Wulu kɔ nuhua edwɛkɛ ne azo

MGBAVOLƐ NEE MBƐLƐRA BIZA KƐ

Asoo Ɔwɔ Kɛ Yɛpɛ Zolɛ Ɔ? (Foa 1)

Asoo Ɔwɔ Kɛ Yɛpɛ Zolɛ Ɔ? (Foa 1)

Ɔyɛ na ɛpɛ agɔnwolɛvalɛ bie azo a ɔle nyilalɛ kpole. Suzu Jill anwubielɛ ne anwo nea. Ɔka kɛ, “Mɔlebɛbo ne, ɛnee ɔyɛ me fɛ kɛ ahenle mɔɔ ɔbagya me la dahuu kulo kɛ ɔnwu ɛleka mɔɔ mewɔ, debie mɔɔ melɛyɛ nee awie mɔɔ me nee ye lua la. Noko ɔdwule mekɛ ne bie la ɛnee mengola me nee awie biala ɛnvinde kyesɛ ɔdaye ala. Ɛnee ɔyɛ ye nyane bɔbɔ kɛ menyia mekɛ memaa me abusua ne anu amra la, titili me papa. Mekɛ mɔɔ me nee ye pɛle agɔnwolɛvalɛ ne azo la, ɔyɛle kɛ asɛɛ bɛzokoɛ adesoa ɛnlomboɛ bie mɔɔ mezo la!”

Sarah nyianle anwubielɛ ko ne ala bie. Ɔnwunle ye kɛ kpavolɛ bie mɔɔ bɛfɛlɛ ye John mɔɔ ɔ nee ye ɛlɛtu na yeagya ye la le agolobɛnwo, ye edwɛkɛ yɛ se yɛɛ ɔmbu debie. Sarah ka kɛ, “Kenle ko bie mɔɔ ɛnee yɛkulo kɛ yɛfinde la, ɔhale amozi too dɔnehwele nsa! Mɔɔ ɔrale na me mame bukele anlenkɛ ne maanle ye la, yeampili ye kɛ ɔle sonla bɔbɔ, na mɔɔ ɔhanle la a le kɛ: ‘Maa yɛhɔ na yɛha amozi’. Yeanga kɛ, ‘Meha amozi’ na emomu ‘Yɛha amozi.’ Anrɛɛ ɔwɔ kɛ ɔkpa kyɛlɛ anzɛɛ ɔkilehile deɛmɔti yeamba ndɛ la anu. Mɔɔ tɛla biala la, anrɛɛ ɔwɔ kɛ ɔkile ɛbulɛ ɔmaa me mame!”

Noko, ɔngile kɛ saa awie yɛ nvonleɛ ko biala a, ɔwɔ kɛ bɛpɛ agɔnwolɛvalɛ ne azo. (Edwɛndolɛ 130:3) Mekɛ mɔɔ Sarah nwunle ye kɛ John ɛmbu debie yɛɛ eza ɔle ye subane la, ɔ nee ye pɛle agɔnwolɛvalɛ ne anu.

Bie a ɛnee wɔ edwɛkɛ ne le kɛ Jill nee Sarah ɛdeɛ ne la yɛɛ wɔnwu ye kɛ ahenle mɔɔ ɛ nee ye ɛlɛtu la ɛnrɛyɛ yelɛ anzɛɛ kunli kpalɛ ɔ? Saa zɔhane a ɔde a, ɛnee mmabu ɛ nye ɛgua kɛzi ɛte nganeɛ la azo! Bie a ɔbayɛ se kɛ ɛbalie wɔado nu, noko ɔle kpalɛ kɛ bɛbapɛ agɔnwolɛvalɛ ne azo. Mrɛlɛbulɛ 22:3 ka kɛ: “Sonla mɔɔ anye gyi ɔ ti anwo la nwu munzule na ɔtwe ɔ nwo ɔfea.”

Nɔhalɛ nu, ɔbayɛ se kɛ bɛbapɛ agɔnwolɛvalɛ ne anu. Noko, agyalɛ ɛnle mekɛ ezinraa nu debie. Ɔle kpalɛ kɛ ɛbali nyane kɛkala tɛla kɛ ɛbali nyane wɔ wɔ ngoane mekɛ kɔsɔɔti anu!