Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

ASOO AWIE A YƐLE A?

Kɛzi Kakatebowule Kyikyi Ɔ Nye Ndendenle Ne Anwo La

Kɛzi Kakatebowule Kyikyi Ɔ Nye Ndendenle Ne Anwo La

Amaa kɛkɛba ahola adu, yeavo debie na yeanwu ɛleka mɔɔ ɔlɛkɔ la, ɔwɔ kɛ ɔdi ɔ nwo eni dahuu. Kɛ neazo la, saa kɛkɛba anye ndendenle ne mɔ anwo yɛ evinli a, ɔngola ɔnnwu debie kpalɛ, ɔngola ɔ nee ɔ gɔnwo mɔ ɛnli ngitanwo yɛɛ ɔnde nvoanle kpalɛ. Yemɔti Alexander Hackmann mɔɔ sukoa nane nwo debie la ka kɛ, “Ɛnrɛnwu kɛkɛba mɔɔ ɔ nwo ɛyɛ evinli la ɛlɛ. Bɛzukoa kɛzi saa bɛ nwo yɛ evinli a, bɛbali bɛ nwo eni la.”

Suzu ɛhye anwo: Hackmann nee ɔ gɔnwo mɔ ɛzukoa adenle mɔɔ kakatebowule ekpunli bie (Camponotus rufifemur) dua zo kyikyi bɛ nye ndendenle ne anwo la anwo debie. Bɛnwunle kɛ saa kɛkɛba ɛhye kulo kɛ ɔkyikyi anzɛɛ ɔye ninyɛne mɔɔ ɛheha ɔ nye ndendenle ne anwo la a, ɔkpo ɔ gyakɛ ne kpalɛ na akee yeava ɔ nye ndendenle ne ko biala yeavea ɔ gyakɛ ne mɔɔ yekpo ye la anu na yeahwe ye amaa ninyɛne mɔɔ ɛheha nwo la agua aze. Enrinli mɔɔ wɔ ɔ gyakɛ anwo la yeye ninyɛne mɔɔ ɛheha ɔ nye ndendenle ne anwo la, eza ɔkyikyi evinli biala mɔɔ wɔ nwo la. Enrinli mɔɔ wɔ ɔ gyakɛ anwo la kola kyikyi evinli biala fi ɔ nye ndendenle ne anwo saa bɔbɔ ɔle nretee feɔtɔ a.

Nea kakatebowule mɔɔ ɔlɛkyikyi ɔ nye ndendenle ne anwo la

Hackmann nee ɔ gɔnwo mɔ die di kɛ, bɛbahola bɛazukoa debie bɛavi adenle mɔɔ kɛkɛba ɛhye dua zo siezie ɔ nye ndendenle ne anwo la anu bɛava bɛaboa kɔmpɛlɛ bie mɔ. Kɛ neazo la, bɛbahola bɛava bɛakyikyi ɛlɛtɔlɔneke milahyinli ngyikyi kpalɛ mɔɔ bɛ nwo gyimalilɛ ɛnla aze la anu, amaa evinli anzɛkye ye.

Kɛzi ɛdwenle nwo ɛ: Asoo kɛzi kakatebowule di ɔ nye ndendenle ne eni la luale ngakyihakyililɛ zo a rale a? Anzɛɛ awie a yɛle a?