Bzimogeni bzinthu bzimwebzi

Ndokoni pa menu yaciwiri

Mboni za Yahova

Cinyungwe

Kodi Bibliya Limbalewa Ciyani bza Kumwa Bzakuledzeresa? Kodi Kumwa ni Pikado?

Kodi Bibliya Limbalewa Ciyani bza Kumwa Bzakuledzeresa? Kodi Kumwa ni Pikado?

Bzomwe Bibliya limbalewa

Si pikado kumwa mwacikati-kati. Bibliya limbalewa kuti vinyu ni mphaso yakucokera kwa Mulungu, ndipo ungakondwese moyo wa munthu. (Psalymo 104:14, 15; Mpalizi 3:13; 9:7) Ndipo Bibliya limbazindikirambo kuti vinyu ungathandize pa matenda.—1 Timotio 5:23.

Jezu akhamwa vinyu pomwe akhali pansi pano. (Mateu 26:29; Luka 7:34) Ndipo, pa nthawe inango, iye adacita cakudabwisa cakudziwika kwene-kwene. Adasandusa madzi kukhala vinyu, acipereka ninga mphaso pa cikondweso ca malowozi.—Juwau 2:1-10.

Ngozi ya kuledzera

Napo Bibliya limbalewa bza phindu la vinyu, iro limbaletsambo kumwa kwene-kwene ayai kuledzera. Tenepo, Mkristau omwe asankhule kumwa, an’fuika kucita bzimwebzi mwacikati-kati. (1 Timotio 3:8; Tito 2:2, 3) Bibliya limbapereka malango yakusiyana-siyana kuti titcenkhe kuledzera.

  • Kuledzera kumbatazisa munthu kukumbuka na kuyeruza bzinthu mwanzeru. (Mimwani 23:29-35) Munthu wakuledzera angakwanise lini kubvera cakutonga ca m’Bibliya cakulewa kuti tipereke ‘mathupi yathu ninga nsembe ya moyo, yakucena na yakubvumika kwa Mulungu, yomwe ni utumiki bwakupambulika mwa kuphatisira basa mphanvu zathu zakukumbuka’.—Waroma 12:1.

  • Kuledzera kumbatazisa munthu kukhala na cikhumbo cakufuna cinthu cabwino.’—Ozeya 4:11; Wayefezo 5:18.

  • Kuledzera kungasaukise munthu na kuduwalambo kwene-kwene.—Mimwani 23:21, 31, 32.

  • Kumwa kwene-kwene na kuledzera kumbakondwesa lini Mulungu.—Mimwani 23:20; Wagalata 5:19-21.

Kodi kumwa kwene-kwene n’kumwa magalafa mangasi?

Munthu omwe wamwa kwene-kwene ngule omwe kumwa kwaceko kungaikhe moyo wace ayai wa anzace pa ngozi. Bibliya limbalewa kuti kuledzera kumbawonekera lini mwa kukwondoka, koma kumbawonekera mwa bzicito bza munthuyo, ninga mwa kudzungaira, kutaza kufamba bwino, kufuna kucita ndewo ayai kuyamba kutukwana. (Djobi 12:25; Psalymo 107:27; Mimwani 23:29, 30, 33) Napo wale omwe ambatcenkha kufika pa kuledzera angafike basi pa ‘kulemedwa na kumwa kwene-kwene,’ ndipo angakhale na bzakutewera bzakuwawa kwene-kwene.—Luka 21:34, 35.

Kuleka kumwa

Bibliya limbalewambo bza nthawe zomwe Akristau angafunikire kulekeratu kumwako:

  • Penu anzawo angakhumudwe na bzimwebzo.—Waroma 14:21.

  • Penu kumwako kumbaletsedwa na boma la m’dziko lawolo.—Waroma 13:1.

  • Penu munthuyo ambatazira kubziretsa akayamba kumwa. Wanthu omwe ambabonera akamwa an’funikira kulekeratu kumwako.—Mateu 5:29, 30.