Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

“Ɛnyelɛ Ɛzie Ɛnyelɛ Bo Zo” Abo Kile Duzu?

“Ɛnyelɛ Ɛzie Ɛnyelɛ Bo Zo” Abo Kile Duzu?

Baebolo ne bua kɛ

Nyamenle a luale Mosisi anwo zo vale Mɛla mɔɔ se “ɛnyelɛ ɛzie ɛnyelɛ bo zo” la maanle tete Yizilayɛma a, na Gyisɛse hwenle adwenle hɔle zo wɔ ye Boka Zo Ɛdendɛlɛ ne anu. (Mateyu 5:​38; Adendulɛ 21:24, 25; Mɛla ne 19:21) Ɛnee ɔkile kɛ, saa awie yɛ ɛtane na bɛlɛtwe ɔ nzo a, ɔwɔ kɛ ye ɛtane ne nee ye anzohwenlɛ ne yɛ ko. *

Ɛnee mɛla ɛhye wɔ ɛkɛ ne maa awie mɔɔ ɔ nye fuu ɔbayɛ debie ɛtane yeatia ɔ gɔnwo la. Mosisi Mɛla ne hanle awie mɔɔ anye fuu baboda ɔ gɔnwo la anwo edwɛkɛ kɛ: “Ɛbu awie bowule a, ɔwɔ kɛ bɛbu ɛdawɔ wɔ bowule nu, ɛtu awie anye a, ɔwɔ kɛ bɛtu ɛ nye, yɛɛ ɛtu egyele a, ɔwɔ kɛ bɛtu ɛ gye. Kɛ ɛkɛzi ɛkɛboda ahenle la, zɔhane ala yɛɛ ɔwɔ kɛ bɛboda ɛdawɔ noko a.”​—Sɛlɛvolɛma 24:20.

 “Ɛnyelɛ ɛzie ɛnyelɛ bo zo” mɛla ne bodane a le boni?

Ɛnee “ɛnyelɛ ɛzie ɛnyelɛ bo zo” mɛla ne ɛngile kɛ saa awie yɛ wɔ ɛtane a, ɔwɔ kɛ ɛdi ye nzenralɛ. Emomu, ɔboale menli mɔɔ bɛkpale bɛ kɛ ndɛnebuavolɛma la ɔmaanle bɛvale anzohwenlɛ mɔɔ fɛta la bɛmaanle.

Mɛla ne yɛle kɔkɔbɔlɛ maanle menli mɔɔ ɛnee bɛ nye fuu anzɛɛ ɛkpɔlɛ ti bɛbaboda awie mɔ la. Mɛla ne hilele nu kɛ, ‘ɔba ye zɛhae a, menli mɔɔ ɛha [menli mɔɔ banwu anzohwenlɛ mɔɔ Nyamenle bava amaa] la bazulo, na bɛambɔ munzule ɛbɛla zɛhae bieko wɔ bɛ avinli.’​—Mɛla ne 19:20.

 Asoo Kilisienema wɔ “ɛnyelɛ ɛzie ɛnyelɛ bo zo” mɛla ne abo?

Kyɛkyɛ, Kilisienema ɛnle mɛla ɛhye abo. Ɔboka Mosisi Mɛla ne mɔɔ Gyisɛse afɔlebɔlɛ ne maanle ɔrale awieleɛ la anwo.​—Wulomuma 10:4.

Noko mɛla zɔhane maa yɛnwu Nyamenle adwenle. Kɛ neazo la, ɔmaa yɛnwu kɛ Nyamenle kulo pɛlepɛlelilɛ. (Edwɛndolɛ 89:14) Eza ɔmaa yɛnwu ye pɛlepɛlelilɛ ngyinlazo ne​—kɛ neazo la, ɔka kɛ ɔwɔ kɛ bɛtwe ɛtanevolɛma anzo ‘kɛ mɔɔ ɔfɛta la.’​—Gyɛlɛmaya 30:11.

 “Ɛnyelɛ ɛzie ɛnyelɛ bo zo” mɛla ne anwo adalɛ edwɛkɛ bie mɔ

Adalɛ edwɛkɛ: “Ɛnyelɛ ɛzie ɛnyelɛ bo zo” mɛla ne anloa yɛ se somaa.

Nɔhalɛ edwɛkɛ: Ɛnee mɛla ne anloa ɛnyɛ se yɛɛ ɔnle adesoa. Emomu, ɛnee ɔmaa ndɛnebuavolɛma mɔɔ fɛta la nyia mekɛ neɛnlea edwɛkɛ bie anu kpalɛ kolaa na bava nwolɛ anzohwenlɛ bɛamaa; kɛzi ɛtane ne kpole de yɛɛ saa ahenle anye fuu a. (Adendulɛ 21:28-30; Ɛdianlɛ 35:22-25) Yemɔti “ɛnyelɛ ɛzie ɛnyelɛ bo zo” mɛla ne ammaa bɛanva anzohwenlɛ mɔɔ anloa yɛ se somaa la bɛammaa.

Adalɛ edwɛkɛ: “Ɛnyelɛ ɛzie ɛnyelɛ bo zo” mɛla ne maanle menli lile nzenralɛ.

Nɔhalɛ edwɛkɛ: Mosisi Mɛla mumua ne hanle kɛ: “Bɛmmadi nzenralɛ anzɛɛ bɛmmafa bɛdabɛ bɛ menli ne mɔ amra mrenyia anwo edwɛkɛ bɛsie bɛ kunlu.” (Sɛlɛvolɛma 19:18) Kɛ anrɛɛ Mɛla ne bamaa bɛali nzenralɛ la, ɔmaanle menli nyianle Nyamenle nee ndɛnebuavolɛma mɔɔ yekpa bɛ la anu anwodozo kɛ bɛbali ninyɛne nwo gyima kɛ mɔɔ ɔfɛta la.​—Mɛla ne 32:35.

^ ɛden. 3 Ɔyɛ a bɛfa Latɛn edwɛkɛkpɔkɛ lex talionis bɛka mɛla adenle zo ngyinlazo ɛhye anwo edwɛkɛ, na bɛkile kɛ, maanle bie mɔ vale lile gyima wɔ tete ne.