɔyɛ se ɔmaa wɔ kɛ ɛbanyia adwenle kpalɛ wɔ ewiade mɔɔ adwenle ɛtane ɛbu zo wɔ nu la anu ɔ? Kenga “Duzu Ati A Amaneɛnwunlɛ Ɛbu A?