Wulu kɔ nuhua edwɛkɛ ne azo

Duzu A Menli Mɔɔ Anrɛɛ Bɛwu La Anwubielɛ Mɔɔ Bɛka La Ɛngile A?

Duzu A Menli Mɔɔ Anrɛɛ Bɛwu La Anwubielɛ Mɔɔ Bɛka La Ɛngile A?

Baebolo ne bua kɛ

Menli dɔɔnwo mɔɔ anrɛɛ bɛwu la se bɛkakye kɛ bɛvile bɛ sonlabaka ne anu anzɛɛ bɛnwunle wienyi kpole bie anzɛɛ ɛleka kɛnlɛma bie. Recollections of Death buluku ne ka kɛ: ‘Bie mɔ suzu kɛ ɔle nwolɛ adenle mɔɔ awie mɔ nyia amaa bɛanwu mɔɔ kɔ zo wɔ asetɛnla fofolɛ nu la.’ Ɔwɔ nuhua kɛ Baebolo ne ɛnga anwubielɛ ɛhye mɔ bie anwo edwɛkɛ ɛdeɛ, noko ɔka nɔhalɛ edwɛkɛ titili bie mɔɔ maa yɛnwu kɛ anwubielɛ ɛhye mɔ ɛngile kɛ Nyamenle maanle bɛnwunle mɔɔ kɔ zo wɔ ewule nzi la.

Mowuamra ɛnze ɛhwee.

Baebolo ne ka kɛ mowuamra “ɛnze ɛhwee.” (Nolobɔvo ne 9:5) Saa yɛwu a, yɛngɔ asetɛnla fofolɛ nu anzɛɛ yɛndwenle ninyɛne fofolɛ nwo, yɛndɛnla ngoane nu bieko. Menli mɔɔ kilehile kɛ yɛlɛ ɛkɛla mɔɔ ɛnwu ɛlɛ na saa yɛwu a ɔfi yɛ sonlabaka ne anu la edwɛkɛ ne ɛngyi Baebolo ne azo. (Yizikeɛle 18:4, NW) Ɛhye ati, debie biala mɔɔ menli mɔɔ anrɛɛ bɛwu kakye la ɛngile kɛ ninyɛne mɔɔ kɔ zo wɔ anwuma, hell anzɛɛ ewule nzi la a bɛnwunle ye a.

Duzu a Lazalɛse hanle wɔ mɔɔ si ewule nzi la anwo a?

Lazalɛse anwo edwɛkɛ mɔɔ wɔ Baebolo ne anu la maa yɛnwu tɛnlabelɛ mɔɔ awie wu a ɔkɔ nu la: Gyisɛse dwazole ye wɔ mekɛ mɔɔ ɛnee yewu yeli kenle nna la. (Dwɔn 11:38-44) Saa ɛnee Lazalɛse ɛlɛdie ɔ nye wɔ ye ewule ne anzi yɛɛ Gyisɛse dwazole ye rale azɛlɛ ye azo bieko a, anrɛɛ ɔbahile kɛ Gyisɛse ati yɛ se. Noko akee, Baebolo ne anga asetɛnla mɔɔ Lazalɛse hɔle nu wɔ ye ewule nzi la anwo edwɛkɛ biala. Saa Lazalɛse wule la ɔhɔle asetɛnla fofolɛ bie anu a, anrɛɛ ɔbaha. Noko Gyisɛse hanle Lazalɛse ewule ne anwo edwɛkɛ kɛ ɔle kɛ nafelɛ la, ɛhye kile kɛ mekɛ mɔɔ Lazalɛse wule la ɛnee ɔnze ɛhwee.​—Dwɔn 11:11-14.