Ena, Abaketi ba Yehova bikutula linga ingozi yibombiwe. Tubakutula Abaketi abinitu kangi abandu abangi. Syo isi Ibaibolo likuyoba pa Bagalatia 6:10: ‘Tubabombeleghe inunu abandu bosa, tukindilileghe itolo kubamyitu aba tuli lwitiko lumolwene.’ Tukubatula mwa mbepo kangi tukubakasya ukuti bangataghagha ulusubilo.—2 Bakorinti 1:3, 4.

Muno Fikwendela

Linga ingozi yibombiwe, abakulumba ba fipanga ifi fyaghene ningozi bikuyobesania nabakamu nabalumbu ukuti bamanye kanunu indamyo iyi yilipo kangi nubutuli ubu bukulondiwa. Linga bamanya, bikutuma ilipoti ku ofesi ya Baketi ba Yehova mu kisu kyabo pamo ikisu ikya pabupipi.

Linga ingozi inywamu, Akabughatila Kakulongosya ka Baketi ba Yehova kikutulapo. Momuno babombile Abakristu abakunyuma bo baghene ninjala. (1 Bakorinti 16:1-4) Ofesi ya Baketi ba Yehova mu kisu iki mubombiwe ingozi, yikusala ikomiti yakuketesya imbombo ya kubika ubutuli bwakufuma ku ofesi yitu inywamu. Abaketi bakufuma mu fisu fingi, bope bikutulapo.—Isya Mbupingamu 17:17.

Muno Indalama Sikubombela Imbombo

Indalama isi abandu bikutuma ku ofesi ya Baketi ba Yehova sikubomba imbombo nyingi. Imbombo yake yimo kokutula linga pabombiwe ingozi. (Imbombo Sya Batumiwa 11:27-30; 2 Bakorinti 8:13-15) Aba bikutula abinabo pakabalilo ka ngozi aka, batikwambilila indalama. Indalama sikutula pafyene ifi fikulondiwa—2 Bakorinti 8:20.