Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Asoo Baebolo Ne Tendɛ Tia Nla?

Asoo Baebolo Ne Tendɛ Tia Nla?

Baebolo ne bua kɛ

Baebolo ne ɛndendɛ ɛntia nla, ɔka kɛ ɔle ahyɛlɛdeɛ mɔɔ Nyamenle ɛva ɛmaa agyalɛma a. Ɔbɔle “nrenya nee raalɛ” na ɔnwunle kɛ mɔɔ yeyɛ la le “kpalɛ kpole.” (Mɔlebɛbo 1:27, 31) Mekɛ mɔɔ ɔvale nrenyia nee raalɛ mɔɔ limoa ɔbɔle nu kɛ agyalɛma la, ɔhanle kɛ “bɛ mu nwiɔ bɛbɔ nu bɛyɛ nwonane ko.” (Mɔlebɛbo 2:24) Ɛnee nla nu ngitanwolilɛ nee bɛ nganeɛdelɛ mɔɔ bɛdi nwolɛ gyima la boka koyɛlɛ ɛhye anwo.

Baebolo ne ka anyelielɛ mɔɔ kunlima banyia wɔ agyalɛ nu la anwo edwɛkɛ kɛ: “Maa ɛ nye ɛlie ɛ ye mɔɔ ɛkɛgya ye wɔ mgbavolɛ nu la anwo, . . . Maa ɛ nye ɛlie ye anwofɛlɛko ne anwo mekɛ biala, na maa ye ɛhulolɛ ne ɛli ɛ ti.” (Mrɛlɛbulɛ 5:18, 19) Eza Nyamenle kulo kɛ yelɛma anye die wɔ nla nu. Baebolo ne ka kɛ: “Wɔ nla nu, ɔwɔ kɛ nrenya biala yɛ mɔɔ fɛta kɛ kunli yɛ la maa ɔ ye, na yelɛ noko yɛ zɔhane ala maa ɔ hu.”​—1 Kɔlentema 7:3.

Nla lɛ ye ɛweɛne

Nyamenle kulo kɛ agyalɛma ala a nyia nla nu ngitanwolilɛ a. Hibuluma 13:4 ka kɛ: “Ɔwɔ kɛ bɛbu agyalɛ bie kpalɛ kpalɛ, na kunli nee yelɛ di nɔhalɛ maa bɛ nwo. Nyamenle badea bɛdabɛ mɔɔ bɛle adwɔmane nee bɛdabɛ mɔɔ bɛkɛdo awuvolɛvalɛ mɛla ne la.” Ɔwɔ kɛ agyalɛma di nɔhalɛ maa bɛ nwo. Saa bɛ nye balie kpalɛ a, ɔngyi angomedi atiakunluwɔzo mɔɔ bɛbanyia la azo, emomu ɔgyi Baebolo ngyinlazo ɛhye azo: ‘Anyelielɛ dɔɔnwo wɔ ɛmanlɛ nu tɛla ɛlielɛ.’​—Gyima ne 20:35.