Wulu kɔ nuhua edwɛkɛ ne azo

Duzu A Baebolo Ne Ka Wɔ Menli Mɔɔ Bɛ Awodeɛ Le Ko La Nla Nwo A?

Duzu A Baebolo Ne Ka Wɔ Menli Mɔɔ Bɛ Awodeɛ Le Ko La Nla Nwo A?

Baebolo ne bua kɛ

Nyamenle bɔle nla maanle nrenyia nee raalɛ mɔɔ bɛgya la ala. (Mɔlebɛbo 1:27, 28; Sɛlɛvolɛma 18:22; Mrɛlɛbulɛ 5:18, 19) Baebolo ne ɛmmaa adenle kɛ menli nwiɔ mɔɔ bɛ awodeɛ le ko la bɛala yɛɛ ɔmmaa adenle kɛ awie nee mrenyia anzɛɛ mraalɛ dɔɔnwo bɛala. (1 Kɔlentema 6:18) Eza ɔmmaa nyɛleɛ le kɛ awie awodeɛ mɔɔ bɛmiemia, bɛ nwo mɔɔ bɛfa ye bɛ nzi anzɛɛ bɛ nloa nu la anwo adenle.

Baebolo ne ɛnlie menli mɔɔ bɛ awodeɛ le ko la nla ɛndo nu ɛdeɛ, noko ɔnga kɛ ɔwɔ kɛ yɛkpɔ menli ɛhye mɔ anzɛɛ yɛku bɛ. Emomu, ɔtu Kilisienema folɛ kɛ “bɛli menli kɔsɔɔti eni.”​—1 Pita 2:17.

Asoo bɛfa menli mɔɔ bɛ nye die awodeɛ ko nla nwo la subane bɛwo bɛ ɔ?

Baebolo ne ɛnga ye fɔɔnwo kɛ bɛfa menli mɔɔ bɛ nye die awodeɛ ko nla nwo la subane ne bɛwo bɛ, noko ɔka kɛ bɛwole yɛ muala ɛtane nu ɔti ɔyɛ se kɛ yɛbali Nyamenle mɛla zo. (Wulomuma 7:21-25) Baebolo ne ɛnga debie mɔɔ maa awie nyia nganeɛdelɛ ɛhye la anwo edwɛkɛ dɔɔnwo, noko ɔtua awodeɛ ko nla.

Kɛ ɔkɛyɛ na awie mɔɔ nyia nganeɛdelɛ ɛhye bie la azɔ Nyamenle anye ɛ?

Baebolo ne ka kɛ: “Ɔwɔ kɛ bɛku nwonane nu atiakunluwɔzo ne mɔ mɔɔ wɔ bɛ nu, mɔɔ le kɛ adwɔmane” la. (Kɔlɔsaema 3:5) Amaa wɔahu atiakunluwɔzo ɛtane mɔɔ bamaa wɔabɔ ɛbɛlatane la, ɔhyia kɛ ɛnea ninyɛne mɔɔ ɛdwenle nwo la boɛ. Saa yɛta yɛfa ninyɛne mɔɔ anwo te la yɛsie yɛ adwenle nu a, ɔbamaa yɛaye atiakunluwɔzo ɛtane mɔɔ ɔbara yɛ adwenle nu la yɛavi ɛkɛ ndɛndɛ. (Felepaema 4:8; Gyemise 1:14, 15) Bie a mɔlebɛbo ne ɔbayɛ se, noko ɔbayɛ boɛ. Nyamenle ɛbɔ ɛwɔkɛ kɛ ɔbaboa wɔ yeamaa wɔanyia “subane fofolɛ.”​—Ɛfɛsɛsema 4:22-24.

Menli mgbe dɔɔnwo mɔɔ kulo mrenyia anzɛɛ mraalɛ dɔɔnwo la ɛlɛbɔ mɔdenle ko ne ala amaa bɛahola bɛava Baebolo ngyinlazo bɛabɔ bɛ ɛbɛla. Kɛ neazo la, bɛdabɛ mɔɔ bɛtɛgyale anzɛɛ bɛgya noko bɛ ye anzɛɛ bɛ hu mɔ ɛmmaa bɛ nye ɛnlie wɔ nla nu la amuala ɛkpa kɛ bɛbali bɛ nla nwo atiakunluwɔzo ne azo ɔnva nwo sɔnea biala mɔɔ bɛbayia la. Bɛ nye die wɔ ɛbɛlabɔlɛ nu, na zɔhane ala ɔwɔ kɛ menli mɔɔ nyia nla nwo atiakunluwɔzo maa bɛdabɛ mɔɔ bɛ nee bɛ awodeɛ le ko la yɛ a saa bɛkulo kɛ bɛsɔ Nyamenle anye a.​—Mɛla ne 30:19.