Wulu kɔ nuhua edwɛkɛ ne azo

Mekɛ Boni A Ewiade Ne Bara Awieleɛ A?

Mekɛ Boni A Ewiade Ne Bara Awieleɛ A?

Mualɛ mɔɔ Baebolo ne fa maa la

Amaa wɔanwu mekɛ mɔɔ ewiade ne bara ye awieleɛ la, ɔhyia kɛ ɛte kɛzi Baebolo ne fa edwɛkɛkpɔkɛ “ewiade” di gyima la abo. Fane dɔɔnwo ne ala, Giliki edwɛkɛkpɔkɛ koʹsmos, mɔɔ bɛta bɛkile ɔ bo “ewiade” la kile menli mɔɔ bɛwɔ ewiade, titili bɛdabɛ mɔɔ bɛnyɛ Nyamenle ɛhulolɛdeɛ la. (Dwɔn 15:18, 19; 2 Pita 2:5) Ɔdwu mekɛ ne bie noko a, koʹsmos kile ninyɛne mɔɔ wɔ ewiade, le kɛ gualilɛ, maanyɛlɛ nee ɛzonlenlɛ.​—1 Kɔlentema 7:31; 1 Dwɔn 2:15, 16. *

Duzu a le “ewiade awieleɛ ne”?

Bɛkola bɛkile ɛdendɛsinli “ewiade awieleɛ” mɔɔ finde Baebolo ngilebɛbo dɔɔnwo anu la abo bieko kɛ “mekɛ ɛhye awieleɛ,” anzɛɛ “mekɛ ne awieleɛ.” (Mateyu 24:3; English Standard Version) Ɔngile kɛ bɛsɛkye azɛlɛ ne anzɛɛ alesama amuala, emomu ninyɛne mɔɔ wɔ ewiade, le kɛ gualilɛ, maanyɛlɛ nee ɛzonlenlɛ la.​—1 Dwɔn 2:17.

Baebolo ne kilehile kɛ “bɛbaminli amumuyɛma abo zo” amaa kpalɛma anye alie wɔ azɛlɛ ne azo. (Edwɛndolɛ 37:9-11) Ɛzɛkyelɛ ɛhye bazi wɔ “anwongyelelɛ kpole” ne mɔɔ bara awieleɛ wɔ Amagɛdɔn konle ne anu la anu.​—Mateyu 24:21, 22; Yekile 16:14, 16.

Mekɛ boni a ewiade ne bara awieleɛ a?

Gyisɛse hanle kɛ: “Mɔɔ fale kenle zɔhane nee dɔnehwele ne anwo la ɛdeɛ, awie biala ɛnze, anwumabɔvolɛma mɔɔ bɛwɔ anwuma nee Ralɛ ne bɔbɔ ɛnze, kyesɛ Selɛ ne ala.” (Mateyu 24:36, 42) Ɔvale ɔbokale nwo kɛ, awieleɛ ne bara arɛlevilɛ nu, wɔ “mekɛ mɔɔ bɛ nye ɛnla la.”​—Mateyu 24:44.

Ɔwɔ nuhua kɛ yɛnze kenle kpɔtee nee dɔnehwele ne ɛdeɛ, noko Gyisɛse hanle “sɛkɛlɛneɛ” ngakyile anzɛɛ ninyɛne mɔɔ sisi a ɔbahile kɛ yɛwɔ awieleɛ mekɛ ne anu la anwo edwɛkɛ. (Mateyu 24:3, 7-14) Baebolo ne fɛlɛ mekɛ ɛhye kɛ “awieleɛ mekɛ ne” yɛɛ “mekɛ mɔɔ li awieleɛ.”​—Daneɛle 12:4; 3:1-5; 2 Timote 3:​1-5.

Bɛnrɛzɛkye ninyɛne bie mɔ wɔ ewiade awieleɛ ne nu ɔ?

Ɛhɛe. Bɛnrɛzɛkye azɛlɛ ne ɛlɛ, ɔluakɛ Baebolo ne ka kɛ ‘bɛnrɛhola ye kpusu’ anzɛɛ bɛnrɛye bɛnrɛvi ɔ bo zo ne ɛlɛ. (Edwɛndolɛ 104:5) Yɛɛ menli bayi azɛlɛ ne azo kɛ mɔɔ Baebolo ne ɛbɔ nwolɛ ɛwɔkɛ la: “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.” (Edwɛndolɛ 37:29) Nyamenle bamaa yɛanyia asetɛnla mɔɔ mɔlebɛbo ne ɛnee ɔkpondɛ kɛ yɛnyia la:

^ ɛden. 3 Bɛhile Giliki edwɛkɛkpɔkɛ ai·onʹ noko abo wɔ Baebolo ngilebɛbo bie mɔ anu kɛ “ewiade.” Saa bɛkile ɔ bo zɛhae a, ɔmaa mɔɔ ai·onʹ kile la sɔho koʹsmos mɔɔ kile ninyɛne mɔɔ wɔ ewiade, le kɛ gualilɛ, maanyɛlɛ nee ɛzonlenlɛ la.