Bzimogeni bzinthu bzimwebzi

Ndokoni pa mbuto ya misolo ya nkhani

 Nkhani Yakupfunza 13

Mbabverani Nsisi Wanthu Omwe Mumbawapalizira

Mbabverani Nsisi Wanthu Omwe Mumbawapalizira

‘Iye adawabvera nsisi . . . Ndipo adayamba kuwapfunzisa bzinthu bzizinji.’—MARKO 6:34.

NYIMBO 70 Kufufudza Wanthu Wakuthemera

BZOMWE TIN’PFUNZA *

1. Kodi n’ciyani comwe cimbakudabwisani pa makhalidwe yomwe Jezu anayo? Fotokozani.

CINTHU cakudabwisa kwene-kwene pa makhalidwe yomwe Jezu anayo, ni kubvesesa mabvuto yomwe wanthu wakuperewerafe timbagumana nayo. Pomwe iye akhali pa dziko la pansi, adakondwa na omwe akhakondwa ndipo adalira na omwe akhalira. (Waroma 12:15) Mwa ciratizo, pomwe anyakupfunza wace 70 adabwerera wakukondwa thangwe rakuti basa lomwe akhadawauza kuti akacite lakupalizira lidawafambira bwino, Jezu ‘adakomedwa kwene-kwene mwa mzimu wakucena.’ (Luka 10:17-21) Koma pa nthawe inango, pomwe iye adawona nsunamo omwe wanthu akhanawo thangwe ra infa ya Lazaro, Jezu ‘adabuula ndipo adawawidwa mu mtima.’—Juwau 11:33.

2. Kodi n’ciyani comwe cidathandiza Jezu kubvera nsisi wanthu?

2 Napo Jezu akhali munthu wakulungamiratu, iye akhabvera nsisi wanthu wakuperewera. Kodi n’ciyani cidamuthandiza kucita bzimwebzo? Cinthu cakufunika kwene-kwene comwe cidamuthandiza, ni lufoyi lomwe iye akhanalo kwa wanthuwo. Ninga momwe tidawonera mu nkhani yomwe idapita, Jezu akhakondwa ‘thangwe ra wana wa wanthu.’ (Mimwani 8:31) Lufoyi limweri lidamuthandiza kudziwa bwino makumbukidwe ya wanthu. Mpostolo Juwau adafotokoza kuti: ‘Iye akhadziwa kale bzomwe bzikhali m’mitima ya wanthu.’ (Juwau 2:25) Jezu akhabvera nsisi wanthu. Ndipo wanthuwo adabvuma na mtima wense bzipsa bza Umambo, thangwe akhawona lufoyi lomwe Jezuyo akhanalo kwa iwo. Mpsibodzi-bodzimbo na ifepano, tikambalatiza lufoyi wanthu omwe timbawagumana mu utumiki bwakumunda, tin’dzakwanisa kuwathandiza tikambawapalizira.—2 Timotio 4:5.

3-4. (a) Tikambabvera nsisi wanthu omwe timbawagumana mu utumiki bwakumunda, kodi basa lathu lakupalizira tin’dzaliwona tani? (b) Kodi tin’pfunza ciyani mu nkhani ino?

3 Mpostolo Paulo akhadziwa kuti akhafunika kupalizira, ifepano tin’funika kucitambo bzibodzi-bodzibzi. (1 Wakolinto 9:16) Tenepo, tikambabvera nsisi wanthu omwe timbawapalizira, tin’dzawona lini basa lathu lakupalizira kukhala ninga mtolo. Tikacita bzimwebzo, tin’dzalatiza kuti timbacita thupo na wanthuwo ndipo tinkufunisisa kuwathandiza. Ifepano timbadziwa kuti ‘kupasa kumbabweresa cikondweso cikulu kuposa kutambira.’ (Mabasa 20:35) Tenepo, tin’dzakomedwa kwene-kwene tikambapalizira na cakulinga cakufuna kuthandiza wanthu.

 4 Mu nkhani ino, tin’pfunza momwe tingalatizire nsisi wanthu omwe timbawapalizira. Cakuyamba, tiniwona bzomwe tingapfunze na momwe Jezu adalatizira kuti akhabvera nsisi wanthu. Tiniwonambo njira zinai zomwe zingatithandize kutewezera ciratizo cace.—1 Pedru 2:21.

JEZU AKHABVERA NSISI WANTHU OMWE AKHAWAPALIZIRA

Nsisi zidacitisa Jezu kupalizira wanthu mafala yakutsangalaza (Onani ndime 5-6)

5-6. (a) Kodi ni wanthu aponi omwe Jezu adawabvera nsisi? (b) Mwakubverana na Zaiya 61:1, 2, thangwe ranyi Jezu adabvera nsisi wanthu omwe akhawapalizira?

5 Kumbukirani ciratizo cinango ca momwe Jezu adalatizira nsisi. Nsiku inango, Jezu pabodzi na anyakupfunza wace akhadaneta kwene-kwene thangwe adapalizira bzipsa bzabwino mwakusaya kupumira. Iwo ‘[akhasairatu] nthawe yakudya.’ Tenepo Jezu adatenga anyakupfunza wacewo aciyenda nawo ‘ku mbuto [ya kwawokha kuti akapume] pang’ono.’ Koma thimu la wanthu lire, ndiro lidayamba kufika ku mbuto komwe Jezu pabodzi na anyakupfunza wace wale akhayenda. Tsono n’ciyani comwe Jezu adacita pomwe adafika ku mbutoyo aciwona kuti wanthu wale afika kale? Iye ‘adawabvera nsisi, * thangwe wanthuwo akhali ninga mabira yakusaya m’busa. Ndipo iye adayamba kuwapfunzisa bzinthu bzizinji.’—Marko 6:30-34.

6 Thangwe ranyi Jezu adabvera nsisi wanthu wale? Iye adawona kuti wanthuwo ‘akhali ninga mabira yakusaya m’busa.’ Pinango Jezu adawona kuti winango wa iwo akhali wakusauka ndipo akhaphata basa lamphanvu kuti asamalire mabanja yawo. Ndipo pinango winango akhadasunama thangwe ra kufedwa acibale wawo. Tsono pomwe Jezu adakumbukira bzimwebzi, iye adabvesesa mabvuto yomwe wanthuwo akhagumana nayo pa moyo wawo. Ndipo ninga momwe tapfunzira mu nkhani yomwe idapita ire, pinango Jezu adagumana nayombo mabvuto manango ninga yamweyale. Tsono pakuti Jezu akhacita thupo na wanthuwo, iye adafunisisa kuwauza mafala yakuwatsangalaza.—Werengani Zaiya 61:1, 2. *

7. Kodi tingatewezere tani ciratizo ca Jezu?

7 Kodi tinkupfunza ciyani na ciratizo ca Jezu?  Ninga Jezu, ifepano tiri pakati pa wanthu omwe ali ninga ‘mabira yakusaya m’busa.’ Iwo ankugumana na mabvuto yakusiyana-siyana. Tsono ifepano tina bzipsa bza Umambo bzomwe tingawathandize nabzo. (Cibvumbulutso 14:6) Tenepo, mwakutewezera Mbuya wathu Jezu, ifepano timbapalizira bzipsa bzabwino thangwe timbabvera ‘nsisi munthu wakubzicepswa na wakusauka.’ (Psalymo 72:13) Ifepano timbabvera nsisi wanthu, ndipopa timbacita ciri-cense kuti tiwathandize.

KODI TINGABVERE TANI NSISI WANTHU OMWE TIMBAWAPALIZIRA?

Kumbukirani bzakusaya bza munthu ali-wense payekha (Onani ndime 8-9)

8. Kodi tingacite tani kuti timbabvere nsisi wanthu omwe timbawapalizira? Fotokozani ciratizo.

8 Kodi n’ciyani cingatithandize kuti timbabvere nsisi wanthu omwe timbawapaliriza? Tin’funika kudziwa makumbukidwe ya wanthu omwe timbawagumana mu utumiki bwakumunda na kubvesesa momwe iwo aliri. Pambuyo pace, tiwathandize ninga momwe ifepano tingadafunira kuthandizidwa tingadakhala kuti ndifepano. * (Mateu 7:12) Tsapano bwerani ticezerane njira zinai zomwe zingatithandize kucita bzimwebzi. Njira yakuyamba, kukumbukira mabvuto ya munthu ali-wense payekha. Tikambapalizira bzipsa bzabwino, tin’funika kundendemezera bzomwe timbacita na bzomwe dotolo ambacita pakuthandiza atenda wace. Dotolo wabwino ambadziwa mabvuto ya mtenda ali-wense. Iye ambabvunza mtendayo kuti adziwe momwe ankubvera ndipo iye akambafotokoza, dotoloyo ambatetekera mwatceru. M’mbuto mwakuthamangira kupereka mankhwala yomwe iye akukumbukira, dotoloyo cakuyamba ambapima mtendayo kuti awona bvuto lomwe analo, patsogolo pace ambapereka mankhwala yomwe yankubverana na matendayo. Mpsibodzi-bodzimbo na ifepano, tin’funika lini kumbaphatisa basa njira ibodzi na ibodzi kuti tiyambise maceza na wanthu omwe timbawapalizira mu utumiki bwakumunda. Koma tin’funika kumbabvesesa mabvuto pabodzi na makumbukidwe ya munthu ali-wense payekha.

9. Kodi n’ciyani comwe tin’funika lini kukumbuka tikagumana na munthu mu utumiki bwakumunda? Fotokozani.

9 Mukagumana na munthu mu utumiki bwakumunda, mun’funika lini kukumbuka kuti mumbadziwa mabvuto yace ayai bzomwe ambakhulupira na thangwe lomwe limbamucitisa kubzikhulupira. (Mimwani 18:13) M’mbuto mwace, mubvunzeni mwakusamala kuti mudziwe munthuyo na bzomwe iye ambakhulupira. (Mimwani 20:5) Ndipo penu kwanuko cikhalidwe canu cimbabvumiza, mubvunzeni basa lomwe ambacita, banja lace, bzomwe ambakumbuka pa nkhani zimwezi na bzinthu bzinango bzakuthumizirika. Tenepo, tikambabvunza wanthu, timbakwanisa kuzindikira momwe tingawathandizire na bzipsa bzabwino. Ndipo tikadziwa bzakusaya bzawo, bzimbakhala bzakusaya kunesa kuwabvera nsisi na kuwathandiza, ninga momwe Jezu adacitira.—Ndendemezerani na 1 Wakolinto 9:19-23.

Kumbukirani momwe bzinthu bziriri pa moyo wa munthu omwe mun’funa kumupalizira (Onani ndime 10-11)

10-11. Mwakubverana na cinembo ca 2 Wakolinto 4:7, 8, kodi njiponi njira yaciwiri yomwe ingatithandize kumbabvera nsisi wanthu omwe timbawapalizira? Fotokozani ciratizo.

10 Njira yaciwiri, kukumbukira momwe moyo wawo ungakhalire tikasaya kuwathandiza. Pakuti tensene ndife wakuperewera timbagumana na mabvuto yakusiyana-siyana. Ndipopa timbabvesesa wanthu winango akagumana na mabvuto. (1 Wakolinto 10:13) Timbadziwa kuti moyo mu nsiku zakumalizira  zino ngwakunesa kwene-kwene. Ndipo ifepano timbakwanisa kupirira kokha na thandizo la Yahova. (Werengani 2 Wakolinto 4:7, 8. *) Tsono kumbukirani bza wale omwe ali lini pa uxamwali na Yahova. Bzinkuwoneka kuti moyo wawo ngwakunesa kwene-kwene m’dzikoli mwakusaya thandizo la Yahova. Ninga Jezu, tin’funika kumbawabvera nsisi na kuwauza ‘bzipsa bzabwino pa cinthu comwe n’cabwino.’—Zaiya 52:7.

11 Kumbukirani ciratizo ca m’bale munango wakucemeredwa Sergey. Pomwe akhanati apfunza cadidi ca m’Bibliya, Sergey akhana manyazi kwene-kwene. Na bvuto limweri iye akhakwanisa lini kulewalewa na wanthu winango. Na kupita kwa nthawe, iye adabvuma kupfunza Bibliya. Iye adalewa kuti: “Pomwe ndikhapfunza Bibliya, ndidadziwa kuti Akristau an’funika kumbauza winango bzomwe ambakhulupira, koma inepano ndikhawona kuti ndingadakwanisa lini ne na pang’onopo.” Tsono n’ciyani comwe cidamuthandiza kucinja makumbukidwe yaceya? Iye adakumbukira wale omwe akhanati kubva cadidi ca m’Bibliya na kuzindikira kuti moyo wawo ungadakhala wakunesa kwene-kwene thangwe ra kusaya kudziwa Yahova. Patsogolo pace, iye adalewa kuti: “Bzipsa bzomwe ndidapfunza bzandithandiza kukhala wakukondwa na mtendere wa mu mtima. Ndipopa ndidawona kuti wanthu winango an’funikambo kudziwa cadidici.” Ndipo pomwe thupo la Sergey likhathumizirika kuna wanthu wale, iye adafunisisa kuwapalizira ndipo bvuto lace la manyazi likhamala. Iye adalewa pomwe kuti: “Thangwe ra kuuza winango bzomwe ndimbapfunza m’Bibliya, kwacitisa kuti cikhulupiro cangu cithumizirike.” *

Kuti munthu akule mwauzimu pambatenga nthawe (Onani ndime 12-13)

12-13. Thangwe ranyi tin’funika kupirira na wanthu omwe timbawapfunzisa cadidi ca m’Bibliya? Fotokozani ciratizo.

12 Njira yacitatu, mbapirirani na omwe mumbawapfunzisa cadidi ca m’Bibliya. Lekani kuyebwa kuti cadidi cinango ca m’Bibliya comwe ifepano timbacidziwa bwino, wanthu winango ambacidziwa lini. Tenepo, azinji ambatsimikizira na mtima wense kuti bzomwe adapfunza anati kudziwa cadidi ca m’Bibliya mpsacadidi. Ndipo wanthu ninga amwewa, angawone kuti bzomwe cipembedzo cawo cimbapfunzisa cingacitise mabanja yawo, cikhalidwe cawo pabodzi na dera lawo kukhala lakuphatana. Kodi tingawathandize tani wanthu amwewa?

 13 Kumbukirani ciratizoci: Kodi n’ciyani comwe cimbacitika penu pakufunika kukonza mulatho mupsa, thangwe rakuti wakale wakhalisa ndipo wadzongeka? Kawiri-kawiri, bzomwe bzimbacitika mpsakuti mulatho mupsayo ambamangidwa pomwe wanthu ankupitiriza kuphatisa basa wakale ule. Ndipo mulatho mupsayo akamala kumangidwa, wakaleyo ambagwesedwa. Mpsibodzi-bodzimbo na ifepano, tikanati kuuza wanthu kuti asiye kukhulupira bzinthu “bzakale” bzomwe iwo ambabziwona kuti mpsakufunika kwene-kwene pa moyo wawo, cakuyamba tin’funika kuwathandiza kudziwa na kufuna cadidi “cipsa” ca m’Bibliya, comwe iwo akhacidziwa lini pomwe tidayamba kupfunza nawo cadidico. Tikacita bzimwebzo tin’dzawathandiza kusiya kukhulupira bzipfunziso bzawo bzakale. Tsono pambatenga nthawe kuti wanthu acinje bzomwe ambakhulupira.—Waroma 12:2.

14-15. Kodi tingathandize tani wanthu omwe ambadziwa pang’ono ayai ambadziwa lini na pang’onopo bza cidikhiro comwe tinaco cakudzakhala na moyo wakusaya kumala pano pa dziko la pansi? Fotokozani ciratizo.

14 Tikambapirira na wanthu omwe timbawapalizira, tin’dzadikhira lini kuti iwo atetekere ayai abvume cadidi ca m’Bibliya tikagumana nawo pa ulendo bwakuyamba. M’mbuto mwace, tin’dzawathandiza pang’ono na pang’ono kuti ambakumbukire mwakusamala bzomwe Bibliya limbalewa. Mwa ciratizo, kumbukirani momwe tingauzire munthu bza cidikhiro comwe tinaco cakudzakhala na moyo wakusaya kumala, m’paraizo pano pa dziko la pansi. Pakulewa bza cidikhiroci azinji ambacidziwa pang’ono, pomwe winango ambadziwa lini ne na pang’onopo. Pinango iwo ambakhulupira kuti munthu akafa an’dzakhala lini pomwe na moyo. Ayai pinango ambakhulupira kuti wanthu wense wabwino akafa ambayenda kudzulu. Kodi tingawathandize tani wanthu amwewa?

15 M’bale munango adafotokoza momwe ambathandizira wanthu kubvesesa bza cidikhiro comwe tinaco ca kudzakhala na moyo wakusaya kumala pano pa dziko la pansi. Cakuyamba, iye ambawerenga Ciyambo 1:28. Akamala, iye ambabvunza mwenekaciro nyumba kuti, kodi Mulungu akhafuna kuti wanthu akhale na moyo uponi ndipo angadakhala nawo kuponi? Wanthu azinji ambatawira kuti, “Iye akhafuna kuti wanthu akhali na moyo wakukondwa pano pa dziko la pansi.” Patsogolo pace, m’baleyu ambawerenga cinembo ca Zaiya 55:11 ndipo akamala ambabvunza kuti, kodi Mulungu adacinja cakulinga cace? Kawiri-kawiri, mwenekaciro nyumba ambatawira kuti alibe. Pakumalizira, m’baleyu ambawerenga Psalymo 37:10, 11 ndipo akamala, ambabvunza kuti, kodi tsogolo la wanthu lin’dzakhala tani? Mwakuphatisa basa bwino Bzinembo mwa njira imweyi, m’baleyu adathandiza wanthu azinji kubvesesa kuti Mulungu an’funa kuti wanthu wabwino akhale na moyo wakusaya kumala pano pa dziko la pansi.

Kutumizira munthu tsamba lomwe lini mafala yakulimbisa, ni mbali ya kudeka mtima ndipo mpsabwino kwene-kwene (Onani ndime 16-17)

16-17. Mwakubverana na cinembo ca Mimwani 3:27, kodi njiponi njira inango yomwe ingatithandize kulatiza kuti timbabvera nsisi wanthu? Fotokozani ciratizo.

16 Njira yacinai, mbacitani bzinthu bzomwe bzingathandize wanthu kuwona kuti mumbawakumbukira. Mwa ciratizo, n’ciyani comwe tingacite tikafika pamui wa munthu, tsono mwenekaciro nyumba adatanganidwa? Cakuyamba, tin’funika kupepesa ndipo tikamala tipangane naye nthawe yomwe iye an’khala na nthawe kuti timuzungire pomwe. Koma tani penu mwenekaciro nyumba tamugumana ankucita kabasa kakucepa ndipo iye ankufuna thandizo? Ayai kodi tingacite tani penu mwenekaciro nyumba ankukwanisa lini kucoka pamui thangwe ra kuduwala ayai kukalamba koma akufuna thandizo  la bzinthu bzinango? Pa bzakucitika ninga bzimwebzi, tin’funika kucita ciri-cense kuti tiwathandize wanthuwo.—Werengani Mimwani 3:27. *

17 Mpfumakazi inango idakhala na bzakutewera bzabwino pomwe idalatiza kuti ikhabvera nsisi banja linango. Pomwe mpfumakaziyo idawona msunamo omwe banjalo likhanawo thangwe ra kufedwa mwana wawo, mpfumakaziyo idanembera tsamba banjalo, ndipo pa tsambalo adanemba mavesi manango yakutsangalaza. Kodi banjalo lidatokonyedwa tani na mafala ya tsambalo? Mai nyakufedwayo adanemba kuti, “Dzulo, ndikhadasunama kwene-kwene, ndikhakumbukira lini kuti tsamba lanu lingadatithandiza mwa njira imweyi, ndipopa ndikutenda tsambali thangwe latitsangalaza kwene-kwene. Ndipo ndidawerenga tsamba lanuli maulendo yakupitirira 20. Inepano ndikhakhulupira lini kuti mafala ya tsambali yangadandidekera, kunditsangalaza na kundilimbisa. Ndikutenda na mtima wense thandizo lanu.” Tinkupenukira lini kuti, tikambawona mabvuto yomwe wanthu ankugumana nayo ninga kuti yankucitikira ifepano na kucita ciri-cense kuti tiwathandize tin’dzakhala na bzakutewera bzabwino.

PITIRIZANI KUBVERA NSISI WANTHU WENSE NAPO ALEKE KUTETEKERA BZIPSA BZABWINO

18. Mwakubverana na cinembo ca 1 Wakolinto 3:6, 7, thangwe ranyi tin’funika kumbabvera nsisi wanthu omwe timbawapalizira napo aleke kutetekera bzipsa bzabwino?

18 Kulewa cadidi, ifepano tin’funika kupitiriza kubvera nsisi wanthu mu utumiki bwakumunda napo aleke kutetekera bzipsa bzomwe timbawapalizira. Thangwe ranyi tinkulewa tenepoyo? Thangwe ndakuti ifepano timbacita mbali yakuthandiza wanthu kuti apfunze bza Mulungu, koma timbacita lini mbali ikulu ya basali yomwe njakuthandiza wanthuwo kukula. (Werengani 1 Wakolinto 3:6, 7. *) Yahova ni omwe ambakwewa wanthu kuti abwere kwa iye. (Juwau 6:44) Tenepo, munthu ali-wense angabvume ayai angalambe bzipsa bzabwino mwakubverana na momwe mtima wace uliri. (Mateu 13:4-8) Kumbukirani kuti wanthu azinji wa mu nthawe ya Jezu alibe kubvuma bzipsa bzabwino, napo kuti iye akhali Mpfunzisi mkulu kuposa wense omwe adakhala kale pa dziko la pansi! Tenepo, tin’funika lini kumbakalipa penu wanthu omwe tikuwathandiza kupfunza bza Mulungu ankutetekera lini bzipsa bzabwino.

19. Kodi tin’dzagumana phindu liponi thangwe ra kubvera nsisi wanthu omwe timbawapalizira?

19 Tikapitiriza kumbabvera nsisi wanthu omwe timbawapalizira, tin’dzagumana phindu likulu kwene-kwene. Tin’dzakomedwa kwene-kwene na basa lathu lakupalizira. Tin’dzagumana cikondweso cikulu comwe cimbabwera thangwe ra kupasa. Ndipo tin’dzathandiza wale omwe ana ‘makumbukidwe yabwino yomwe yangawathandize kukagumana moyo wakusaya kumala,’ kubvuma bzipsa bzabwino. (Mabasa 13:48) Tenepo, ‘pomwe tikanawo mpata, mbaticitireni wense bzabwino, maka-maka abale wathu wa m’cikhulupiro.’ (Wagalata 6:10) Tikacita bzimwebzi tin’dzakondwesa Baba wanthu wakudzulu.—Mateu 5:16.

NYIMBO 64 Kuphata Basa la Kubvuna Mwakukondwa

^ ndi. 5 Tikambabvera nsisi wanthu mu utumiki bwakumunda, cikondweso cathu cin’dzathumizirika ndipo wanthuwo an’dzafunisisa kutetekera bzipsa bzabwino. Mwanjira iponi? Mu nkhani ino, tiniwona bzomwe tingapfunze na ciratizo ca Jezu, tiniwonambo njira zinai zomwe zingatithandize kumbabvera nsisi wanthu omwe timbawapalizira.

^ ndi. 5 KAFOTOKOZEDWE KA MAFALA MANANGO: Fala lakuti nsisi lomwe limbagumanika m’Bibliya, limbathandauza kudekera mtima munthu omwe ankubonera ayai wacitiridwa bzinthu mwakusaya cirungamo. Tenepo, nsisi zimbacitisa munthu kucita ciri-cense comwe angakwanise kuti athandize wanthu winango.

^ ndi. 6 Zaiya 61:1 Mzimu wa Yahova, Mbuya Mkululetu uli pa ine, pakuti Yahova wandidzoza kuti ndikapalizire bzipsa bzabwino kwa wanthu wakufatsa. Wandituma kuti ndikapoze wanthu wa mitima yakusweka, kuti ndikadziwise ufulu kwa anyakuyendesedwa ku ukapolo, na kufungulidwa kwa maso ya anyakufungiridwa m’kawoko. 2 Wandituma kuti ndikadziwise bza gole lomwe Yahova an’dzadekera mtima wanthu, na bza nsiku yakubwezera ya Mulungu wathu. Ndipo wanditumambo kuti ndikatsangalaze wanthu wense omwe ankulira.

^ ndi. 8 Onani nkhani yakuti Muzichitira Anthu Zimene Mungafune Kuti Akuchitirenimu Nsanja ya Olonda ya 15 Maio, 2014.

^ ndi. 10 2 Wakolinto 4:7 Na tenepo tina cuma ici m’bzombo bza dongo kuti mphanvu yakuposa yacibadwa icokere kwa Mulungu, sikuti kwa ifepano. Timbapanikizidwa mwa mtundu uli-wense, koma sikuti mwa kucita kutaziriratu kupfukunyuka; Nzeru zimbatimalira, koma sikuti mwa kusairatu kudziwa bzomwe tingacite.

^ ndi. 11 Onani Nsanja ya Olonda ya 1 Agosto, 2011, matsamba 21-22.

^ ndi. 16 Mimwani 3:27 Leka kusiya kucitira bzabwino wale omwe un’funika kuwacitira bzimwebzo, ukakhala iwepo un’kwanisa kuwathandiza.

^ ndi. 18 1 Wakolinto 3:6 Ine ndidabzala, Apolo adathirizira tsono Mulungu ndiye akhakulisa. 7 Pakuti omwe ambabzala ayai omwe ambathirizira n’cinthu lini, koma Mulungu omwe ambakulisa.