Baebolo ne bua kɛ

 Baebolo ne ka ninyɛne mɔɔ basisi nee subane mɔɔ bahile kɛ yɛwɔ “mekɛ ɛhye” awieleɛ anzɛɛ “ewiade ne ɛlɛkɔ ye awieleɛ” la. (Mateyu 24:3; King James Version) Baebolo ne fɛlɛ mekɛ ɛhye “awieleɛ mekɛ” anzɛɛ “mekɛ mɔɔ li awieleɛ.”​—2 Timote 3:1; Daneɛle 8:19.

“Awieleɛ mekɛ ne” anwo ngapezo bie mɔ a le boni?

 Baebolo ne hanle ninyɛne dɔɔnwo mɔɔ babɔ nu ayɛ “sɛkɛlɛneɛ” mɔɔ kile kɛ yɛwɔ awieleɛ mekɛ ne anu la. (Luku 21:7) Neazo bie mɔ ɛne:

 Konle basisi ewiade ɛleka dɔɔnwo. Gyisɛse hanle kɛ: “Maanle badwazo atia maanle yɛɛ belemgbunlililɛ badwazo atia belemgbunlililɛ.” (Mateyu 24:7) Yekile 6:4 noko hanle ɛkpɔnwɔkavolɛ bie mɔɔ gyi ɛkɛ maa konle konle mɔɔ ‘ɔbaye anzodwolɛ yeavi azɛlɛ ye azo’ la anwo edwɛkɛ.

 Ɛhɔne. Gyisɛse hanle dole ɛkɛ ne kɛ: ‘Ɛhɔne bara.’ (Mateyu 24:7) Yekile buluku ne eza hanle sɛkɛlɛneɛ adenle zo ɛkpɔnwɔkavolɛ bie mɔɔ bamaa ɛhɔne kpole ara ɛleka dɔɔnwo la anwo edwɛkɛ.​—Yekile 6:5, 6.

 Azɛlɛkpusulɛ mgbole. Gyisɛse hanle kɛ “azɛlɛkpusulɛ bara ɛleka ngakyile.” (Mateyu 24:7; Luku 21:11) Azɛlɛkpusulɛ mgbole ɛhye mɔɔ basisi ewiade amuala la bahu menli dɔɔnwo na yeava amaneɛnwunlɛ kpole yeara.

 Ewule. Gyisɛse hanle kɛ ewulenzane anzɛɛ “ewule ɛzulolɛ” bara​—Luku 21:11, Contemporary English Version.

 Basabasayɛlɛ. Ɔle zɔ kɛ basabasayɛlɛ ɛhɔ zo mekɛ tendenle, noko Gyisɛse hanle kɛ “ɛtaneyɛlɛ bazo” wɔ awieleɛ mekɛ ne anu.​—Mateyu 24:12.

 Bɛbazɛkye azɛlɛ ne. Yekile 11:18 hanle kɛ alesama ‘bazɛkye azɛlɛ ne.’ Bɛbalua ndenle ngakyile zo a bayɛ ɛhye a. Tɛ ninyɛndane angome a bɛbayɛ a, emomu bɛbazɛkye ninyɛne mɔɔ ɛbɔ yɛ nwo mgbɔlɔka ɛyia wɔ azɛlɛ ye azo la noko.

 Menli subane bazɛkye. Baebolo ne hanle ye wɔ 2 Timote 3:1-4 kɛ menli bayɛ “boniayɛma, bɛnrɛli nɔhalɛ, . . . menli mɔɔ bɛ nee bɛ ɛnyɛ ngyehyɛleɛ, dumasɛkyevoma, menli mɔɔ ɛngomo bɛ nwo zo, menli mɔɔ anwo yɛ ɛzulolɛ, menli mɔɔ ɛngulo kpalɛyɛlɛ, menli mɔɔ ye awie mɔ maa, menli mɔɔ le tufoande, menli mɔɔ tu bɛ nloa anu.” Subane ɛtane ɛhye mɔ bahɔ ɔ nyunlu kpalɛ la ati ɔbamaa “mekɛ mɔɔ anu yɛ se” la ara.

 Abusua nu ngyegyelɛ. Baebolo ne hanle ye wɔ 2 Timote 3:2, 3 kɛ menli dɔɔnwo ɛnrɛnyia “ɛlɔlɛ” ɛnrɛmaa bɛ mbusua yɛɛ ngakula bayɛ bɛ “awovolɛ nwo anzosesebɛ.”

 Nyamenle anwo ɛlɔlɛ mɔɔ menli lɛ la baha aze. Gyisɛse hanle kɛ: “Menli dɔɔnwo ɛlɔlɛ baha aze.” (Mateyu 24:12) Ɛnee Gyisɛse ɛlɛkile kɛ ɛlɔlɛ mɔɔ menli dɔɔnwo lɛ maa Nyamenle la anloa baha aze. Yɛɛ 2 Timote 3:4 noko hanle kɛ wɔ awieleɛ mekɛ ne anu, menli zɛhae mɔ ‘bahulo anyelielɛ na bɛnrɛhulo Nyamenle.’

 Ɛzonlenlɛ nu nabalaba. Baebolo ne hanle ye wɔ 2 Timote 3:5 kɛ menli bayɛ bɛ nwo kɛ bɛlɛsonle Nyamenle noko bɛnrɛva ye ngyinlazo ne mɔ bɛnrɛbɔ bɛ ɛbɛla.

 Baebolo ngapezo nwo ndelebɛbo bayɛ kpole. Daneɛle buluku ne hanle kɛ wɔ “awieleɛ mekɛ ne” anu, menli bade Baebolo ne anu nɔhalɛ ne mɔɔ bie a le ngapezo ɛhye mɔ la abo kpalɛ.​—Daneɛle 12:4, ɔbodwɛkɛ.

 Bɛbaha edwɛkɛ ne wɔ ewiade amuala. Gyisɛse hanle kɛ: “Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala.”​—Mateyu 24:14.

 Menli dɔɔnwo bayɛ anyetele nee agolobɛnwoma. Gyisɛse hanle kɛ menli dɔɔnwo babu bɛ nye agua daselɛ wienyi mɔɔ kile kɛ awieleɛ ne ɛlɛba la azo. (Mateyu 24:37-39) Mɔɔ tɛla ɛhye la, 2 Pita 3:3, 4 hanle kɛ bie mɔ bayɛ agolobɛnwoma na baha kɛ daselɛ ne ɛngile ɛhwee.

 Ngapezo ne kɔsɔɔti ɛra nu. Gyisɛse hanle kɛ wɔ awieleɛ mekɛ ne anu, ngapezo ɛhye mɔ kɔsɔɔti bara nu na tɛ nuhua ekyi bie anzɛɛ dɔɔnwo ala.​—Mateyu 24:33.

Asoo yɛde “mekɛ mɔɔ li awieleɛ” la anu?

 Ɛhɛe. Ninyɛne mɔɔ ɛlɛkɔ zo wɔ ewiade ye anu nee mgbondabulɛ mɔɔ wɔ Baebolo ne anu la kile kɛ awieleɛ mekɛ ne bɔle ɔ bo wɔ 1914 wɔ mekɛ mɔɔ Ewiade Konle I bɔle ɔ bo la. Amaa wɔanwu kɛzi ninyɛne mɔɔ ɛlɛsisi ewiade la kile kɛ yɛde awieleɛ mekɛ ne anu la, nea vidio ɛhye:

 Nyamenle Belemgbunlililɛ ne bɔle ɔ bo kɛ ɔdi tumi wɔ anwuma wɔ 1914 na debie mɔɔ ɔlimoale ɔyɛle la a le kɛ ɔdule Seetan Abɔnsam nee ye sunsum ɛtane ne mɔ ɔvile anwuma na azɛlɛ ye azo ala a bɛkola bɛduolua a. (Yekile 12:7-12) Yɛnwu kɛzi Seetan ɛnyia menli nwo zo tumi la wɔ subane nee nyɛleɛ mɔɔ bɛda ye ali la anu na yemaa ‘mekɛ ne anu ɛyɛ se’ kpalɛ.​—2 Timote 3:1.

 Mekɛ ɛhye mɔɔ anu yɛ se la ɛmmaa menli dɔɔnwo ɛnnwu mɔɔ bɛyɛ a. Menli ɛngola ɛndɛnla ɛmbɔ nu wɔ anzodwolɛ nu. Bie mɔ bɔbɔ sulo kɛ menli bapɛ bɛ nwo ahuhu bɛ nwo.

 Noko, menli bie mɔ mɔɔ ninyɛne mɔɔ ɛlɛkɔ zo wɔ ewiade ye anu gyegye bɛ la lɛ anyelazo. Bɛlɛ anwodozo kɛ ɔnrɛhyɛ Nyamenle Belemgbunlililɛ ne bayɛ nwolɛ debie na yeaye ngyegyelɛ mɔɔ ɛlɛkɔ zo wɔ ewiade ye anu la yeavi ɛkɛ. (Daneɛle 2:44; Yekile 21:3, 4) Bɛlɛfa abotane bɛahendɛ kɛ Nyamenle bamaa ye ɛwɔkɛ ne mɔ ara nu na Gyisɛse edwɛkɛ mɔɔ se: “Mɔɔ kɛgyinla nu kɛhɔ awieleɛ la bɛbalie ye ngoane” la kyekye bɛ rɛle.​—Mateyu 24:13; Maeka 7:7.