Wulu kɔ nuhua edwɛkɛ ne azo

Duzu A Baebolo Ne Ka Ye Wɔ Ninyɛne Mɔɔ Bɛfa Bɛyɛ Bɛ Nyunlu Nee Agudeɛ Nwo A?

Duzu A Baebolo Ne Ka Ye Wɔ Ninyɛne Mɔɔ Bɛfa Bɛyɛ Bɛ Nyunlu Nee Agudeɛ Nwo A?

Baebolo ne bua kɛ

Baebolo ne ɛnga ninyɛne mɔɔ bɛfa bɛyɛ bɛ nyunlu, agudeɛ anzɛɛ ninyɛne gyɛne mɔɔ bɛfa bɛsiezie bɛ nwo la anwo edwɛkɛ dɔɔnwo ɛdeɛ noko, ɔndendɛ ɔntia bɛ. Noko, kɛ anrɛɛ Baebolo ne bahwe adwenle ahɔ nwonane nu anwoziezielɛ zo dɔɔnwo la, ɔka “koonwuyɛlɛ nee mɛlɛbɛnwoaze subane” nwo edwɛkɛ.​​—1 Pita 3:3, 4.

Ɔndendɛ ɔntia nwonane nu anwoziezielɛ

  • Mraalɛ nɔhavoma mɔɔ wɔ Baebolo ne anu la zieziele bɛ nwo. Relɛbɛka mɔɔ gyale Ebileham ara Ayezeke la vale bɛ bonyi nu nvutuke ngɛba, nvutuke ngɛba nee agudeɛ gyɛne mɔɔ bɛ awolɛ yɛ se mɔɔ ye ase vale hyɛle ye la zieziele ɔ nwo. (Mɔlebɛbo 24:22, 30, 53, NW) Zɔhane ala a, bɛvale ‘nwole bɛkpokpale’ Ɛseta bɛvale bɛzieziele ye bɛmaanle kenle bie nwolɛ adenle mɔɔ ɔbanyia ye kɛ belemgbunli raalɛ wɔ Pɛhyea Belemgbunlimaanle ne anu la a. (Ɛseta 2:7, 9, 12) Bie a bɛvale “ninyɛne mɔɔ bɛfa bɛyɛ bɛ nyunlu” la bɛbokale nwo.​—New International Version; Easy-to-Read Version.

  • Bɛva agudeɛ bɛyɛ ndonwo ngakyile wɔ Baebolo ne anu. Kɛ neazo la, bɛva awie mɔɔ tu folɛ kpalɛ la bɛtoto “ezukoa nvutuke kpɔdelera” nwo. (Mrɛlɛbulɛ 25:12) Zɔhane ala a, Nyamenle vale kɛzi ɔ nee Yizilayɛma lile la totole kunli bie mɔɔ ɛva avikpa, ndweabane nee asomadeɛ ɛziezie ye atɔfolɛ raalɛ la anwo a. Anwoziezielɛ ɛhye maanle Yizilayɛma “anwofɛlɛko ne lale zo.”​​—Yizikeɛle 16:11-13.

Ninyɛne mɔɔ bɛfa bɛyɛ bɛ nyunlu nee agudeɛ nwo adalɛ edwɛkɛ

Adalɛ Edwɛkɛ: Baebolo ne tendɛ tia “bɛ ti enrinli ɛyɛlɛ nee agudeɛ” wɔ 1 Pita 3:3.

Nɔhalɛ Edwɛkɛ: Saa yɛnea edwɛkɛ mɔɔ boka nwo la a, ɔmaa yɛnwu ye kɛ Baebolo ne ɛlɛka kɛzi ɔwɔ kɛ yɛmaa yɛ anwofɛlɛko ne mɔɔ vea yɛ nu la sonle bolɛ tɛla kɛzi yɛde wɔ ɛnyelɛzo la anwo edwɛkɛ. (1 Pita 3:3-6) Bɛyɛ ndotonwo zɛhae bie mɔ wɔ Baebolo ne ɛleka ngakyile.​​—1 Samoɛle 16:7; Mrɛlɛbulɛ 11:22; 31:30; 1 Timote 2:9, 10.

Adalɛ Edwɛkɛ: Belemgbunli Raalɛ atisesebɛ Gyɛzɛbɛle mɔɔ “dole ɔ nye anzi” la kile kɛ ninyɛne mɔɔ bɛfa bɛyɛ bɛ nyunlu la ɛnle kpalɛ.​​—2 Arelemgbunli 9:30.

Nɔhalɛ Edwɛkɛ: Bɛbuale Gyɛzɛbɛle mɔɔ ɔbɔle ayɛnebɛla na ɔle kodiawu la ndɛne ɔlua ye nyɛleɛ ɛtane ti na tɛ ye anwoziezielɛ ti ɔ.​​—2 Arelemgbunli 9:7, 22, 36, 37.