Antichrist anzɛɛ Kelaese kpɔvolɛ ne ɛnle sonla ko anzɛɛ eku ko ala, ɔluakɛ Baebolo ne ka kɛ “Kelaese kpɔvolɛma dɔɔnwo” wɔ ɛkɛ. (1 Dwɔn 2:18) Emomu duma “antichrist,” vi Giliki edwɛkɛkpɔkɛ mɔɔ kile “awie mɔɔ dwazo tia Kelaese” la anu na ɔfale awie biala mɔɔ da subane ɛhye mɔ mɔɔ doɔdoa zo la bie ali la anwo:

•   Awie mɔɔ ɛnlie ɛndo nu kɛ Gyisɛse a le Kelaese (Mɛzaya) ne anzɛɛ Nyamenle Ara la.​—1 Dwɔn 2:22.

•   Awie mɔɔ dwazo tia Kelaese, Ahenle Mɔɔ Nyamenle Ɛkpokpa Ye la.​—Edwɛndolɛ 2:1, 2; Luku 11:23.

•   Awie mɔɔ ɔyɛ ɔ nwo kɛ ɔdaye a ɔle Kelaese ne la.​—Mateyu 24:24.

•   Awie mɔɔ yɛ Kelaese ɛdoavolɛma kpɔdekpɔde, ɔluakɛ Gyisɛse bu mɔɔ bɛfa bɛyɛ bɛ la kɛ bɛlɛfa bɛayɛ ye.​—Gyima ne 9:5.

•   Awie mɔɔ se ɔle Kilisienenli noko ɔyɛ ninyɛndane anzɛɛ ɔle mɛlɛbɛla la.​—Mateyu 7:22, 23; 2 Kɔlentema 11:13.

 Ɛye menli mɔɔ da subane ɛhye mɔ bie ali mɔɔ Baebolo ne se bɛle Kelaese kpɔvolɛma la ɛsie ahane a, eza ɔfɛlɛ bɛ muala “Kelaese Kpɔvolɛ.” (2 Dwɔn 7) Kelaese kpɔvolɛ ne limoale yele ɔ nyunlu wɔ ɛzoanvolɛma ne mekɛ zo na ɔtɛyɛ gyima ɛnɛ. Baebolo ngapezo hanle ɛhye anwo edwɛkɛ dole ɛkɛ.​—1 Dwɔn 4:3.

•   Bɛka Gyisɛse anwo edwɛkɛ mɔɔ ɔnle nɔhalɛ. (Mateyu 24:9, 11) Kɛ neazo la, menli mɔɔ kilehile Nsa-Ko Nyamenle anzɛɛ bɛkilehile kɛ Gyisɛse le Tumivolɛ Nyamenle la dwazo tia Kelaese ngilehilelɛ ne mɔɔ se: ‘Selɛ ne le kpole tɛla me’ la.​—Dwɔn 14:28.

•   Kelaese kpɔvolɛma ɛnlie kɛzi Nyamenle Belemgbunlililɛ ne yɛ gyima la anwo edwɛkɛ mɔɔ Gyisɛse hanle la ɛndo nu. Kɛ neazo la, ɛzonlenlɛ nu kilehilevolɛma bie mɔ ka kɛ Kelaese dua alesama arane zo a yɛ gyima a. Noko ngilehilelɛ ɛhye nee Gyisɛse mɔɔ se, “Me belemgbunlililɛ ne ɛnle ewiade ɛhye anu” la edwɛkɛ ne ɛnyia.​—Dwɔn 18:36.

•   Bɛse Gyisɛse le bɛ Awulae noko bɛnli ye mɛla ne mɔ azo, bie a le mɛla mɔɔ se yɛbɔ Belemgbunlililɛ ne anwo edwɛkpa ne nolo la.​—Mateyu 28:19, 20; Luku 6:46; Gyima ne 10:42.