Wulu kɔ nuhua edwɛkɛ ne azo

MOALƐ MAA ABUSUA

Kɛzi Ɛbahomo Ɛ Nwo Zo La

Kɛzi Ɛbahomo Ɛ Nwo Zo La

Ɛ hu anzɛɛ ɛ ye ɛha edwɛkɛ anzɛɛ ɛyɛ debie ɛmaa wɔva ɛya, noko ɛlɛbɔ mɔdenle kɛ ɛdi ye ɛ kunlu. Akee yenwu kɛ debie ɛlɛgyegye wɔ yemɔti ɔbɔ ɔ bo kɛ ɔbizebiza wɔ kpuya. Akee yemɔ bɔbɔ maa ɛfa ɛya kpole. Kɛzi ɛbahomo ɛ nwo zo wɔ tɛnlabelɛ ɛhye mɔ anu ɛ?

 Mɔɔ ɔwɔ kɛ ɛnwu ye la

  • Ɛyavalɛ kpole bahola aha wɔ kpɔkɛdelɛ. Neɛnleanu kile kɛ ɛyavalɛ mgbane mgbane maa bɛnyia mogya moloso, ahonle ewule, adwenle nu ngyegyelɛ, nee mɔɔ bokɛboka nwo la. Eza ɛyavalɛ ɛmmaa bɛngola da, ɔye adwenleadwenle ɔto bɛ nwo, ɔsɛkye nwonane ne yɛɛ ɔmaa bɛnyia stroke. Ndelebɛbo kpalɛ bie ati, Baebolo ne ka kɛ: “Mmafa ɛya . . . , ɔwie munzule.”​​—Edwɛndolɛ 37:8.

  • Ɛfa ɛya ɛsie wɔ nu a ɔbahola yeaboda wɔ. Ɛya mɔɔ bɛfa bɛsie bɛ nu bɛkyɛ la le kɛ ewule bie mɔɔ wɔ wɔ nu na ɔlɛku wɔ la. Kɛ neazo la, ɔbahola yeamaa wɔayɛ kyengye. Subane ɛhye bahola amaa yeayɛ se kɛ menli nee wɔ badɛnla yɛɛ ɔbahola yeazɛkye wɔ agyalɛ.

 Mɔɔ ɛbahola wɔayɛ la

  • Kpondɛ subane mgbalɛ mɔɔ ɛ hu anzɛɛ ɛ ye lɛ la. Kɛlɛ ninyɛne nsa mɔɔ ɛ nye die nwo wɔ ɛ hu anzɛɛ ɛ ye anwo la. Mekɛ biala mɔɔ ɔbayɛ debie yeamaa wɔava ɛya la, dwenle subane ɛhye mɔ mɔɔ wɔnwu ye la anwo. Bie a ɛhye baboa wɔ yeamaa wɔahomo ɛ nwo zo.

    Baebolo ngyinlazo: “Bɛhile anyezɔlɛ.”​​—Kɔlɔsaema 3:​15.

  •  Nyia fakyɛ subane. Mɔɔ limoa, bɔ mɔdenle kɛ ɛbade ɛ hu anzɛɛ ɛ ye edwɛkɛ bo. Ɛhye baboa wɔ yeamaa wɔade ye nyane bo. (1 Pita 3:8) Bieko, biza ɛ nwo kɛ, ‘Asoo yeyɛ ɛtane kpole somaa mɔɔ ɔti mefa mekyɛ ye a ɔnyɛ boɛ ɔ?’

    Baebolo ngyinlazo: “Ɔle anyunlunyia . . . kɛ ɔkɛbu ɔ nye ɔkɛgua nvonleɛ zo.”​​—Mrɛlɛbulɛ 19:11.

  •  Fi ahunlunyele nee nrɛlɛbɛ adenle zo da wɔ nganeɛdelɛ ali. Fa “me” di gyima. Kɛ neazo la, kɛ anrɛɛ ɛbaha kɛ, “Ɛndwenle me nwo yemɔti a wɔanvɛlɛ me wɔanga ɛleka mɔɔ ɛwɔ la wɔangile me la,” ka kɛ, “Me rɛle bɔle ɔluakɛ ɛnee mekɛ ɛhɔ yɛɛ mengola menwu ye saa ɛ nwo le kpalɛ a.” Saa ɛtendɛ bɛtɛɛ a, ɔbaboa wɔ yeamaa wɔ ɛya ne aha aze.

    Baebolo ngyinlazo: “Bɛmaa bɛ ɛdendɛlɛ ɛyɛ fɛ dahuu na ngyenle ɛrɛla nu.”​​—Kɔlɔsaema 4:6.

  •  Fi ɛbulɛ nu tie. Saa ɛtendɛ ɛwie a, maa ɛ hu anzɛɛ ɛ ye noko ɛdendɛ mɔɔ ɛmpɛ ɛ nloa azo a. Saa ɔtendɛ ɔwie a, pɛ mɔɔ yeha la sikalɛ nea kɛ ɛdele mɔɔ ɔhanle la abo a. Saa ɛyɛ ɛnzolɛ ɛtie a, ɔbaboa wɔ kpole yeamaa wɔahomo wɔ ɛya ne azo.

    Baebolo ngyinlazo: “Yɛ ye ndɛ tie edwɛkɛ, mmapele ɛ nwo ɛtendɛ.”​​Gyemise 1:​19.