Wulu kɔ nuhua edwɛkɛ ne azo

Kɛzi Awovolɛ Bahola Ahilehile Bɛ Mra Nla Nwo Debie Ɛ?

Kɛzi Awovolɛ Bahola Ahilehile Bɛ Mra Nla Nwo Debie Ɛ?

Baebolo ne bua kɛ

Nwane a ɔwɔ kɛ ɔkilehile ngakula nla nwo debie a? Baebolo ne ka kɛ ɔle awovolɛ ɛzonlelilɛ, na awovolɛ dɔɔnwo ɛnwu nzuzulɛ ɛhye mɔ mɔɔ doɔdoa zo la kɛ ɔboa:

  • Mmase nyiane. Baebolo ne ka nla nee awodeɛ ne anwo nvɛyeba nwo edwɛkɛ wienyi, yɛɛ Nyamenle hanle hilele Yizilayɛma kɛ bɛhilehile “ngakula” ninyɛne ɛhye mɔ. (Mɛla ne 31:12; Sɛlɛvolɛma 15:2, 16-19) Ɛbahola wɔava edwɛkɛ agbɔkɛ mɔɔ kile ɛbulɛ la wɔaha nla anzɛɛ awodeɛ ne anwo nvɛyeba nwo edwɛkɛ.

  • Ta ka nwolɛ edwɛkɛ. Mmakendɛ too ɛmaa ɛ ra ne bikye fuamunli ɛbɔlɛ kolaa na wɔadɛnla ye aze kɛ ɛka nla nwo edwɛkɛ wɔahile ye, ka nwolɛ edwɛkɛ ngyikyingyikyi kile ye wɔ mekɛ mɔɔ ɔlɛnyi la.​—1 Kɔlentema 13:11.

  • Kilehile ye ɛbɛlabɔlɛ kpalɛ nwo debie. Bɛkilehile ngakula nla nwo edwɛkɛ wɔ sukulu. Noko akee, Baebolo ne maa awovolɛ anwosesebɛ kɛ bɛhilehile bɛ mra nla nwo debie nee subane kpalɛ mɔɔ ɔwɔ kɛ bɛnyia ye wɔ nwolɛ la.​—Mrɛlɛbulɛ 5:1-23.

  • Tie ɛ ra ne. Saa ɛ ra ne biza wɔ nla nwo edwɛkɛ a, mmabua ye ndɛne anzɛɛ mmanyia ɔ nwo adwenle ɛtane. Emomu, ‘tie ɛ nzo anwo yɛɛ mmatendɛ dɔɔnwo.’​—Gyemise 1:19.

Kɛzi ɛbabɔ ɛ ra ne anwo bane wɔavi menli mɔɔ nee ngakula da la anwo la

Kilehile ɛ ra ne maa ɔkpo menli mɔɔ nee ngakula da la

  • Sukoa nwolɛ debie. Sukoa kɛzi menli mɔɔ nee ngakula da la yɛ bɛ nyɛleɛ la anwo debie.​—Mrɛlɛbulɛ 18:15; nea Questions Young People Ask​—Answers That Work, Volume 1 buluku ne tile 32.

  • Nwu mɔɔ ɛlɛkɔ zo wɔ ɛ ra ne ɛbɛlabɔlɛ nu la. Mmafa ye ɛmaa awie kɛ ɔnlea ye wɔ mekɛ mɔɔ ɛnze ahenle kpalɛ la yɛɛ ‘mmatu ɛ ra ne anwo ɛkyɛ ye.’​—Mrɛlɛbulɛ 29:15.

  • Maa bɛnyia tieyɛ nwo adwenle kpalɛ. Ɔwɔ kɛ ngakula tie bɛ awovolɛ. (Kɔlɔsaema 3:20) Noko saa ɛkilehile ɛ mra kɛ bɛdie kpanyinli biala dahuu a, ɛbamaa menli mɔɔ nee ngakula da la asa aha bɛ. Awovolɛ mɔɔ bɛle Kilisienema la bahola aha ahile bɛ ra kɛ, “Saa awie ka kile wɔ kɛ ɛyɛ debie mɔɔ Nyamenle ɛngulo la a, mmayɛ.”​—Gyima ne 5:29.

  • Ɛ nee ye ɛzuzu ndenle sikalɛ mɔɔ babɔ ɔ nwo bane la anwo. Boa ɛ ra ne maa ɔnwu mɔɔ ɔbayɛ saa awie kpondɛ kɛ ɔ nee ye da wɔ mekɛ mɔɔ ɛnle ɛkɛ ne la a. Ɛ nee ɛ ra ne ɛyɛ yɛkile sikalɛ mɔɔ bamaa yeanyia anwodozo yeaha kɛ, “Gyakyi! Mekaha!” na yeavi ɛkɛ ne ndɛndɛ la. Ɔwɔ kɛ ɛkakye “ɛ mra ne mɔ dahuu” ɔluakɛ bɛ rɛle bahola avi.​—Mɛla ne 6:7, Contemporary English Version.