Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Boni A Baebolo Ne Ka Ye Wɔ Menli Nwiɔ Mɔɔ Asolo Bɛ Amaamuo Anzɛɛ Bɛ Aneɛ La Agyalɛ Nwo A?

Boni A Baebolo Ne Ka Ye Wɔ Menli Nwiɔ Mɔɔ Asolo Bɛ Amaamuo Anzɛɛ Bɛ Aneɛ La Agyalɛ Nwo A?

Baebolo ne bua kɛ

Nyamenle die agyalɛ mɔɔ asolo nrenyia ne nee raalɛ ne amaamuo anzɛɛ bɛ aneɛ la to nu ɔluakɛ ɔbu menli kɔsɔɔti kɛ bɛsɛ. Baebolo ne se: ‘Nyamenle bu menli kɔsɔɔti kɛ bɛsɛ . . . ɔnnea ɛleka mɔɔ bɛvi nee maanle holɛ ko mɔɔ bɛvi nu la.’​—Gyima ne 10:34, 35.

Suzu mɔɔ Baebolo ngyinlazo bie mɔ ka ye wɔ menli kɔsɔɔti mɔɔ bɛsɛ nee agyalɛ nwo la anwo.

Menli kɔsɔɔti vi ɛleka ko

Alesama kɔsɔɔti vi nrenyia mɔɔ limoa Adam nee ɔ ye Yive mɔɔ Baebolo ne fɛlɛ ye kɛ “ɔle menli kɔsɔɔti bɛ nli” la anu a rale a. (Mɔlebɛbo 3:20) Ɔlua ɛhye ati, Baebolo ne ka Nyamenle anwo edwɛkɛ kɛ: “Nyamenle bɔle sonla na ɔluale ɔ nwo zo ɔmanle menli ngakyile kɔsɔɔti rale.” (Gyima ne 17:26) Ɔnva nwo maanle mɔɔ bɛvi nu la, alesama kɔsɔɔti le abusua ko. Na saa menli yɛ nyeyenu kpole kpalɛ wɔ ɛleka mɔɔ ɛde la noko ɛ?

Menli mɔɔ ze nrɛlɛbɛ la kpondɛ ‘folɛdulɛ’

Ɔwɔ nuhua kɛ Nyamenle die menli nwiɔ mɔɔ ɛnvi maanle ko anu agyalɛ to nuhua ɛdeɛ noko tɛ menli kɔsɔɔti a nee ye yɛ adwenle a. (Ayezaya 55:8, 9) Saa ɛkulo kɛ ɛgya awie mɔɔ ɛnvi wɔ maanle nu a, dimoa ɛ nee ahenle mɔɔ ɛkulo kɛ ɛgya ye la ɛzuzu ɛhye mɔ anwo:

  • Kɛzi bɛbagyinla ngyegyelɛ mɔɔ bɛ abusua anzɛɛ bɛ sua zo amra bava ara bɛ nwo zo la anloa ɛ?

  • Kɛ ɔkɛyɛ na bɛaboa bɛ mra bɛamaa bɛagyinla menli nwo adwenle ɛtane nloa ɛ?

‘Bɛkpondɛ folɛdulɛ’ wɔ adenle ɛhye azo a ɔbahola yeaboa bɛ yeamaa anyelielɛ ara bɛ agyalɛ ne anu.​—Mrɛlɛbulɛ 13:10; 21:5.