Bzimogeni bzinthu bzimwebzi

Ndokoni pa menu yaciwiri

Ndokoni pa mbuto ya misolo ya nkhani

Mboni za Yahova

Cinyungwe

Nsanza ya Mulindiri—Yakupfunzira  |  Maio 2017

Pitirizani Kulimbisa Lufoyi Lanu kwa Yahova

Pitirizani Kulimbisa Lufoyi Lanu kwa Yahova

‘Thangwe ra kuthumizirika kwa kusaya kubvera bzakutonga, lufoyi la azinji lin’dzamala mphanvu.’—MATEU 24:12.

NYIMBO: 20, 76

1, 2. (a) Kodi ni lini pomwe mafala ya Jezu yakugumanika pa Mateu 24:12 yadayamba kukwanirisidwa? (b) Kodi bukhu la Mabasa limbalatiza tani kuti azinji mwa Akristau wakuyambirira adapitiriza kulimbisa lufoyi lawo? (Onani cithunzi-thunzi pa tsamba lino.)

POMWE Jezu akhali pansi pano, iye adafotokoza bzinthu bzomwe bzingadathandiza wanthu kuzindikira ‘mamaliziro ya nthawe ino.’ Ndipo pakufotokoza bzinango mwa bzinthu bzimwebzi, Jezu adati: ‘Lufoyi la azinji lin’dzamala mphanvu.’ (Mateu 24:3, 12) M’magole dzana yakutoma, Ajuda akhalewa kuti akhali atumiki wa Mulungu, koma iwo alibe kupitiriza kulimbisa lufoyi lawo kwa Mulungu.

2 Tsono mwakusiyana na Ajudawa, Akristau azinji wa m’nthawe imweire, akhawona bzinthu mwakusiyana. Iwo akhapalizira ‘bzipsa bzabwino bzakulewa bza Kristu’ na nyongo, akhafuna Mulungu, abale wawo wauzimu na wanthu omwe akhanati kudziwa cadidi. Akristauwa adapitiriza kulimbisa lufoyi lawo kwa Mulungu. (Mabasa 2:44-47; 5:42) Tsono bzakupasa nsisi mpsakuti Akristau wakuyambirira winango, adalekerera lufoyi lawo kudjedjera. Kodi tinkudziwa tani bzimwebzi?

3. Kodi n’ciyani comwe cidacitisa kuti lufoyi la Akristau winango wa ku Efezo lidjedjere?

 3 Jezu adauza Akristau wakuyambirira wa ku Efezo kuti: ‘Ndakugumana na mulandu wakuti linkumala lufoyi lomwe ukhanalo pakuyamba lire.’ (Cibvumbulutso 2:4) Bzinkuwoneka kuti Akristau wa ku Efezo akhambatewezera wanthu wa ku dziko, omwe akhandofuna kucita bzinthu bza kubzikondwesa wokha. (Wayefezo 2:2, 3) Efezo ukhali mzinda wakudala ndipo wanthu wace akhacita thupo kwene-kwene na kukhala na moyo wabwino pabodzi na cuma. Ndipo wanthu azinji akhacita bza unzazi ndipo akhalemekeza lini mitemo ya Mulungu. M’mbuto mwakufuna Mulungu na wanthu anzawo, iwo akhandofuna kubzikondwesa wokha basi.

4. (a) N’thangwe ranyi lufoyi la azinji linkudjedjera nsiku zino? (b) Kodi ni mbali zitatu ziponi zomwe tin’funika kupitiriza kulimbisa lufoyi lathu?

4 Mafala ya Jezu yakulewa bza kudjedjera kwa lufoyi, yankukwanisikambo nsiku zino. Wanthu azinji nsiku zino ambafuna lini Mulungu na pang’onopo. M’mbuto mwa kuthemba Mulungu kuti adzamalise mabvuto yense ya pa dziko la pansi, wanthu bzulu na bzulu ambathemba maboma ya wanthu, ndipo lufoyi lawo linkudjedjera. Ninga Akristau wa ku Efezo wale, lufoyi la atumiki wa Yahova lingadjedjerembo nsiku zino. Tenepo, mbaticezeraneni mbali zitatu zomwe tin’funika kupitiriza kulimbisa lufoyi lathu: (1) Kufuna Yahova, (2) Kufuna cadidi ca m’Bibliya na (3) Kufuna abale wathu.

KUFUNA YAHOVA

5. N’thangwe ranyi tin’funika kumbafuna Mulungu?

5 Kodi ni mbani omwe tin’funika kumufuna kwene-kwene? Jezu adati: ‘Umbafune Yahova, Mulungu wako, na mtima wako wense, na moyo wako wense, na nzeru zako zense. Cimweci ndico cakutonga cikululetu na cakutoma.’ (Mateu 22:37, 38) Lufoyi lathu kwa Mulungu limbatithandiza kubvera malamulo yace, kupirira na kumbawenga bzinthu bzakuipa. (Werengani Psalymo 97:10.) Tsono Sathani na dziko laceri ambacita nyongo yakutepesa lufoyi lathu kwa Mulungu.

6. Kodi ndiponi bvuto la kubzikondwesa tekha m’mbuto mwakukondwesa Mulungu?

6 Wanthu wa m’dzikoli ambawona lufoyi m’njira yakuphonyeka. M’mbuto mwakufuna Mulungu, wanthu azinji ‘mbakubzifuna.’ (2 Timotio 3:2) Iwo ambafuna kuteweza ‘cikhumbo ca thupi, cikhumbo ca maso na kubziwonesera pa bzinthu bzomwe munthu anabzo.’ (1 Juwau 2:16) Mpostolo Paulo adacenjeza bza bvuto la kumbabzikondwesa tekha. Iye adati: ‘Kuikha makumbukidwe pa bzinthu bzakuthupi kumbathandauza infa.’ Thangwe ranyi? Thangwe omwe ambacita bzimwebzi ambakhala anyamadulanthaka wa Mulungu. (Waroma 8:6, 7) Wanthu omwe ambamala nthawe izinji ya moyo wawo ankufuna cuma na kukwanirisa bzikhumbo bzawo bzakugonana, kawiri-kawiri ambakhala lini wakukondwa.—1 Wakolinto 6:18; 1 Timotio 6:9, 10.

7. Kodi Akristau angapumpsidwe na nzeru ziponi nsiku zino?

7 Wanthu azinji omwe ambakhulupira lini Mulungu na omwe ambakhulupira kuti moyo udacita kusandulika, ambacita nyongo yakucitisa winango kuleka kumbafuna Mulungu ne kukhulupira kuti iye alipodi. Iwo ambacitisa kuti munthu omwe ambakhulupira kuti kuna Mulengi, awoneke ninga psiru ayai nyakusaya nzeru. Ndipo wanthu azinji ambalemekeza kwene-kwene masiyentista, m’mbuto mwa kulemekeza Mulungu omwe ni Mulengi. (Waroma 1:25) Akristau angapumpsidwembo na nzeru zimwezi. Bzimwebzi bzingatepese uxamwali bwathu na Yahova, ndipo lufoyi lathu lingadjedjere.—Wahebereu 3:12.

8. (a) Kodi ni mabvuto yaponi yomwe yangatepese atumiki wa Yahova? (b) Kodi mafala ya pa Psalymo 136 yangatilimbise tani?

 8 Tinkukhala m’nsiku zakumalizira za nkonzedwe wakuipa wa Sathani, tenepo tina mathangwe mazinji yomwe yangaticitise kumbataya mtima nthawe zinango. (1 Juwau 5:19) Tsono kutaya mtima mwakunyanyira, kungatepese cikhulupiro cathu ndipo lufoyi lathu lingadjedjere. Mwa ciratizo, pinango ifepano tingagumane na mabvuto mazinji thangwe ra kukalamba, kuduwala ayai bvuto la cuma. Ayai pinango tingasuname thangwe tinkukwanisa lini kucita bzinthu bzinango ninga momwe tikhafunira. Ndipo tingasunamembo thangwe rakuti bzinthu bzinango bziribe kucitika ninga momwe tikhadikhirira pa moyo wathu. Bziribe basa bzomwe bzingaticitikire, tin’funika lini kumbakumbuka kuti Yahova watitaya. M’mbuto mwace, timbakumbukire mafala yakulimbisa yakugumanika pa Psalymo 136:23 yakuti: ‘Iye adatikumbukira pomwe tikhanyazidwa, pakuti lufoyi lace lakukhulupirika ndakusaya kumala.’ Tingatsimikizire na mtima wathu wense kuti Yahova ambabva ‘madandaulo yathu yakukumbira thandizo’ ndipo iye an’dzayatawira pa nthawe yace.—Psalymo 116:1; 136:24-26.

9. Kodi n’ciyani comwe cidathandiza Paulo kupitiriza kulimbisa lufoyi lace kwa Mulungu?

9 Mpostolo Paulo akhali mtumiki wa Yahova omwe akhakumbukira momwe Yahova akhadamuthandizira ndipo bzimwebzi bzidamucitisa kupitiriza kukhala wakulimba. Iye adanemba kuti: ‘Yahova ndiye mthandizi wangu, cipo ndicidzacita mantha. Munthu angandicitenyi?’ (Wahebereu 13:6) Kukhulupira Yahova komwe Paulo akhacitaku, kudamuthandiza kulimbana na mabvuto mazinji yomwe akhagumana nayo pa moyo wace. Ndipo pomwe iye adagumana na mabvuto makulu, alibe kusiya kumbakhulupira Yahova. Napo pomwe akhali m’kawoko, Paulo akhalimbisa Akristau anzace mwa kumbawanembera matsamba m’magwere. (Wayefezo 4:1; Wafiripo 1:7; Filemoni 1) Bziribe basa mabvuto yomwe Paulo adagumana nayo, iye adapitiriza kulimbisa lufoyi lace kwa Yahova. Iye adakhulupira ‘Mulungu omwe ambatitsangalaza mu njira iri-yense, omwe ambatitsangalaza pa matsautso yathu yense.’ (2 Wakolinto 1:3, 4) Kodi ifepanombo tingatewezere tani Paulo?

Latizani lufoyi kwa Yahova (Onani ndime 10)

10. Kodi tingapitirize tani kulimbisa lufoyi lathu kwa Yahova?

 10 Paulo, adafotokoza cinthu cibodzi comwe cingatithandize kupitiriza kulimbisa lufoyi lathu kwa Mulungu. Iye adati: ‘Mbapembani nthawe zense’ ndipo adathumizira pomwe kuti: ‘Limbikirani kumbapemba.’ (1 Watesalonika 5:17; Waroma 12:12) N’thangwe ranyi mpembo umbatithandiza kufendererana na Mulungu? Thangwe ndakuti timbakhala tinkulewalewa na Yahova. Ndipo bzimwebzi bzimbaticitisa kukhala pa uxamwali bwakulimba na iye. (Psalymo 86:3) Tikambauza Yahova Baba wathu bza mumtima mwathu na momwe tinkubvera, timbafendererana naye. (Psalymo 65:2) Ndipo tikambawona Yahova ankutawira mipembo yathu, lufoyi lathu kwa iye limbakula. Tina citsimikizo cense cakuti ‘Yahova ali pafupi na wense omwe ambamucemera.’ (Psalymo 145:18) Ndipo tikambakhulupira lufoyi lomwe Yahova analo kwa ife na thandizo lomwe iye ambatipasa, ifepano tin’dzakwanisa kulimbana na mabvuto yense yomwe tingagumane nayo tsapanopa ayai kutsogolo.

KUFUNA CADIDI CA M’BIBLIYA

11, 12. Kodi tingakulise tani lufoyi lathu pa cadidi ca m’Bibliya?

11 Ninga Akristau, ifepano timbafuna cadidi, ndipo timbagumana cadidi cimweci m’Fala la Mulungu. Jezu adauza Baba wace kuti: ‘Fala lanu ni cadidi.’ (Juwau 17:17) Kuti tifune cadidi ca m’Bibliya, ifepano tin’funika kudziwa bzomwe bzidanembedwa m’Bibliyamo. (Wakoloso 1:10) Koma mpsimwebzi lini bzokha. Onani bzinthu bzinango bzomwe tin’funika kucita mwakubverana na munembi wa Psalymo 119. (Werengani Psalymo 119:97-100.) Nsiku zense tin’funika kumbapambula nthawe ya kukumbukira bzomwe tawerenga m’Bibliya na kuwona momwe tingabziphatisire basa pa moyo wathu. Ndipo kucita bzimwebzi kun’dzacitisa kuti lufoyi lathu pa cadidi lithumizirike.

12 Nyakunemba Psalymo adalewambo kuti: ‘Mafala yanu yambatapira mkamwa mwangu, kuposa uci pa mulomo pangu!’ (Psalymo 119:103) Mabukhu yomwe Gulu la Mulungu limbakonza, yali ninga cakudya cakukoma kwene-kwene. Tikambadya cakudya comwe timbacifuna, ifepano timbacidya mwakamderekho. Mpsibodzi-bodzimbo na kupfunza Bibliya, tin’funika kumbalipfunza mwakamderekho. Tikambacita bzimwebzi, tin’dzakomedwa na ‘mafala yabwino’ ya cadidi, ndipo bzin’dzanesa lini kukumbukira bzomwe tawerengabzo pakulimbisa anzathu.—Mpalizi 12:10.

13. Kodi n’ciyani comwe cidathandiza Jeremiya kumbafuna mafala ya Mulungu? Ndipo bzimwebzi bzidamulimbisa kucita ciyani?

13 Mpolofeta Jeremiya, akhafuna kwene-kwene mafala ya Mulungu. Iye adati: ‘Nditayagumana mafala yanu, inepano ndidayadya. Ndipo fala lanu limbakondwesa mtima wangu, pakuti inepano ndimbacemeredwa na dzina lanu, imwe Yahova, Mulungu wa anyankhondo.’ (Jeremiya 15:16) Jeremiya akhakumbukira mafala ya Mulungu ndipo akhayafuna kwene-kwene. Iye akhatenda kwene-kwene kudziwika na dzina la Yahova ndipo akhauza wanthu bza mafala yace. Tikambafuna cadidi ca m’Bibliya, ifepano tin’dzawona kuti ni mwayi ukulu kukhala Mboni za Yahova, ndipo tin’dzauzambo winango bza Umambo bwa Mulungu m’nsiku zakumalizira zino.

Funani cadidi ca m’Bibliya (Onani ndime 14)

14. Kodi n’ciyani cinango comwe tingacite kuti tikulise lufoyi lathu pa cadidi ca m’Bibliya?

14 Kodi n’ciyani cinango comwe cingatithandize kukulisa lufoyi lathu pa cadidi ca m’Bibliya? Tin’funika kumbagumanika ku mitsonkhano  yathu ya gwere nthawe zense, thangwe kumweko timbapfunzisidwa na Yahova. Ndipo njira ibodzi yomwe Yahova ambatipfunzisira ku mitsonkhano, ni pfunziro la Nsanza ya Mulindiri. Tenepo, kuti timbagumane phindu na pfunziroli, tin’funika kumbakonzekereratu nsiku ya mitsonkhano inati kufika. Nsiku zino, revistayi inkugumanika m’bzirewedwe bzizinji mu webisaite yathu ya jw.org na mu JW Library ndipo azinji angaicose m’mitedwe ya m’manja ayai mu tablet mwakusaya kunesa kuti akonzekere. Pakukonzekerapo, mpsakukwanisika kuwerenga mavesi yomwe yankugumanika m’ndimezo. Tenepo bziribe basa penu tin’konzekera mwa kuphatisa basa tablet ayai revista yakudindidwa, tin’funika kumbawerenga mavesi ya ndimezo mwakamderekho, ticimbayakumbukira. Kucita bzimwebzi kun’dzatithandiza kukulisa lufoyi lathu pa cadidi ca m’Bibliya.—Werengani Psalymo 1:2.

KUFUNA ABALE WATHU

15, 16. (a) Mwakubverana na Juwau 13:34, 35, kodi n’ciyani comwe Jezu adatiuza kuti timbacite? (b) Kodi kufuna Mulungu na Bibliya, kumbabverana tani na kumbafuna abale wathu?

15 Usiku bomwe angadaphedwa mangwana yace, Jezu adauza anyakupfunza wace kuti: ‘Ndin’kukupasani cakutonga cipsa cakuti mumbafunane mwekha-mwekha; ninga momwe ine ndidakufunani, imwepo mumbafunanembo mwekha-mwekha. Na bzimwebzo, wense an’dzadziwa kuti ndimwe anyakupfunza wangu, mukambafunana.’—Juwau 13:34, 35.

16 Kufuna abale na mpfumakazi zathu kumbabverana na kufuna Yahova. Penu timbafuna lini Mulungu, tingafunembo lini abale wathu. Ndipo penu timbafuna lini abale wathu, tingafunembo lini Mulungu. Mpostolo Juwau adanemba kuti: ‘Pakuti omwe ambawenga m’bale wace omwe ambamuwona, angafune lini Mulungu, omwe akanati Kumuwona.ʼ (1 Juwau 4:20) Kufuna Yahova na abale wathu, kumbabveranambo na kufuna Bibliya. Thangwe ranyi? Thangwe tikambafuna  bzomwe timbapfunza m’Bibliya, ifepano tin’dzafunambo kubvera mitemo yakugumanika m’mwemo yomwe imbatiuza kuti timbafune Mulungu na abale wathu.—1 Pedru 1:22; 1 Juwau 4:21.

Latizani lufoyi kuna abale na mpfumakazi zathu (Onani ndime 17)

17. Kodi ni njira zinango ziponi zomwe tingalatizire lufoyi?

17 Werengani 1 Watesalonika 4:9, 10. Kodi ni njira zinango ziponi zomwe tingalatizire lufoyi kwa abale na mpfumakazi za m’gwere mwathu? M’bale ayai mpfumakazi yakukalamba, pinango ingafune thandizo kuti iyende ku mitsonkhano ya gwere. Mkazi mansiwa pinango angafune thandizo kuti akonze cinthu cinango comwe cadzongeka kumui kwace. (Juwau 1:27) Ndipo tingatsangalazembo na kulimbisa abale na mpfumakazi omwe atepa, adasunama ayai ankulimbana na mabvuto manango. (Mimwani 12:25; Wakoloso 4:11) Tingalatize kuti timbafuna ‘abale wathu m’cikhulupiro’ mwa mafala na bzicito bzathu.—Wagalata 6:10.

18. Penu takhumudwisana na abale wathu, kodi n’ciyani comwe cingatithandize kumalisa bvutolo?

18 Bibliya lidaleweratu kuti ‘m’nsiku zakumalizira’ za mkonzedwe uno wa bzinthu, wanthu azinji angadakhala wakubzifuna na wakufunisisa kobiri. (2 Timotio 3:1, 2) Ninga Akristau, tin’funika kucita nyongo kuti tipitirize kufuna Yahova, Fala lace na abale wathu. Pakuti ndife wakuperewera, nthawe zinango tingakhumudwisane na abale wathu. Tsono pakuti timbafunana, ifepano tin’dzacita nyongo yakumalisa bvutolo mwakamfulumize. (Wayefezo 4:32; Wakoloso 3:14) Tin’funika lini kubvuma kuti lufoyi lathu lidjedjere! M’mbuto mwace mbatipitirizeni kukulisa lufoyi lathu kwa Yahova, Fala lace na abale wathu.