Wulu kɔ nuhua edwɛkɛ ne azo

Asoo Nane Ne Mɔ Kɔ Anwuma?

Asoo Nane Ne Mɔ Kɔ Anwuma?

Baebolo ne bua kɛ

Baebolo ne kilehile kɛ, wɔ abɔdeɛ mɔɔ wɔ azɛlɛ ye azo la amuala anu, menli ekyi bie ala a bahɔ anwuma a. (Yekile 14:1, 3) Bɛ nee Gyisɛse babɔ nu ali tumi kɛ arelemgbunli nee ɛsɔfoma. (Luku 22:28-30; Yekile 5:9, 10) Bɛbadwazo menli apenle dɔɔnwo mɔɔ ɛha la bamaa bɛara ngoane nu wɔ paladaese azɛlɛ zo.​—Edwɛndolɛ 37:11, 29.

Bɛtɛkanle ye wɔ Baebolo ne ɛleka biala kɛ nyɛmoa bahɔ anwuma​—na ndelebɛbo wɔ nu. Nane ne mɔ ɛnrɛhola ɛnrɛyɛ ninyɛne mɔɔ saa awie yɛ a ɔbafɛta yeamaa ‘anwuma ɛvɛlɛlɛ’ ne la. (Hibuluma 3:1) Ninyɛne ɛhye mɔ bie a le Nyamenle anwo adwenle mɔɔ yɛnyia, diedi mɔɔ yɛnyia nee ye mɛla ne mɔ mɔɔ yɛbali zo la. (Mateyu 19:17; Dwɔn 3:16; 17:3) Alesama ala a bɛbɔle bɛ kɛ bɛdɛnla aze dahuu a.​—Mɔlebɛbo 2:16, 17; 3:22, 23.

Saa awie bahola avi azɛlɛ ye azo ahɔ anwuma a, kyesɛ bɛdwazo ye bɛfi ewule nu. (1 Kɔlentema 15:42) Baebolo ne ka ewudwazo ngakyile dɔɔnwo anwo edwɛkɛ. (1 Arelemgbunli 17:17-24; 2 Arelemgbunli 4:32-37; 13:20, 21; Luku 7:11-15; 8:41, 42, 49-56; Dwɔn 11:38-44; Gyima ne 9:36-42; 20:7-12) Noko wɔ biala anu, menli a bɛdwazo bɛ a, na tɛ nane ɔ.

 Nane lɛ ɛkɛla ɔ?

Kyɛkyɛ. Baebolo ne ka kɛ, nane yɛɛ sonla le ɛkɛla. (Ɛdianlɛ 31:28) Mɔɔ bɛbɔle Adam, sonla mɔɔ limoa la, bɛanva ɛkɛla bɛanwula ye nu emomu, ɔrayɛle ‘ɛkɛla mɔɔ de aze.’ (Mɔlebɛbo 2:7) Ninyɛne nwiɔ a ka bɔ nu yɛ ɛkɛla ne a: “Ndɛtɛlɛ” yɛɛ “ngoane ɛnwomenle.”

 Ɛkɛla wu ɔ?

Ɛhɛe, Baebolo ne kilehile kɛ ɛkɛla wu. (Sɛlɛvolɛma 21:11; Yizikeɛle 18:20) Saa sonla nee nane wu a, bɛsia bɛkɔ ndɛtɛlɛ ne anu. (Nolobɔvo ne 3:19, 20) Kile kɛ, bɛnle ɛleka biala bieko. *

 Asoo nane yɛ ɛtane?

Kyɛkyɛ. Saa bɛka kɛ awie ɛyɛ ɛtane a ɔkile kɛ, ye adwenle, ye nganeɛdelɛ anzɛɛ ye nyɛleɛ nee Nyamenle ngyinlazo ne mɔ ɛnyia. Saa abɔdeɛ bie bayɛ ɛtane a, ɔwɔ kɛ ɔkola ɔsi ɛbɛlabɔlɛ kpalɛ nwo kpɔkɛ, noko nane ne mɔ ɛngola ɛnyɛ zɔ. Wɔ bɛ ngoane mekɛ ekyi mɔɔ bɛtɛnla aze la anu, bɛyɛ mɔɔ bɛ nganeɛdelɛ ka kile bɛ kɛ bɛyɛ la. (2 Pita 2:12) Saa mekɛ dodo mɔɔ ɔwɔ kɛ bɛfa bɛtɛnla aze la dwu a, ɛnee bɛwu ɔnva nwo kɛ bɛanyɛ ɛtane la.

 Asoo Nyamenle die nane mɔɔ bɛyɛ ye amumuyɛ la to nu?

Kyɛkyɛ. Nyamenle maanle alesama tumi kɛ bɛnlea nane ne mɔ anwo zo, noko yeanga kɛ bɛlɛ nwolɛ adenle bɛyɛ bɛ amumuyɛ. (Mɔlebɛbo 1:28; Edwɛndolɛ 8:6-8) Nyamenle dwenle nane ko biala anwo​—nloma ngyikyi noko boka nwo. (Dwona 4:11; Mateyu 10:29) Ɔmaanle ye azonvolɛ mɛla kɛ bɛdwenle nyɛmoa nwo.​—Adendulɛ 23:12; Mɛla ne 25:4; Mrɛlɛbulɛ 12:10.

^ ɛden. 13 Saa ɛkpondɛ nwolɛ edwɛkɛ dɔɔnwo a, nea Duzu A Baebolo Ne Kola Kilehile Yɛ A? buluku ne tile 6