Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Nwane Mɔ Anzɛɛ Duzu A Le Anwumabɔvolɛma?

Nwane Mɔ Anzɛɛ Duzu A Le Anwumabɔvolɛma?

Baebolo ne bua kɛ

Anwumabɔvolɛma le abɔdeɛ mɔɔ bɛlɛ anwosesebɛ nee tumi kpole bɛtɛla alesama a. (2 Pita 2:​11) Bɛwɔ anwuma anzɛɛ sunsum nu ɛleka mɔɔ kpogya tɛla anwomanyunlu mɔɔ yɛ nye nwu ye la. (1 Arelemgbunli 8:​27; Dwɔn 6:​38) Ɔti, eza bɛka kɛ bɛle sunsum.​—1 Arelemgbunli 22:21; Edwɛndolɛ 18:10.

Nienwu a anwumabɔvolɛma vi a?

Nyamenle luale Gyisɛse mɔɔ Baebolo ne fɛlɛ ye “abɔdeɛ muala anu belamunli ralɛ” la anwo zo a bɔle anwumabɔvolɛma ne a. Mɔɔ Baebolo ne kilehile kɛzi Nyamenle vale Gyisɛse lile gyima wɔ ninyɛne ɛbɔlɛ nu la, ɔhanle kɛ: ‘Bɛluale [Gyisɛse] anwo zo a bɛbɔle debie biala mɔɔ wɔ anwuma nee azɛlɛ ye azo a, ninyɛne mɔɔ bɛnwu bɛ nee ninyɛne mɔɔ bɛnnwu bɛ’ mɔɔ anwumabɔvolɛma boka nwo la. (Kɔlɔsaema 1:​13-17) Anwumabɔvolɛma ɛngya yɛɛ bɛnwo mralɛ. (Maake 12:25) Emomu, bɛbɔle bɛ kɛ “Nyamenle amra.”​—Dwobu 1:6.

Bɛbɔle anwumabɔvolɛma kolaa na bɛabɔ azɛlɛ ne. Mɔɔ Nyamenle bɔle azɛlɛ ne la, anwumabɔvolɛma “vale fɛlɛkolilɛ deɛdeanle nu.”​—Dwobu 38:4-7.

Anwumabɔvolɛma nyɛ a wɔ ɛkɛ a?

Baebolo ne ɛnga bɛ dodo, noko ɔka kɛ bɛ nwo zonle kpalɛ. Kɛ neazo la, ɛzoanvolɛ Dwɔn nwunle anwumabɔvolɛ apenle bulu bulu fane apenle bulu bulu wɔ ɛnyelɛzodeɛnwunlɛ nu.​—Yekile 5:11, ɔbodwɛkɛ.

Asoo anwumabɔvolɛma lɛ aluma nee subane ne?

Ɛhɛe. Baebolo ne bɔ bɛ nuhua nwiɔ aluma: Maekeɛle nee Geebeleɛle. (Daneɛle 12:1; Luku 1:26) * Anwumabɔvolɛma gyɛne liele dole nu kɛ bɛlɛ aluma noko bɛanla ye ali.​—Mɔlebɛbo 32:29; Maanlebuvolɛma 13:17, 18.

Asolo kɛzi anwumabɔvolɛ biala de a. Bɛkola bɛ nee bɛ nwo di adwelie. (1 Kɔlentema 13:1) Bɛkola bɛdwenle yɛɛ bɛkola bɛhyehyɛ edwɛne bɛye Nyamenle ayɛlɛ. (Luku 2:13, 14) Bɛlɛ fanwodi bɛsi kpalɛ nee ɛtane nwo kpɔkɛ. Yɛnwu ɛhye wɔ mekɛ mɔɔ bie mɔ bokale Seetan anwo bɛdele Nyamenle anwo atua la.​—Mateyu 25:41; 2 Pita 2:4.

Asoo anwumabɔvolɛ ne mɔ lɛ dibilɛ ɔ?

Ɛhɛe. Anwumabɔvolɛ mɔɔ lɛ tumi kpole kpalɛ la a le anwumabɔvolɛ kpanyinli Maekeɛle. (Dwuudu 9; Yekile 12:7) Sɛlafen ne mɔ le anwumabɔvolɛma mɔɔ bɛlɛ tumi na bɛgyigyi Gyihova ebia ne anwo. (Ayezaya 6:2, 6) Kyɛlɔbem ne mɔ noko le anwumabɔvolɛma mɔɔ bɛlɛ dibilɛ na bɛyɛ gyima titili a. Kɛ neazo la, kyɛlɔbem bie mɔ bɔle Yidɛn tola ne anuhɔlɛ ne anwo bane wɔ mekɛ mɔɔ bɛvoanle Adam nee Yive la.​—Mɔlebɛbo 3:23, 24.

Anwumabɔvolɛma boa menli ɔ?

Ɛhɛe, ɛnɛ Nyamenle maa ye anwumabɔvolɛ nɔhavoma boa ye menli.

  • Nyamenle dua anwumabɔvolɛma anwo zo ɔkile ye azonvolɛ adenle wɔ Nyamenle Belemgbunlililɛ ne anwo edwɛkɛhanlɛ gyima ne anu. (Yekile 14:6, 7) Menli mɔɔ ka edwɛkpa ne nee bɛdabɛ mɔɔ bɛtie la nyia adehilelɛ ɛhye azo nvasoɛ.​—Gyima ne 8:26, 27.

  • Anwumabɔvolɛma bɔ Kilisiene asafo ne anwo bane fi ɛtanevolɛma ngehanleɛ nwo.​—Mateyu 13:49.

  • Anwumabɔvolɛma kile Nyamenle nɔhalɛ azonvolɛ adenle na bɛbɔ bɛ nwo bane.​—Edwɛndolɛ 34:7; 91:10, 11; Hibuluma 1:7, 14.

  • Ɔnrɛhyɛ anwumabɔvolɛma nee Gyisɛse Kelaese baye ninyɛndane avi ɛkɛ na bɛamaa alesama anwo adɔ bɛ.​—2 Tɛsalonaekama 1:6-8.

Asoo yɛ nuhua ko biala lɛ anwumabɔvolɛ mɔɔ bɔ ɔ nwo bane?

Ɔwɔ nuhua kɛ anwumabɔvolɛma bɔ Nyamenle azonvolɛ anwo bane wɔ sunsum nu ɛdeɛ, noko ɛhye ɛngile kɛ Nyamenle maa Kilisienenli ko biala anwumabɔvolɛ kɛ ɔbɔ ɔ nwo bane. * (Mateyu 18:10) Anwumabɔvolɛma ɛmbɔ Nyamenle azonvolɛ nwo bane ɛnvi sɔnea anzɛɛ ɛkpɔlɛ biala anwo. Babolo ne maa ɔda ali kɛ ɔdwu mekɛ ne bie a Nyamenle ‘maa adenle da’ sɔnea ne anwo ɔlua nrɛlɛbɛ nee anwosesebɛ mɔɔ ɔbava yeamaa ahenle yeamaa yeagyinla la azo.​—1 Kɔlentema 10:12, 13; Gyemise 1:2-5.

Anwumabɔvolɛma anwo adalɛ edwɛkɛ

Adalɛ edwɛkɛ: Anwumabɔvolɛ biala le kpalɛ.

Nɔhalɛ edwɛkɛ: Baebolo ne ka “sunsum ɛtane ɛlɔne” yɛɛ “anwumabɔvolɛma mɔɔ yɛle ɛtane la” anwo edwɛkɛ. (Ɛfɛsɛsema 6:12; 2 Pita 2:4) Anwumabɔvolɛ atisesebɛma ɛhye mɔ le sunsum ɛtane mɔɔ hɔbokale Seetan anwo na bɛdwazole bɛtiale Nyamenle a.

Adalɛ edwɛkɛ: Anwumabɔvolɛma badɛnla aze dahuu.

Nɔhalɛ edwɛkɛ: Bɛbazɛkye anwumabɔvolɛ atisesebɛma mɔɔ Seetan boka anwo la.​—Dwuudu 6.

Adalɛ edwɛkɛ: Saa awie wu a ɔkakyi anwumabɔvolɛ.

Nɔhalɛ edwɛkɛ: Nyamenle bɔle anwumabɔvolɛma, bɛnle menli mɔɔ bɛwu bɛdwazo. (Kɔlɔsaema 1:16) Nyamenle fa dahuu ngoane ahyɛlɛdeɛ ne maa menli mɔɔ bɛdwazo bɛ bɛkɔ anwuma la. (1 Kɔlentema 15:53, 54) Bɛbanyia gyinlabelɛ mɔɔ kpogya tɛla anwumabɔvolɛma ɛdeɛ ne la.​—1 Kɔlentema 6:3.

Adalɛ edwɛkɛ: Bɛbɔle anwumabɔvolɛma kɛ bɛzonle alesama.

Nɔhalɛ edwɛkɛ: Anwumabɔvolɛma tie Nyamenle, na tɛ menli. (Edwɛndolɛ 103:20, 21) Gyisɛse bɔbɔ liele dole nu kɛ ɔbakpondɛ moalɛ yeavi Nyamenle ɛkɛ na tɛ anwumabɔvolɛma ɛkɛ.​—Mateyu 26:53.

Adalɛ edwɛkɛ: Yɛbahola yɛazɛlɛ anwumabɔvolɛma kɛ bɛboa yɛ.

Nɔhalɛ edwɛkɛ: Asɔne mɔɔ yɛyɛ yɛamaa Nyamenle la le yɛ ɛzonlenlɛ ne foa mɔɔ le Gyihova Nyamenle ɛdeɛ. (Yekile 19:10) Ɔwɔ kɛ yɛdua Gyisɛse anwo zo yɛsɛlɛ Nyamenle angomekye.​—Dwɔn 14:6.

^ ɛden. 10 Baebolo ngilebɛbo bie mɔ fa edwɛkɛkpɔkɛ “Lucifer” di gyima wɔ Ayezaya 14:12. Menli bie mɔ die to nu kɛ ɔle duma mɔɔ ɛnee bɛfa bɛfɛlɛ anwumabɔvolɛ ne mɔɔ nzinlii ɔrayɛle Seetan Abɔnsam la. Noko, Hibulu edwɛkɛkpɔkɛ mɔɔ bɛvale bɛlile gyima wɔ ɛke la kile “Alehyenlɛ Ɛwɔlɔra.” Mɔɔ ɛnee bɛlɛka nwolɛ edwɛkɛ la maa ɔda ali kɛ ɔfale Babelɔn arelemgbunli anzɛɛ abusua ebialilɛ mɔɔ Nyamenle babɛlɛ ye aze ɔlua bɛ anwomemaazo ti la anwo na tɛ Seetan ɔ. (Ayezaya 14:4, 13-20) Bɛvale edwɛkɛkpɔkɛ “Alehyenlɛ Ɛwɔlɔra” bɛgolole Babelɔn ebialilɛ ne anwo wɔ mekɛ mɔɔ bɛdule ye bɛguale la.

^ ɛden. 21 Bie mɔ te Pita mɔɔ bɛyele ye bɛvile efiade la abo kɛ ɔkile kɛ ɛnee Pita lɛ anwumabɔvolɛ mɔɔ bɔ ɔ nwo bane a. (Gyima ne 12:6-16) Noko bie a mekɛ mɔɔ ɛdoavolɛma ne hanle kɛ “[Pita] anwumabɔvolɛ” la, ɛnee bɛdwenle kɛ anwumabɔvolɛ mɔɔ ɛragyinla Pita agyakɛ anu la a ɛra bɛ ɛkɛ ne a, na tɛ Pita mumua ne ɔ.