M’mbuto mwakuletsa kugonana, Bibliya limbalatiza kuti kugonana kwa mwamuna na mkazi wakulowolana ni mphaso ya Mulungu. Mulunguyo adalenga ‘mwamuna na mkazi,’ ndipo adawona kuti bzomwe iye akhadalenga ‘bzikhali bzabwino kwene-kwene.’ (Ciyambo 1:​27, 31) Pomwe Mulungu adalowoza mwamuna na mkazi, iye adalewa kuti iwo ‘angadadzakhala thupi libodzi.’ (Ciyambo 2:​24) Kukhala thupi libodziko kumbathandauzambo kuti kugonanako kungadakhala pakati pa awiriwo basi.

Pakulewa bza amuna omwe ana banja, Bibliya limbati: ‘Kondwa na mkazi wa pa utswaka bwako. . . . Masuku yace yakukwanire nthawe zense. Umbakomedwe kwene-kwene na lufoyi lace nthawe zense.’ (Mimwani 5:​18, 19) Mulungu ambafunambo kuti akazi ambakomedwe kugonana na azimuna wawo. Bibliya limbati: ‘Mwamuna ambapereke kwa mkazi wace bzomwe adathemera, ndipo mkazi ambacitembo bzibodzi-bodzi kwa bayace.’​—1 Wakolinto 7:3.

Kugonana kumbacitike m’banja basi

Mulungu ambalewa kuti anyakulowolana wokha ndiwo omwe an’funika kumbagonana. Pa Wahebereu 13:4 pambati: ‘Malowozi yakhale yakulemekezeka kwa wense, ndipo pomwe pan’gona wanthu wakulowolana paleke kupswipizidwa, pakuti Mulungu an’dzayeruza anzazi na anyaupombo.’ Mwamuna na mkazi wakulowolana an’funika kutcenkha kufamba kunja, aciteweza piciro lawo. Iwo ambakondwa thangwe ra kubvera mtemo wa m’Bibliya wakuti: ‘Kupasa kumbabweresa cikondweso cikulu kuposa kutambira.’​—Mabasa 20:35.