Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Asoo Baebolo Ne Kilehile Kɛ Azɛlɛ Ne Le Tɛtɛlɛ Ɔ?

Asoo Baebolo Ne Kilehile Kɛ Azɛlɛ Ne Le Tɛtɛlɛ Ɔ?

Baebolo ne bua kɛ

Kyɛkyɛ, Baebolo ne ɛngilehile kɛ azɛlɛ ne le tɛtɛlɛ. * Baebolo ne ɛnle abɔdeɛ nwo nrɛlɛbɛ buluku. Mekɛ ko ne ala, edwɛkɛ mɔɔ wɔ Baebolo ne anu la ɛngo ɛntia neɛnleanu mɔɔ abɔdeɛ nwo nrɛlɛbɛvolɛma ɛyɛ la. Bɛkola bɛfa bɛ nwo bɛto mɔɔ Baebolo ne ka la azo “mekɛ biala, ɛnɛ nee dahuu.”​​—Edwɛndolɛ 111:8, New World Translation.

 Duzu a “azɛlɛ muleɛ nna ne” mɔɔ wɔ Baebolo ne anu la kile a?

Edwɛkɛ agbɔkɛ “azɛlɛ ye muleɛ nna” yɛɛ “azɛlɛ ti nee ɔ bo” mɔɔ bɛva bɛli gyima wɔ Baebolo ne anu la ɛngile kɛ azɛlɛ ne lɛ ɔ nloa. (Ayezaya 11:12; Dwobu 28:24) Emomu, ɔda ali kɛ ɛhye mɔ le adwenle nu nvoninli mɔɔ kile azɛlɛ ne ɛleka biala a. Luku 13:29 vale “aduduleɛ nee adɔleɛ yɛɛ sɔlɔ nee nyiakɛ” lile gyima wɔ adenle ko ne ala azo.

Ɔzɔho kɛ Hibulu edwɛkɛkpɔkɛ mɔɔ bɛhile ɔ bo “muleɛ nna” anzɛɛ “azɛlɛ ti nee ɔ bo” la le ɛdendɛdenle mɔɔ bɛnyianle bɛvile edwɛkɛkpɔkɛ mɔɔ bɛhile ɔ bo “ndɛbalɛ” anu a. The International Standard Bible Encyclopedia ne ka kɛ, “kɛmɔ aloma tɛlɛ ɔ ndɛba ne anu keda ɔ mra nwo zo la, zɔhane ala a [Hibulu edwɛkɛkpɔkɛ ɛhye] kile debie biala mɔɔ bɛtɛlɛ nu a ɔyɛ boɛ na ɔlɛ ye ɛweɛne la.” Neɛnleanu buluku ko ne ala hanle kɛ “edwɛkɛkpɔkɛ mɔɔ bɛvale bɛlile gyima la kile ɛnwea nloa, ɛweɛne anzɛɛ azɛlɛ ne anloa” kɛ mɔɔ ɔwɔ Dwobu 28:24 nee Ayezaya 11:12 la. *

 Na Gyisɛse mɔɔ Abɔnsam zɔle ye nleanle la noko ɛ?

Amaa yeazɔ Gyisɛse yeanlea la, “Abɔnsam vale ye hɔle boka tendenle bie azo na ɔhilele ye ewiade arelemgbunlililɛ kɔsɔɔti nee nuhua anyunlunyia.” (Mateyu 4:8) Bie mɔ kilehile kɛ edwɛkɛ ɛhye mɔɔ wɔ Baebolo ne anu la kile kɛ awie bahola agyinla azɛlɛ ne ɛleka bie mɔɔ le tɛtɛlɛ la na yeanwu ewiade ne amuala. Noko akee, ɔzɔho kɛ “boka tendenle” mɔɔ wɔ edwɛkɛ ɛhye anu la le ɛrɛlɛdendɛ na tɛ boka kpalɛ ɔ. Suzu deɛmɔti ndelebɛbo wɔ edwɛkɛ ɛhye anu la anwo.

  • Boka biala ɛnle azɛlɛ ye ɛleka biala mɔɔ awie gyinla zo a ɔbanwu arelemgbunlililɛ mɔɔ wɔ ewiade ye la amuala a.

  • Abɔnsam anva belemgbunlililɛ ne angomekye angile Gyisɛse, emomu “nuhua anyunlunyia” ne noko. Awie ɛnrɛhola ɛnrɛgyinla ɛleka bie na ɔnrɛnwu ninyɛne ɛhye mɔ, ɔti ɔzɔho kɛ Abɔnsam yele ninyɛne ɛhye mɔ hilele Gyisɛse wɔ ɛnyelɛzodeɛnwunlɛ nu. Yɛbahola yɛava ɛhye yɛado adenle mɔɔ awie dua zo fa projector ye azɛlɛ ne afoa ngakyile bie anwo nvoninli kile awie wɔ screen zo la anwo.

  • Edwɛkɛ mɔɔ nee ɛhye le ko mɔɔ ɔwɔ Luku 4:5 la ka kɛ, Abɔnsam hilele Gyisɛse “azɛlɛ ye azo arelemgbunlililɛ kɔsɔɔti wɔ mekɛ ekyi bie anu,” dasanli biala ɛnrɛhola ɛnrɛnwu debie zɛhae. Ɛhye kile kɛ Abɔnsam anlua debie mɔɔ sonla ɛnyelɛ kola nwu ye la azo anzɔ Gyisɛse anlea emomu ɔluale adenle fofolɛ bie azo.

^ ɛden. 3 Baebolo ne ka Nyamenle anwo edwɛkɛ kɛ ‘Awie mɔɔ ɔde azɛlɛ kutukpunli ne azo anwuma a.’ (Ayezaya 40:22, New World Translation) Neɛnleanu mbuluku bie mɔ maa ɔda ali kɛ edwɛkɛ mɔɔ bɛhile ɔ bo “kutukpunli” la bahola ahile debie mɔɔ ɛnwie kutukpunli yɛ la, nwomama dɔɔnwo ɛnlie ɛhye ɛndo nu. Kɛ ɔde ye biala la, Baebolo ne ɛnlie ɛndo nu kɛ azɛlɛ ne le tɛtɛlɛ.

^ ɛden. 8 Revised Edition, Volume 2, mukelɛ 4.