Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Boni A Baebolo Ne Ka Ye Wɔ Nza Nwo A? Asoo Nza Ɛnlonlɛ Le Ɛtane Ɔ?

Boni A Baebolo Ne Ka Ye Wɔ Nza Nwo A? Asoo Nza Ɛnlonlɛ Le Ɛtane Ɔ?

Baebolo ne bua kɛ

Ɔnle ɛtane kɛ yɛbanlo nza ekyi. Baebolo ne ka kɛ nwanye le ahyɛlɛdeɛ mɔɔ vi Nyamenle ɛkɛ mɔɔ maa yɛ nye die wɔ ɛbɛlabɔlɛ nu a. (Edwɛndolɛ 104:14, 15; Nolobɔvo ne 3:13; 9:7) Baebolo ne eza maa yɛnwu ye kɛ nwanye le ayile.​—1 Timote 5:​23.

Mekɛ mɔɔ ɛnee Gyisɛse wɔ azɛlɛ ye azo la ɔnlonle nwanye. (Mateyu 26:29; Luku 7:​34) Wɔ Gyisɛse nwanwane gyima ko mɔɔ ɛlie duma la anu, ɔhakyile nzule nza ɔvale ɔboale atɔfolɛ bie mɔɔ ɛnee bɛlɛyɛ la.​—Dwɔn 2:​1-​10.

Esiane mɔɔ wɔ nzabolɛ nu la

Baebolo ne ɛnga nza nwo edwɛkɛ ɛtane noko ɔtendɛ ɔtia nzabolɛ. Yemɔti, saa Kilisienenli bie kulo kɛ ɔno nza a, ɔnle kɛ ɔno ɔbo. (1 Timote 3:8; Taetɛse 2:​2, 3) Baebolo ne maa yɛnwu deɛmɔti ɔnle kɛ yɛbo nza la.

  • Ɔmmaa yɛndwenle kpalɛ. (Mrɛlɛbulɛ 23:29-​35) Awie mɔɔ ɛbo nza la ɛnrɛhola ɛnrɛli Baebolo ne anu mɛla mɔɔ se “bɛva bɛ sonlabaka ne bɛmaa Nyamenle kɛ afɔlebɔlɛ mɔɔ de ngoane nu, nwolɛ te na ɔsɔ Nyamenle anye, ɛzonlenlɛ nwuanzanwuanza mɔɔ bɛdwenle nwolɛ la” azo.​—Wulomuma 12:1.

  • Nzabolɛ ɛmmaa yɛngola yɛngomo yɛ nwo zo yɛɛ ‘ɔsɛkye menli ndelebɛbo.’​—Hozia 4:11; Ɛfɛsɛsema 5:18.

  • Ɔbahola yeamaa awie ali ehyia anzɛɛ anyia ewule.​—Mrɛlɛbulɛ 23:21, 31, 32.

  • Nyamenle anye ɛnlie nzabolɛ nwo.​—Mrɛlɛbulɛ 23:20; Galeehyeama 5:19-21.

Boni a bahile kɛ awie ɛbo nza a?

Saa awie no nza na ɔfa ye ngoane anzɛɛ awie mɔ ɛdeɛ ɔto esiane nu a ɔkile kɛ yebo nza. Wɔ Baebolo ne anu saa bɛka kɛ awie ɛbo nza a ɔngile kɛ ahenle anye zo ɛbulu ye ala, emomu ɔkile awie mɔɔ nza ɛmmaa ɔnnwu mɔɔ ɔyɛ a, ye ɛdialɛ ɛyɛ basabasa, ɔdi mgbonde, anzɛɛ ye ɛdendɛlɛ ɛyɛ mgbane mgbane la. (Dwobu 12:25; Edwɛndolɛ 107:27; Mrɛlɛbulɛ 23:29, 30, 33) Bɛdabɛ mɔɔ bɛnno nza bɛmbo bɔbɔ la bahola amaa ‘nza dɔɔnwo ɛnlonlɛ . . . ahomo bɛ nwo zo’ na bɛayia ngyegyelɛ mɔɔ vi nu ba la bie.​—Luku 21:34, 35.

Twe ɛ nwo fi nwo bɔkɔɔ

Baebolo ne eza ka mekɛ mɔɔ ɔnle kɛ Kilisienenli bie no nza la anwo edwɛkɛ:

  • Saa ɔbagyegye awie mɔ a.​—Wulomuma 14:21.

  • Saa bɛnno nza wɔ maanle ne anu a.​—Wulomuma 13:1.

  • Saa awie ɛngola ɛngomo ɔ nwo zo wɔ nza nwo a. Ɔwɔ kɛ menli mɔɔ bo nza anzɛɛ nza ɛgya bɛ fi bɛ ɛhulolɛ nu yɛ nzenzaleɛ kpole.​—Mateyu 5:​29, 30.