Bzimogeni bzinthu bzimwebzi

Ndokoni pa menu yaciwiri

Ndokoni pa mbuto ya misolo ya nkhani

Mboni za Yahova

Cinyungwe

Nsanza ya Mulindiri (Yakupfunzira)  |  Novembro 2016

Kodi Mumbalemekeza Bukhu la Mulungu?

Kodi Mumbalemekeza Bukhu la Mulungu?

‘Pomwe mudatambira mafala ya Mulungu, . . . imwe mudayatambira . . .  ninga momwe yalidi, mafala ya Mulungu.’—1 WATESALONIKA 2:13.

NYIMBO: 114, 113

1-3. Kodi n’ciyani comwe pinango cidacitika pakati pa Ehodiya na Sintike? Kodi tingatcenkhe tani mabvuto ninga yamweya? (Onani cithunzi-thunzi pa tsamba lino.)

TIMBALEMEKEZA kwene-kwene Bibliya thangwe timbadziwa kuti iro ni Bukhu la Mulungu. Bibliya lina malango yomwe yangatithandize kutcenkha mabvuto, ndipo lingatilungamize tikaphonya. Kodi timbakhala wakukonzeka kuteweza malango yace? Kumbukirani bza akazi awiri wakudzozedwa wa m’magole dzana yakuyambirira, Ehodiya na Sintike. Bibliya limbalewa kuti iwo adakalipizana koma limbalewa lini thangwe race. Mbatikumbukireni bzomwe pinango bzidacitisa.

2 Pinango Ehodiya adacemera winango mwa abale na mpfumakazi kuti akadye kumui kwace. Tsono iye alibe kucemera Sintike. Patsogolo pace, pomwe Sintike adabva bzimwebzi, adakhumudwa kwene-kwene. Pinango iye adakumbuka kuti: ‘N’cadidi kuti Ehodiya wacitadi bzimwebzi! Ine ndikhakumbuka kuti ndife axamwali wapamtima.’ Sintike adakumbuka  kuti Ehodiya alibe kumucemera thangwe akhamufuna lini. Tenepo Sintike adacemerambo wanthu abodzi-bodzi wale kuti akadye kumui kwace koma iye alibe kucemerambo Ehodiya! Mwakusaya kupenukira, winango m’gwere adazindikira bzimwebzi. Bibliya limbalatiza kuti Paulo adawathandiza aciwalimbisa kuti akhazikise mtendere pakati pawo. Iwo adatetekera malangoyo acipitiriza kutumikira Yahova mwakukondwa.—Wafiripo 4:2, 3.

3 Nsiku zino pangawonekembo mabvuto pakati pa abale m’gwere. Koma tikateweza malango ya m’Bibliya, tingakwanise kumalisa mabvutoyo. Ayai tingayatcenkheretu. Ndipo tikambabvera bzomwe iro limbalewa, timbalatiza kuti timbalemekezadi Bukhu la Yahova.—Psalymo 27:11.

BIBLIYA LIMBATITHANDIZA KUTI TIMBAKWANISE KUBZIPHATA

4, 5. Kodi Bibliya limbatiuza malango yaponi pa nkhani yakubziphata mtima?

4 Kubziphata mtima n’cinthu cakunesa. Tingasuname ayai kukalipa, munthu akatilewa mafala yakuipa ayai akaticitira bzinthu mwakusaya cilungamo, pinango thangwe ra cikhalidwe cathu, mtundu ayai mawonekedwe yathu. Ndipo bzingatiwawe kwene-kwene penu munthu watilewayo ni m’bale ayai mpfumakazi yathu. Kodi ni malango yaponi ya m’Bibliya yomwe yangatithandize?

5 Yahova ambadziwa bzomwe bzingacitike munthu akatazira kubziphata mtima. Tikakalipa , tingalewe ayai kucita cinthu comwe patsogolo pace cingadzatidekere lini. M’Bibliya, Yahova ambatiuza kuti timbabziphate mtima mwa kulewa kuti: ‘Leka kumbafulumiza kukalipa.’ Kumbukirani mabvuto yomwe timbatcenkha tikateweza malangoya! (Werengani Mpalizi 7:9; Mimwani 16:32.) Bibliya limbatiuzambo kuti timbakhululukire winango. Jezu adalewa kuti tikasaya kukhululukira anzathu, Yahova an’dzatikhululukirambo lini. (Mateu 6:14, 15) Bwerani timbapirire ticimbafunisisa kukhululukira winango.

6. Kodi n’ciyani comwe cingacitike tikasaya kubziphata mtima?

6 Tikambasaya kubziphata mtima, ukali bwathu bungathumizirike mwakuti tingayambe kuwenga munthu winango. Ndipo tingacitise winango m’gwere kukumbukambo bzibodzi-bodzi. Napo tiyeze kubisa ukali ayai ciwengoco, winango an’dzazindikira basi. Patsogolo pace abale an’dzaleka kucita nafe tsansa. (Mimwani 26:24-26) Akulu an’dzatithandiza mwakuphatisa basa Bibliya kuti timalise ukali na ciwengoco ticikhululukira winango. (Mwambo 19:17, 18; Waroma 3:11-18) Akuluwo akacita bzimwebzi, kodi tin’dzabvera malango ya m’Bibliyayo?

YAHOVA ANKUTITSOGOLERA

7, 8. (a) Kodi Yahova ambatsogolera tani wanthu wace? (b) Kodi ni malango manango yaponi yomwe tingayagumane m’Bibliya, ndipo ni thangwe ranyi tin’funika kuyateweza?

7 Yahova ankupfunzisa na kutsogolera wanthu wace pa dziko la pansi nsiku zino. Mwa njira iponi? Iye adaikha Kristu kuti akhale ‘msolo wa gwere,’ ndipo Kristu adaikhambo ‘kapolo wakukhulupirika na wanzeru’ kuti ambapfunzise na kutsogolera wanthu wa Mulungu. (Wayefezo 5:23; Mateu 24:45-47) Ninga bungwe lakutonga la m’magole dzana yakuyambirira, kapolo umweyu ambalemekezadi Bibliya thangwe ni Fala la Mulungu. (Werengani 1 Watesalonika  2:13.) Kodi ni malango manango yaponi yomwe tingayagumane m’Bibliya?

8 Bibliya limbatiuza kuti timbatsonkhane mwakukhazikika. (Wahebereu 10:24, 25) Iro limbalimbisa kuti atumiki wense wa Mulungu an’funika kuteweza cipfunziso cibodzi. (1 Wakolinto 1:10) Limbatiuzambo kuti tipitirize ‘kuikha pakutoma Umambo bwa Mulungu.’ (Mateu 6:33) Bibliya limbatipfunzisa momwe tingapalizire ku nyumba na nyumba, m’mbuto za padeca na kuli-kwense komwe kungagumanike wanthu. (Mateu 28:19, 20; Mabasa 5:42; 17:17; 20:20) Limbauza akulu kuti apitirize kuthandiza gwere kuti likhale lakucena. (1 Wakolinto 5:1-5, 13; 1 Timotio 5:19-21) Ndipo limbatiuza kuti tin’funika kukhala wakucena mwakuthupi na kutcenkha makumbukidwe yakuipa na bzizolowezi bzomwe Yahova ambanyansidwa nabzo.—2 Wakolinto 7:1.

‘Kodi ndine wakukhulupirika kwa Jezu ndipo ndimbateweza malango ya kapolo wakukhulupirika?’

9. Kodi Jezu ankuphatisa basa mbani kuti atithandize kubvesesa Bibliya?

9 Wanthu winango ambawona kuti an’funika lini munthu kuti awafotokozere bza Bibliya. Tsono kuyambira mu 1919, Jezu ankuphatisa basa ‘kapolo wakukhulupirika na wanzeru’ kuti athandize wanthu wa Mulungu kubvesesa bzomwe Bibliya limbapfunzisa na kuteweza bzomwe iro limbalewa. Mwa kubvera Bibliya, tingathandize gwere kukhala lakucena, lamtendere na lakuphatana. Bzibvunzeni kuti, ‘Kodi ndine wakukhulupirika kwa Jezu ndipo ndimbateweza malango ya kapolo wakukhulupirika?’

NGOLO YA YAHOVA INKUTHAMANGA KWENE-KWENE!

10. Kodi bukhu la Zakiyeri limbafotokoza tani bza mbali ya gulu la Yahova la kudzulu?

10 Bibliya limbalatiza kuti atumiki wa Yahova wakudzulu mbakulinganizikambo. Mwa ciratizo, Zakiyeri adawona m’matsomphenya Yahova adapakira pa ngolo yomwe ikhathamanga kwene-kwene icimbayenda kuli-kwense komwe Yahova akhafuna. (Zakiyeri 1:4-28) Ngoloyi imbaimira mbali ya kudzulu ya gulu la Mulungu lomwe limbateweza mwakukulumiza malango yace. Ndipo mbali ya pa dziko la pansi imbacitambo bzibodzi-bodzibzo. Kumbukirani kucinja komwe kwacitika m’gulu la Mulungu m’magole 10 yapitaya. Kumbukirani kuti Yahova ndiye ankutsogolera kucinja kumweku. Tsapanopapa Kristu pabodzi na wanjo an’dzapfudza dziko lakuipali. Pan’dzawoneka lini pomwe wanthu wakunyoza Yahova pabodzi na dzina lace ayai kutsutsa katongedwe kace!

Timbatenda kwene-kwene abale azinji wakubzipereka mu cimango omwe ankuphata basa na nyongo! (Onani ndime 11)

11, 12. Kodi n’ciyani comwe gulu la Yahova linkucita m’nsiku zakumalizira zino?

11 Kumbukirani bzomwe gulu la Yahova lakwanisa kucita m’nsiku zakumalizira zino. Cimango. Abale azinji na mpfumakazi ankuphata basa na nyongo pa kumanga likulu la pa dziko lense la Mboni za Yahova ku Warwick, Nova York, América. Abale winango azinji wakubzipereka pa dziko lense la pansi ankumanga Nyumba za Umambo na nyumba za mthambi. Abale wakubziperekawa ambatsogoleredwa na Depatimenti  Yakunyang’anira bza Basa la Kumanga-manga la pa Dziko Lense. Tinkutenda kwene-kwene nyongo yomwe abalewa ankucita! Ndipo atumiki wa Yahova kuli-kwense komwe ali ambapereka bzomwe angakwanise kuti athandizire basa lakumangali. Yahova ambasimba wanthu wace thangwe ra kubzicepswa na kukhulupirika kwawo.—Luka 21:1-4.

12 Mapfunziro. Yahova ambafuna kupfunzisa wanthu wace. (Zaiya 2:2, 3) Kumbukirani bza xikola zomwe tinazo. Pana Xikola ya Utumiki bwa Upainiya, Xikola ya Apalizi wa Umambo, Xikola ya Gileyade, Xikola ya Omwe Ankuyamba Kutumikira pa Beteli, Xikola ya Anyakunyang’anira Dera na Akazi Wawo, Xikola ya Akulu wa m’Magwere, Xikola ya Utumiki bwa Umambo na Xikola ya Abale wa m’Makomiti ya Mthambi na Akazi Wawo. Ndipo pa webisaite yathu ya jw.org, timbagumana Bibliya na mabukhu manango mu bzirewedwe bzizinji. Pa webisaitepo pana mbali za wana, za mabanja na mbali ya notícia. Kodi mumbaphatisa basa jw.org mu utumiki bwakumunda na pakunamata kwanu ninga banja?

 KHALANI WAKUKHULUPIRIKA KWA YAHOVA NA GULU LACE

13. Kodi wanthu wa Yahova ana udindo buponi?

13 Ni mwayi ukulu kwene-kwene kucita mbali ya gulu la Yahova na kudziwa bzomwe iye ambafuna kwa ifepano! Pakuti timbadziwa bzomwe bzimbakondwesa Mulungu, tin’funika kumbamubvera na kucita bzinthu bzabwino. Wanthu azinji ambacita bzinthu bzakuipa, koma ifepano tin’funika ‘kuwenga cakuipa’ ninga momwe Yahova ambacitira. (Psalymo 97:10) Tin’funika lini kukhala ninga wale omwe ambawona ‘cabwino kuti n’cakuipa na cakuipa kuti n’cabwino.’ (Zaiya 5:20) Timbafuna kukondwesa Yahova, ndipopa tinkutsimikiza kukhala wakucena pa bzinthu bzense. (1 Wakolinto 6:9-11) Bzomwe Yahova ambatiuza m’Bibliya n’bzaphindu kwa ife. Ifepano timbamufuna Mulungu na kukhala wakukhulupirika kwa iye. Ndipopa timbateweza malango yace pa mui, m’gwere, ku basa, ku xikola, ayai pa mbuto iri-yense yomwe tingagumanikeyo. (Mimwani 15:3) Kumbukirani mbali zomwe tin’funika kukhala wakukhulupirika kwa Mulungu.

Abereki omwe ambafuna Yahova ambafunambo kuti wana wawo akhale pa uxamwali bwakulimba na Yahova

14. Kodi abereki angakhale tani wakukhulupirika kwa Yahova?

14 Kupfunzisa wana. Mu Bibliya, Yahova ambapereka malango kwa abereki ya momwe angapfunzisire wana wawo. Akristau an’funika kusamala kuti aleke kutengera makumbukidwe ya m’dzikoli. (Wayefezo 2:2) Mwa ciratizo, m’madziko manango, mwamuna angakumbuke kuti: ‘M’dziko lathu lino akazi ndiwo ambapfunzisa wana.’ Tsono Bibliya limbalewa kuti amuna ambapfunzise wana wawo bza Yahova. (Wayefezo 6:4) Amuna na akazi omwe ambafuna Yahova ambafunambo kuti wana wawo akhale pa uxamwali bwakulimba na Yahova, ninga momwe Samuweri adacitira pomwe akhali mwana.—1 Samuweri 3:19.

15. Kodi tingakhale tani wakukhulupirika kwa Yahova pomwe tinkucita cakusankhula cikulu?

15 Kucita bzakusankhula. Pomwe tin’funa kucita cakusankhula cikulu, tin’funika kukumbukira momwe Yahova ambawonera, na tenepo tingakhale wakukhulupirika kwa iye. Bibliya pabodzi na gulu lace bzingatithandize. Mwa ciratizo, nsiku zino abereki winango omwe ambayenda kukakhala ku dziko linango, ambatumiza mwana wawo tcece ku dziko lawo kuti akaleredwe na abale wawo. Koma aberekiwo, wense awiri baba na mai, ambapitiriza kuphata basa kuti agumane kobiri zizinji. Inde, cimweci n’cakusankhula ca ali-wense payekha, tsono iwo angadafunika kubzibvunza kuti: ‘Kodi Yahova an’dzawona tani cakusankhula cathuci?’ (Werengani Waroma 14:12.) Ni nzeru kuyamba kukumbukira bzomwe Bibliya limbalewa tikanati tacita cakusankhula cikulu pa nkhani ya banja lathu na basa. Tin’funika thandizo la baba wathu Yahova thangwe tingakwanise lini kutsogolera tekha nzayo zathu.—Jeremiya 10:23.

16. (a) Kodi mai winango akhafuna kucita ciyani pomwe mwana wace adabadwa? (b) N’ciyani cidamuthandiza kucinja cakusankhula caceco?

 16 Pomwe banja linango lidayenda kukakhala ku dziko linango, ali kumweko adabereka mwana wacimuna, tenepo iwo akhafuna kutumiza mwanayo kuti akakhale na yavu wace. Tsono pa nthaweyo, mkaziyo akhapfunza Bibliya na Mboni za Yahova. Iye adapfunza kuti ana udindo bwakupfunzisa mwana waceyo bza Yahova. (Psalymo 127:3; Mimwani 22:6) Mkaziyo adapemba kwa Yahova ninga momwe Bibliya limbatiuzira, ndipo iye adakumbira Yahova kuti amuthandize kucita comwe n’cabwino. (Psalymo 62:7, 8) Mkaziyo adauza mpfumakazi yomwe ikhamupfunzisa Bibliya bza cakusankhula cawo cire ndipo idauzambo wanthu winango wa m’gwere. Napo wanthu winango akhapitiriza kumuuza kuti atumize mwanayo kwa yavu wace, iye adawona kuti bzikhali lini bwino kucita bzimwebzo. Mwamuna wace akhawona momwe abale na mpfumakazi akhathandizira mkazi wace na mwanayo. Mwamunayo adadabwisika kwene-kwene ndipo adayamba kupfunza Bibliya na kumbayenda ku mitsonkhano pabodzi na banja lace. Kumbukirani cikondweso comwe maiyu adakhala naco pomwe adawona kuti Yahova adatawira mpembo wace!

17. Pomwe tinkupfunza Bibliya na munthu, kodi ni malango yaponi yomwe tin’funika kuyateweza?

17 Momwe timbatewezera malango. Penu ndife wakukhulupirika kwa Mulungu, tin’dzateweza malango yomwe timbatambira m’gulu lace. Mwa ciratizo, Kodi n’ciyani comwe tin’funika kucita tikandoyamba kupfunza na munthu bukhu lakuti Kodi Bibliya Limbapfunzisa Ciyani Maka-maka? Timbauzidwa kuti pambuyo pa pfunziro liri-lense timbakhale na tumphindi tung’ono-ng’ono kuti tithandize nyakupfunza kudziwa bzizinji bza gulu la Yahova. Tingaphatise basa vidiyo yakuti N’ciyani Cimbacitika mu Nyumba ya Umambo? na broxura lakuti Mbani Ankucita Kufuna kwa Yahova Lero Lino? Tikamaliza bukhu la kuti Bibliya Limbapfunzisa Ciyani, tingathandize nyakupfunzayo kukhala ‘wakukhazikika m’cikhulupiro’ mwa kupfunza naye bukhu lakuti Kodi Mungatani Kuti ‘Mulungu Apitirize Kukukondani?’,” napo penu iye wabatizidwa kale. (Wakoloso 2:7) Kodi mumbateweza malango yamweya?

18, 19. Kodi ni mathangwe yaponi yanango yomwe tin’funikira kumutenda Yahova?

18 Tina mathangwe mazinji yakutenda Yahova! Thangwe libodzi ndakuti, ‘mwa iye tina moyo timbafamba ndipo tiripo.’ (Mabasa 17:27, 28) Iye adatipasambo Bukhu lace, Bibliya. Ninga Akristau Wakutesalonika, timbatenda mphatsoyi thangwe rakuti ni mafala yakucokera kwa iye.—1 Watesalonika 2:13.

19 Bibliya limbatithandiza kuti tifendererane na Yahova, ndipo iye an’dzatifendererambo. (Tiyago 4:8) Timbatenda kwene-kwene Baba wathu pa kuticemera kuti ticite mbali m’gulu lace! Timbabva ninga momwe munembi wa Psalymo adalewera kuti: ‘Tendani Yahova, pakuti iye ngwabwino; kudeka mtima kwace kun’dzakhala mpaka kale-kale.’ (Psalymo 136:1) Pa vesi liri-lense la Psalymo 136, munembi wa psalymoli adabwerezera mafala yakuti ‘kudeka mtima kwace kun’dzakhala mpaka kale-kale.’ Inde tikakhala wakukhulupirika kwa Yahova na kuteweza malango yomwe ambatipasa m‘gulu lace, iye an’dzatipasa moyo wakusaya kumala ndipo an’dzatidekera mtima mpaka muyaya!