Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Nyamenle Mɛla Bulu Ne A Le Boni?

Nyamenle Mɛla Bulu Ne A Le Boni?

Baebolo ne bua kɛ

Mɛla Bulu ne a le mɛla mɔɔ Nyamenle vale maanle tete Yizilayɛma la. Eza bɛfɛlɛ mɛla ɛhye mɔ Edwɛkɛ Bulu, ɔvi Hibulu edwɛkɛkpɔkɛ ʽaseʹreth had·deva·rim anu. Bɛva edwɛkɛ ɛhye bɛli gyima fane nsa wɔ Pentateuch (Torah), ne mɔɔ le Baebolo mbuluku nnu mɔɔ limoa la anu. (Adendulɛ 34:28; Mɛla ne 4:13; 10:4) Bɛhile edwɛkɛ ko ne ala abo wɔ Giliki nu kɛ deʹka (bulu) loʹgous (edwɛkɛ agbɔkɛ), yemɔti, bɛnyianle edwɛkpɔkɛ “Decalogue.”

Nyamenle hɛlɛle Mɛla Bulu ne wɔ awolɛ ndɛbandɛba nwiɔ azo na ɔvale ɔmaanle ye ngapezonli Mosisi wɔ Boka Saenae azo. (Adendulɛ 24:12-​18) Bɛyɛ Mɛla Bulu ne anwo kɛlɛtokɛ wɔ Adendulɛ 20:​1-​17 yɛɛ Mɛla ne 5:​6-​21.

 Mɛla Bulu Ne

  1. Sonle Gyihova Nyamenle angomekye.​—Adendulɛ 20:3.

  2. Mmayɛ ananze.​—Adendulɛ 20:​4-6.

  3. Mmabɔ Nyamenle ne duma mgbane mgbane.​—Adendulɛ 20:7.

  4. Sie Ɛnwomenlelielɛ Kenle ne.​—Adendulɛ 20:​8-​11.

  5. Di wɔ awovolɛ eni.​—Adendulɛ 20:12.

  6. Mmaku sonla.​—Adendulɛ 20:13.

  7. Mmafa awuvolɛ.​—Adendulɛ 20:14.

  8. Mmawua.​—Adendulɛ 20:15.

  9. Mmadi daselɛ adalɛ.​—Adendulɛ 20:16.

  10. Mmayɛ anyebolo.​—Adendulɛ 20:17.

 Duzu Ati A Asolo Kɛzi Awie Biala Hyehyɛ Mɛla Bulu Ne La Ɛ?

Baebolo ne amba mɛla ko biala nɔma. Yemɔti, menli lɛ adwenle ngakyile wɔ kɛzi bɛbahyehyɛ bɛ la anwo. Menli dɔɔnwo hyehyɛ mɛla ne kɛ mɔɔ ɔwɔ anwuma ɛke la. Noko bie mɔ hyehyɛ Mɛla Bulu ne wɔ adenle ngakyile zo. Ngakyile ta ba wɔ mɛla mɔɔ limoa, mɔɔ tɔ zo nwiɔ yɛɛ mɔɔ li awieleɛ la anu. *

 Mɛla Bulu Ne Bodane A Le Boni?

Mɛla Bulu ne boka Mosisi Mɛla ne anwo. Ɔboka Mɛla ngakyile mɔɔ bo 600 mɔɔ bɛvale bɛmaanle na ɔlua zo Nyamenle nee tete Yizilayɛma yɛle ngyekyeleɛ la anwo. (Adendulɛ 34:27) Nyamenle bɔle Yizilayɛma ɛwɔkɛ kɛ saa bɛdi Mosisi Mɛla ne azo a, ɔbawie bɛ boɛ. (Mɛla ne 28:​1-​14) Noko Mɛla ne bodane titili a le kɛ ɔsiezie Yizilayɛma yeamaa Mɛzaya ne anzɛɛ Kelaese ne ɛralɛ.​—Galeehyeama 3:24.

 Kilisienema Wɔ Mɛla Bulu Ne Abo Ɔ?

Kyɛkyɛ. Nyamenle vale ye Mɛla ne mɔɔ Mosisi Mɛla ne boka nwo la maanle tete Yizilayɛma titili. (Mɛla ne 5:2, 3; Edwɛndolɛ 147:19, 20) Kilisienema ɛnle Mosisi Mɛla ne abo, na Dwuuma bɔbɔ mɔɔ ɛrayɛ Kilisienema la, “bɛlie bɛ bɛvi Mɛla ne abo.” (Wulomuma 7:6) * Bɛvale “Kelaese mɛla ne” mɔɔ debie biala mɔɔ Gyisɛse hanle hilele ye ɛdoavolɛma kɛ bɛyɛ boka nwo la bɛziele Mosisi Mɛla ne agyakɛ anu.​—Galeehyeama 6:2; Mateyu 28:19, 20.

 Asoo Mɛla Bulu Ne Anwo Hyia Ɛnɛ?

Ɛhɛe. Ɔluakɛ Mɛla Bulu ne maa yɛnwu Nyamenle adwenle, yemɔti yɛsukoa a, ɔboa yɛ. (2 Timote 3:​16, 17) Mɛla Bulu ne gyi ngyinlazo kpalɛ bie mɔɔ ɛnrɛkpa nwo ɛlɛ la azo. (Edwɛndolɛ 111:​7, 8) Nɔhalɛ nu, mɛla ɛhye mɔ anu dɔɔnwo wɔ Baebolo ne foa mɔɔ menli dɔɔnwo fɛlɛ ye Ngyekyeleɛ Fofolɛ la anu.​—Nea “ Mɛla Bulu ne anu ngyinlazo bie mɔ mɔɔ wɔ Ngyekyeleɛ Fofolɛ ne anu la.”

Gyisɛse hilehilele kɛ Mosisi Mɛla ne amuala mɔɔ Mɛla Bulu ne boka nwo la gyi mɛla titili nwiɔ azo. Ɔhanle kɛ: “‘Fa wɔ ahonle muala nee wɔ ɛkɛla muala nee wɔ adwenle muala kulo Gyihova wɔ Nyamenle ne.’ Ɛhye a le mɛla kpole kpalɛ nee mɔɔ limoa a. Mɔɔ tɔ zo nwiɔ mɔɔ le kɛ ɔdaye la a le ɛhye: ‘Kulo ɛ gɔnwo kɛ ɛ nwo.’ Mɛla nwiɔ ɛhye mɔ azo a Mɛla ne amuala . . . gyi a.” (Mateyu 22:34-​40) Yemɔti Kilisienema ɛnle Mosisi Mɛla ne abo, noko bɛha bɛhile yɛ kɛ yɛhulo Nyamenle nee yɛ gɔnwo mɔ.​—Dwɔn 13:34; 1 Dwɔn 4:​20, 21.

  Mɛla Bulu Ne Anu Ngyinlazo Bie Mɔ Mɔɔ Wɔ Ngyekyeleɛ Fofolɛ Ne Anu La

Ngyinlazo

Ɛleka Mɔɔ Ɔwɔ Wɔ Ngyekyeleɛ Fofolɛ Ne Anu La

Sonle Gyihova Nyamenle angomekye

Yekile 22:​8, 9

Mmasonle ananze

1 Kɔlentema 10:14

Di Nyamenle duma ne eni

Mateyu 6:9

Sonle Nyamenle dahuu

Hibuluma 10:24, 25

Di wɔ awovolɛ eni

Ɛfɛsɛsema 6:​1, 2

Mmaku sonla

1 Dwɔn 3:​15

Mmafa awuvolɛ

Hibuluma 13:4

Mmawua

Ɛfɛsɛsema 4:​28

Mmadi daselɛ adalɛ

Ɛfɛsɛsema 4:​25

Mmayɛ anyebolo

Luku 12:15

^ ɛden. 23 Wɔ tete Dwuuma afoa nu, bɛbu ‘Adendulɛ tile 20 ngyɛnu 2 kɛ “edwɛkɛ” mɔɔ limoa, yɛɛ bɛfa ngyɛnu 3-6 bɛbɔ nu bɛyɛ ye edwɛkɛ ko, mɔɔ tɔ zo nwiɔ.’ (The Jewish Encyclopedia) Noko, Katelekema bu Adendulɛ tile 20, ngyɛnu 1-6 la kɛ mɛla ko. Yemɔti mɛla mɔɔ se mmabɔ Nyamenle duma ne mgbane mgbane la tɔ zo nwiɔ. Amaa mɛla ne dodo adwu bulu la, bɛkyɛ mɛla mɔɔ li awieleɛ mɔɔ se mmamaa ɛ nye bolo awie aye yɛɛ mmamaa ɛ nye bolo awie agyapadeɛ la anu nwiɔ.

^ ɛden. 27Wulomuma 7:7, bɛvale mɛla ne mɔɔ tɔ zo bulu la bɛyɛle “Mɛla” ne anwo ndonwo bɛhilele kɛ Mɛla Bulu ne boka Mosisi Mɛla ne anwo.