Wulu kɔ nuhua edwɛkɛ ne azo

Nwane Anzɛɛ Duzu A Le Nyamenle Edwɛkɛ Ne?

Nwane Anzɛɛ Duzu A Le Nyamenle Edwɛkɛ Ne?

Baebolo ne bua kɛ

Fane dɔɔnwo ne ala, edwɛkɛkpɔkɛ “Nyamenle edwɛkɛ” kile nrɛlaleɛ mɔɔ vi Nyamenle ɛkɛ. (Luku 11:28) Ɔyɛ noko a, “Nyamenle Edwɛkɛ” anzɛɛ “Edwɛkɛ ne” le amodinli mɔɔ bɛfa bɛfɛlɛ awie.​—Yekile 19:13; Dwɔn 1:​14.

Nyamenle nrɛlaleɛ. Ngapezoma ne mɔ hanle ye fane dɔɔnwo kɛ nrɛlaleɛ mɔɔ bɛhanle la le edwɛkɛ mɔɔ vi Nyamenle ɛkɛ. Kɛ neazo la, Gyɛlɛmaya vale “Gyihova edwɛkɛ ne rale me ɛkɛ” a bɔle ye ngapezo edwɛkɛ ne mɔ abo a. (Gyɛlɛmaya 1:​4, 11, 13; 2:1, NW) Kolaa na ngapezonli Samoɛle aha kɛ Nyamenle ɛkpa Sɔɔlo kɛ belemgbunli la, Samoɛle hanle kɛ: “Kendɛ ekyii maa menga edwɛkɛ mɔɔ Nyamenle ɛha la mengile wɔ.”​—1 Samoɛle 9:​27.

Amodinli. Wɔ Baebolo ne anu, “Edwɛkɛ ne” le amodinli mɔɔ ɛnee bɛfa bɛfɛlɛ Gyisɛse Kelaese wɔ mekɛ mɔɔ ɛnee ɔle sunsum nu abɔdeɛ wɔ anwuma nee mekɛ mɔɔ ɔrale azɛlɛ ye azo kɛ sonla la. Suzu deɛmɔti yɛkola yɛka ye zɔ la bie mɔ anwo:

  • Ɛnee Edwɛkɛ ne wɔ ɛkɛ ne kolaa na bɛabɔ ninyɛne. “Mɔlebɛbo ne ɛnee Edwɛkɛ ne wɔ ɛkɛ . . . Ɛnee ɛhye nee Nyamenle wɔ ɛkɛ wɔ mɔlebɛbo ne.” (Dwɔn 1:​1, 2) Gyisɛse a le ‘abɔdeɛ muala anu belamunli ralɛ a . . . Ɔli ninyɛne mɔɔ ɛha la amuala anyunlu.’​—Kɔlɔsaema 1:​13-​15, 17.

  • Edwɛkɛ ne rale azɛlɛ ye azo kɛ dasanli la. “Edwɛkɛ ne rayɛle sonla na ɔ nee yɛ dɛnlanle.” (Dwɔn 1:​14) Kelaese Gyisɛse ‘yɛle ɔ nwo akɛlɛ na ɔrale kɛ sonla.’​—Felepaema 2:​5-7.

  • Edwɛkɛ ne a le Nyamenle Ara ne. Kɛ mɔɔ yɛha ye wɔ anwuma ɛkɛ la, mekɛ mɔɔ ɛzoanvolɛ Dwɔn hanle kɛ “Edwɛkɛ ne rayɛle sonla” wiele la, ɔdoale zo kɛ: “yɛnwunle ye anyunlunyia ne, kɛ anyunlunyia mɔɔ selɛ fa maa ɔ ra mɔɔ ɔwole ye kokye la.” (Dwɔn 1:​14) Dwɔn eza hɛlɛle kɛ: ‘Gyisɛse le Nyamenle Ara.’​—1 Dwɔn 4:​15.

  • Edwɛkɛ ne lɛ Nyamenle subane. “Edwɛkɛ ne le nyamenle.” (Dwɔn 1:1; An American Translation) Gyisɛse le “Nyamenle anyunlunyia ne mɔɔ ta la nee ye ɛsaso pɛpɛɛpɛ.”​—Hibuluma 1:​2, 3.

  • Edwɛkɛ ne le belemgbunli. Baebolo ne ka kɛ Nyamenle Edwɛkɛ ne bɔ “arelemgbunli abotile.” (Yekile 19:12, 13; ɔbodwɛkɛ) Eza bɛfɛlɛ Edwɛkɛ ne “arelemgbunli Belemgbunli yɛɛ awulae mɔ Awulae.” (Yekile 19:16) Bɛfɛlɛ Gyisɛse “arelemgbunli Belemgbunli nee awulae mɔ Awulae.”​—1 Timote 6:​14, 15.

  • Edwɛkɛ ne le Nyamenle kpɔmavolɛ. Amodinli “Edwɛkɛ ne” maa ɔda ali kɛ ɔdaye a Nyamenle dua ɔ nwo zo fa nrɛlaleɛ nee adehilelɛ maa a. Gyisɛse hanle kɛ: “Selɛ ne mɔɔ zoanle me la a ɛhile me mɔɔ ɔwɔ kɛ meka nee kɛzi ɔwɔ kɛ meka ye la a. . . . Yemɔti, debie biala mɔɔ Selɛ ne ɛha ɛhile me la yɛɛ meka a.”​—Dwɔn 12:49, 50.