Wulu kɔ nuhua edwɛkɛ ne azo

Duzu A Baebolo Ne Ka Ye Wɔ Daenasɔɔ Anwo A?

Duzu A Baebolo Ne Ka Ye Wɔ Daenasɔɔ Anwo A?

Baebolo ne bua kɛ

Baebolo ne ɛnga Dinosaur anzɛɛ Daenasɔɔ anwo edwɛkɛ fɔɔnwo. Noko, ɔka kɛ Nyamenle a ‘bɔle ninyɛne kɔsɔɔti’ a, yemɔti Daenasɔɔ boka ninyɛne mɔɔ ɔbɔle la anwo. * (Yekile 4:​11) Baebolo ne ɛmbɔ Daenasɔɔ duma noko ɔka abɔdeɛ ekpunli bie mɔ mɔɔ bie a Daenasɔɔ wɔ nu la anwo edwɛkɛ:

Asoo daenasɔɔ vi nane gyɛne nu a rale a?

Azetuduvoma neɛnleanu ɛngile kɛ daenasɔɔ ne mɔ hakyile vile nane gyɛne anu, kɛ bɛbɔle bɛ ala ɛne. Ɛhye nee mɔɔ Baebolo ne ka kɛ Nyamenle bɔle nane kɔsɔɔti la yia. Kɛ neazo la, Edwɛndolɛ 146:6 ka Nyamenle anwo edwɛkɛ kɛ “mɔɔ ɔbɔle anwuma nee aze, nyevile nee mɔɔ wɔ nu la amuala la.”

Daenasɔɔ ne mɔ dɛnlanle ɛkɛ wɔ mekɛ boni anu?

Baebolo ne ka kɛ bɛbɔle nzule nu nee file zo abɔdeɛ ne mɔ wɔ kenle nnu nee nsia ne azo. * (Mɔlebɛbo 1:​20-​25, 31) Yemɔti Baebolo ne maa yɛnwu kɛ daenasɔɔ ne mɔ dɛnlanle ɛkɛ ne mekɛ tendenle kpalɛ.

Asoo Behemɔto nee Lɛviatan le daenasɔɔ ɔ?

Kyɛkyɛ. Ɔwɔ nu kɛ yɛnrɛhola yɛnrɛha nane ɛhye mɔ mɔɔ bɛha bɛ nwo edwɛkɛ wɔ Dwobu buluku ne anu la anwo edwɛkɛ fɔɔnwo ɛdeɛ, noko bɛkile kɛ Behemɔto a le koliadunli yɛɛ Lɛviatan a le ɛlɛnrɛne. Ɛhye nee kɛzi bɛha bɛ nwo edwɛkɛ wɔ Ngɛlɛlera ne anu la le ko. (Dwobu 40:15-​23; 41:​1, 14-​17, 31) Edwɛkɛagbɔkɛ “Behemɔto” nee “Lɛviatan” nee daenasɔɔ ɛnle ko wɔ adenle biala azo. Nyamenle hanle hilele Dwobu kɛ ɔnlea nane ɛhye mɔ, noko mɔɔ Dwobu de aze la, ɛnee daenasɔɔ ne mɔ ɛwu dɛbadɛba.​—Dwobu 40:16; 41:8.

Duzu a dole daenasɔɔ ne mɔ a?

Baebolo ne ɛnga kɛzi ɔyɛle mɔɔ daenasɔɔ ne mɔ minlinle la anwo edwɛkɛ. Noko ɔka kɛ Nyamenle “ɛhulolɛ zo a” ɔbɔle debie biala a, ɔti Nyamenle lɛ bodane mɔɔ ɔti ɔbɔle Daenasɔɔ ne mɔ a. (Yekile 4:​11) Mɔɔ daenasɔɔ ne mɔ lile bodane zɔhane anwo gyima wiele la, Nyamenle maanle adenle maanle bɛminlinle.

^ ɛden. 3 Ninyɛne mɔɔ azetuduvoma ɛnwu ye la ɛmaa yela ali kɛ mekɛ bie ɛnee Daenasɔɔ wɔ ɛkɛ. Nɔhalɛ nu, neɛnleanu ne ɛmaa yela ali kɛ ɛnee asolo kɛzi Daenasɔɔ ne mɔ de yɛɛ asolo bɛ mgbole.

^ ɛden. 10 Wɔ Baebolo ne anu, bɛkola bɛfa edwɛkɛkpɔkɛ “kenle” bɛka ɛvolɛ apenle dɔɔnwo anwo edwɛkɛ.​—Mɔlebɛbo 1:​31; 2:​1-4; Hibuluma 4:​4, 11.