Wulu kɔ nuhua edwɛkɛ ne azo

Asoo Ɛwu A Ɛnee Yewie?

Asoo Ɛwu A Ɛnee Yewie?

Baebolo ne bua kɛ

Baebolo ne ka kɛ: “Anyewɔzoamra ze kɛ bɛbawu, na mɔwuamra ɛnze ɛhwee.” (Nolobɔvo ne 9:5; Edwɛndolɛ 146:4) Ɛhye ati saa yɛwu a, yɛnle ɛkɛ ne bieko. Mowuamra ɛndwenle, bɛnyɛ debie anzɛɛ bɛnde nganeɛ biala.

“Ɛbazia wɔahɔ ndɛtɛlɛ nu”

Nyamenle hilele mɔɔ saa yɛwu a ɔto yɛ la anu wɔ mekɛ mɔɔ ɔ nee Adam, sonla mɔɔ limoa dendɛle la. Kɛmɔ Adam yɛle anzosesebɛ la ati, Nyamenle hanle hilele ye kɛ: “Ɛle ndɛtɛlɛ na ɛbazia wɔahɔ ndɛtɛlɛ nu.” (Mɔlebɛbo 3:19) Kolaa na Nyamenle ava “ndɛtɛlɛ” abɔ Adam la ɛnee ɔnle ɛleka biala. (Mɔlebɛbo 2:7) Zɔhane ala a mɔɔ Adam wule la, ɔziale ɔhɔle ndɛtɛlɛ nu na ɛnee ɔnle ɛkɛ ne bieko a.

Ɛnɛ noko saa awie wu a, ɔnle ɛkɛ ne bieko. Baebolo ne ka menli nee nane anwo edwɛkɛ kɛ: “Bɛ muala bɛvi ndɛtɛlɛ nu, yɛɛ bɛ muala bɛsia bɛkɔ ndɛtɛlɛ nu bieko.”​—Nolobɔvo ne 3:19, 20.

Ewule ɛmpɛ debie biala azo

Baebolo ne ta fa ewule toto nafelɛ nwo. (Edwɛndolɛ 13:3; Dwɔn 11:11-14; Gyima ne 7:60) Saa awie dafe botoo a, ɔnnwu mɔɔ kɔ zo a. Zɔhane ala a menli mɔɔ ɛwu la noko ɛnze ɛhwee a. Noko Baebolo ne kilehile kɛ Nyamenle bahola adunwue menli mɔɔ ɛwu la kɛ asɛɛ bɛlafele la na yeamaa bɛ ngoane bieko. (Dwobu 14:13-15) Wɔ menli mɔɔ Nyamenle badunwue bɛ la afoa nu ewule ɛnle bɛ awieleɛ.