Bzimogeni bzinthu bzimwebzi

Ndokoni pa menu yaciwiri

Ndokoni pa mbuto ya misolo ya nkhani

Mboni za Yahova

Cinyungwe

Nsanza ya Mulindiri—Yakupfunzira  |  Janeiro 2016

Tendani Mulungu Thangwe ra ‘Mphaso ya Fovolo Yomwe iye Adatipasa’

Tendani Mulungu Thangwe ra ‘Mphaso ya Fovolo Yomwe iye Adatipasa’

‘Tinkutenda Mulungu thangwe ra kutipasa mphaso ya fovolo yomwe tingakwanise lini kuifotokoza.’2 WAK. 9:15.

NYIMBO: 121, 63

1, 2. (a) Kodi ‘mphaso ya fovolo yomwe tingakwanise lini kuifotokoza’ imbaphatanidza ciyani? (b) Kodi mu nkhani ino tin’fotokozerana mibvunzo iponi?

POMWE Yahova adatuma mwana wace wakuyamba kubadwa pansi pano, iye adapereka mphaso yomwe ingadakhala ikulu pa mphaso zense za lufoyi! (Ju. 3:16; 1 Ju. 4:9, 10) Mpostolo Paulo adaicemera kuti ‘mphaso ya fovolo yomwe tingakwanise lini kuifotokoza.’ (2 Wak. 9:15) Thangwe ranyi iye adalewa fala limweri?

2 Paulo akhadziwa kuti mapiciro yense yakufunika kwene-kwene yomwe Mulungu adayalewa yan’dzakwanisika thangwe ra mphaso yakulungamiratu ya Kristu. (Werengani 2 Wakolinto 1:20.) Tenepo ‘mphaso ya fovolo yomwe tingakwanise lini kuifotokoza’ imweyi imbaphatanidza kudeka mtima kukulu pabodzi na lufoyi cairo lomwe Yahova adatilatiza mwa Jezu Kristu. Cadidi n’cakuti, mphaso ya fovolo imweyi njapadzulu kwene-kwene ndipo tingakwanise lini kuifotokoza na mafala yathu-yathu. Kodi tin’funa kuiwona tani mphaso ikulu yomwe ifepano tapasidwa? Ndipo kodi mphaso imweyi ingatithandize mu njira ziponi pomwe tinkukonzekera cikumbuso comwe cin’dzacitika pa citatu 23 Março, 2016?

 MPHASO YAKUPAMBULIKA YA MULUNGU

3, 4. (a) Kodi mumbabva tani mukapasidwa mphaso? (b) Kodi mphaso yakupambulika ya lufoyi, ingatithandize tani momwe timbacitira bzinthu pa moyo wanthu wa nsiku na nsiku?

3 Imwepo mukapasidwa mphaso, mwakusaya kupenukira mumbadekedwa nayo kwene-kwene mphasoyo. Tenepo mphaso zinango zimbakhala zakupambulika ndipo zinango zimbakhala zakufunika kwene-kwene zomwe zingathandauze kucinja moyo wanu. Mwa ciratizo, tiyezeze kuti imwepo mwatambira cirango cakuti muphedwe thangwe rakuti mwacita cinthu cakuphonyeka comwe munkuthemera kuphedwa. Mwadzidzidzi, munkuwona munthu omwe imwepo mumbamudziwa lini ankucoka pa gulu la wathu womwe ankubvesera mulandu wanuyo ndipo ankubzipereka kuti atambire ndiye cirangoco m’mbuto mwanu. Inde, iye ankubzipereka kuti aphedwe m’mbuto mwanu! Kodi mphasoyo ingadakhala yakufunika kwene-kwene kwa imwepo?

4 Kutambira mphaso yakubzipereka ya lufoyi imweyi, mwakusaya kupenukira kungadacinja moyo wanu na momwe mumbacitira bzinthu. Na mphasoyo mungadakhalambo munthu wakudeka mtima na walufoyi, ndipo ingadakucitisani kumbalekerera wanthu womwe wakuphonyerani. Ndipo pa moyo wanu wense imwepo mungadayebwa lini munthu omwe wabzipereka kuti aphedwe m’mbuto mwanu.

5. Kodi thangwe ranyi mphaso ya cakulombolera yomwe Mulungu watipasa njakufunika kwene-kwene kuposa mphaso ina iri-yense?

5 Tenepo, mphaso yomwe Yahova watipasa njakufunika kwene-kwene kuposa mphaso yomwe yalewedwa m’ciratizoci. (1 Pe. 3:18) Thangwe ranyi tinkulewa tenepo? Thangwe ndakuti tense tidabadwa na pikado ndipo cirango cace ni infa. (War. 5:12) Mwa lufoyi lace, Yahova adatuma Jezu kubwera pansi pano kuti ‘adzalawidze infa m’mbuto mwa wanthu wense.’ (Waheb. 2:9) Sikuti Yahova watipasa mphaso yakuti tidzakhale na moyo wakusaya kumala basi, koma iye wacitiratu makonzedwe ya kudzapfudza infa kwa muyaya. (Zai. 25:7, 8; 1 Wak. 15:22, 26) Wense womwe wan’khulupira Jezu wan’dzakhala na moyo wakusaya kumala wa mtendere na wacikondweso, kwa wale womwe wan’dzakhala nzika za Umambo bwa Mulungu wan’dzatambira dziko lapansi, kwa Akristau wakudzozedwa wan’dzatonga pabodzi na Kristu mu Umambo bwa Mulungu. (War. 6:23; Cibv. 5:9, 10) Kodi ni bzisimbo bzinango bziponi bzomwe bzinkuphatanidzidwa mwa mphaso imweyi yomwe Yahova watipasa?

6. (a) Kodi bzisimbo bza Yahova bzomwe bzimbabwera thangwe ra ‘mphaso ya fovolo yomwe tingakwanise lini kuifotokoza’ mpsakufunika tani kwa imwepo? (b) Kodi mu nkhani ino tin’fotokozerana njira zitatu ziponi zomwe lufoyi la Mulungu limbatilimbisa kucita?

6 Mphaso ya Yahova imbaphatanidza kudzapoza matenda yathu yense, kucinja dziko kukhala paraizo na kulamusa anyakufa. (Zai. 33:24; 35:5, 6; Ju. 5:28, 29) Ifepano timbamufuna Yahova na mwana wace wakufunidwa pakutipasa ‘mphaso ya fovolo yomwe tingakwanise lini kuifotokoza’ imweyi. Tenepo mbvunzo omwe tin’funika kubzibvunza nguyu: Kodi lufoyi la Mulungu limweri lin’funika kutilimbisa kucita ciyani? Mbatifotokozerane bzomwe lufoyi la Mulungu lingatilimbise kucita (1) mwa kuteweza mathanya ya Jezu mwa pafupi kwene-kwene, (2) mwa kulatiza lufoyi kwa abale wathu na (3) mwa kumbalekerera winango kucokera pansi pamtima.

‘LUFOYI LA KRISTU NDIRO LOMWE LIMBATIKAKAMIZA’

7, 8. Kodi tin’funika kubva tani mu mtima thangwe ra lufoyi la Kristu, ndipo tinkulimbisidwa kucita ciyani?

7 Cakuyamba, tin’funika kukhala wakukakamizika kuti tikhale na moyo mwa Kristu Jezu. Mpostolo Paulo adalewa kuti: ‘Pakuti lufoyi la Kristu ndiro lomwe limbatikakamiza.’ (Werengani 2 Wakolinto 5:14, 15.) Paulo adazindikira kuti iye angadatambira lini lufoyi likulu la Kristu mwakusaya kukakamizika kukhala mwa iye. Tikabvesesa bzomwe Yahova waticitira, mitima yathu imbatokonyedwa na lufoyi lace ndipo tin’dzafuna kukhala na moyo wakukondwesa ule omwe adatifera Jezu Kristu. Kodi tin’dzalatiza tani kuti tin’funadi kukhala mwa Kristu Jezu?

8 Wale womwe wambafuna Yahova wambakhala wakukakamizika kutewezera ciratizo ca Jezu, mwa  kufamba ninga momwe iye akhafambira na kutewera mathanya yace mwa pafupi kwene-kwene. (1 Pe. 2:21; 1 Ju. 2:6) Mwa kubvera kwathu, tin’dzalatiza lufoyi lathu kwa Mulungu na Kristu. Jezu adati: ‘Munthu, omwe an’tambira bzakutonga bzangu, acibzisunga, umweyo ndiye ambandifuna. Ndipo munthu, omwe ambandifuna inepano, Baba wangu an’dzamufunambo, ndipo inepano ndin’dzamufunambo ndipo ndin’dzabziwonesera bwino-bwino kwa iye.’—Ju. 14:21; 1 Ju. 5:3.

9. Kodi ni mapumpso yaponi yomwe ateweri wa Jezu wambagumana nayo?

9 Pa nyengo ya cikumbuso, tingacite bwino kumbakumbukira momwe tinkukhalira na moyo wathu. Ndipo tingabzibvunze kuti: ‘Kodi ni mbali ziponi zomwe ndimbacita bwino, pomwe ndinkutewera mathanya ya Kristu Jezu? Ndipo ni mbali ziponi zomwe ndinkucita lini bwino?’ Kubzifufudzaku n’kwakufunika kwene-kwene, thangwe tinkukhala m’dziko lomwe nsiku zense timbakhala tinkukakamizidwa kucita bzinthu bza m’dzikoli. (War. 12:2) Ifepano tikasaya kusamala, tingapumpsidwe ticitewera nzeru ya dzikoli ayai kukhala wanthu wakubvekera na wakumbacita nawo mpikisano wa masenzeka ya dziko. (Wakol. 2:8; 1 Ju. 2:15-17) Kodi tingacite ciyani kuti tisaye kutengeka na mapumpsoya?

10. Kodi pa nyengo ya cikumbuso tin’funika kubzibvunza mibvunzo iponi ndipo n’ciyani cin’dzatilimbisa kucita bzimwebzo? (Onani cithunzi-thunzi cakuyambirira.)

10 Ifepano tingaphatise basa nyengo ya cikumbusoyi kuti tipambule nthawe ya kuwona momwe timbaikha bzakubvala bzathu, mafilme yomwe timbawona, nyimbo zathu zomwe timbabvesera, ayai bzinthu bzomwe tidakoya mu komputadori, m’mitedwe yathu ya m’manja, na mathabuleti. Pomwe munkunyang’anisa bzakubvala bzanu bzibvunzeni kuti: ‘Ndingadakhala ndinkuyenda ku mbuto inango komwe Jezu angadakhalambo ali kumweko kodi ndingadabvala cakubvala cimweci?’ (Werengani 1 Timotio 2:9, 10.) Ndingadakhala kuti ndabvala cakubvala cimweci, ‘Kodi wanthu wense wakundiwona wangadadziwa kuti ndine mteweri wa Jezu Kristu?’ Ifepano tingabzibvunze mibvunzo ibodzi-bodziyo pa nkhani yakusankhula mafilme na nyimbo zomwe timbabvesera. Jezu angadakhala akufuna kuwona filme kodi angadakomedwa na kuwona filme ayai kubvesera nyimbo imweyi? Bzingadakhala kuti iye ankukumbira mtedwe wangu wa m’manja ayai thabuleti, ‘kodi ndingadabve manyazi na bzomwe iye angadawone m’mwemo?’ Pa nkhani ya masenzeka yomwe mumbasankhula ya m’mtedwe wa m’manja, bzibvunzeni kuti: ‘Bzingadakhala kuti wandigumana ndinkucita masenzekaya kodi bzingadandinesa kumufotokozera Jezu kuti thangwe ranyi ndimbadekedwa nayo masenzeka yamweya?’ Lufoyi lathu na Yahova lin’dzatithandiza kucosa ciri-cense comwe n’cakuthemera lini ninga nyakupfunza wa Kristu, bziribe basa penu bzintiwawa ayai ne. (Mab. 19:19, 20) Ifepano tidapicira pa nthawe yomwe tikhabzipereka kuti tin’dzacita lini bzomwe tikufuna koma bzomwe Kristu akufuna. Tenepo, tin’funa lini kukhala na cinthu comwe cintitazisa kuteweza mathanya ya Jezu mwa pafupi kwene-kwene.—Mat. 5:29, 30; Waf. 4:8.

11. (a) Kodi lufoyi lathu na Mulungu pabodzi na Jezu lingatilimbise tani pa basa lakupalizira? (b) Kodi lufoyi lathu lingatilimbise tani kuti tithandize wanthu winango m’gwere?

11 Lufoyi lathu na Jezu lin’dzatilimbisa kuphata basa la kupalizira na kupfunzisa wanthu na mtima wense. (Mat. 28:19, 20; Lu. 4:43) Pa nyengo ya cikumbuso, ifepano tingalokoterembo mpata wakudzatumikira ninga mpainiya wakuthandiza ticidzapereka maora 30 ayai 50. Kodi mungacite makonzedwe kuti mudzatumikire ninga mpainiya wakuthandiza? M’bale m’bodzi wakufedwa mkazi wa magole 84 yakubadwa akhawona kuti angadakwanisa lini kutumikira ninga mpainiya wakuthandiza thangwe ra kukalamba na kudwala. Tsono abale omwe ambakhala pafupi na m’bale wakukalambayu adacita makonzedwe kuti amuthandize. Iwo wakhambamunyamula na kanderendere wacimbayenda ku magawo yomwe m’baleyu angadakwanisa kumbapalizira, kuti akwanise cakulinga cace cakufikisa maora 30. Thangwe ranyi mun’sayambo kuthandiza m’bale ayai mpfumakazi ya m’gwere mwanu kuti adzakondwe kutumikira ninga mpainiya wakuthandiza pa nyengo ya cikumbuso? N’cadidi, mpsakukwanisika lini kuti tense titumikire ninga apainiya wakuthandiza. Napo bziri  tenepo, ifepano tingaphatise basa nthawe ayai mphanvu zathu kuti tipereke nsembe zakutumbiza Yahova na miromo yathu. Pakucita bzimwebzi, ifepano ninga Paulo tin’dzalimbisidwa na lufoyi la Kristu. Kodi lufoyi la Mulungu lingatilimbise pomwe kucita ciyani?

NDIFE WAKUKAKAMIZIKA KUMBAFUNANA MUNANGO NA MWANZACE

12. Kodi lufoyi la Mulungu limbatikakamiza kucita ciyani?

12 Caciwiri comwe mpostolo Juwau adacizindikira ni lufoyi lomwe Mulungu adatikakamiza kuti timbafune abale wathu. Juwau adanemba kuti: ‘Wakufunidwamwe, penu Mulungu adatifuna tenepayu ifepano tin’funikambo kumbafunana munango na mwanzace.’ (1 Ju. 4:7-11) Inde, bzingakwanisike lini kufunidwa na Mulungu tikasaya kuzindikira kufunika kwa kumbafuna abale wathu. (1 Ju. 3:16) Kodi tingalatize tani lufoyi lathu mu njira yakuthemera?

13. Kodi n’ciratizo ciponi comwe Jezu adacicita cakulatiza kuti akhafuna winango?

13 Mbatiwoneni ciratizo ca Jezu. Pa nthawe ya utumiki bwace pansi pano, iye adasamalira na tceru anyakubzicepswa. Iye akhapoza womwe akhaduwala, adalimbisa anyakulemala, adafungula maso ya azimola, anyakusaya kulewalewa adawalewalewesa ndipo adalamusambo anyakufa. (Mat. 11:4, 5) Jezu akhafunisisa kupfunzisa womwe wakhana njala yauzimu, womwe akhawonedwa na atsogoleri wacipembedzo ca Cijuda ninga wanthu ‘wakutembereredwa.’ (Ju. 7:49) Jezu akhafuna wanthu wa kubzicepswa amwewa ndipo akhaphata basa mwamphanvu kuti awasamalire.Mat. 20:28.

Kodi imwepo mungathandize m’bale ayai mpfumakazi mu utumiki bwakumunda? (Onani ndime 14)

14. Kodi imwepo pamwekha mun’funika kucita ciyani kuti mulatize lufoyi kwa winango m’gwere lanu?

14 Nyengo ya cikumbuso imbatipasa mpata wa kutewezera ciratizo ca Jezu, mwa kugawa nthawe kuti ticeze na abale pabodzi na mpfumakazi za m’gwere lathu. Mukacita bzimwebzo, mwakusaya kupenukira imwepo mun’dzawona wanthu winango womwe wan’dzagumana phindu na lufoyi lanu. Pinango pana mpfumakazi ayai m’bale wacikulire omwe an’funa thandizo. Kodi mungamuzungire m’bale ayai mpfumakazi yathu yomwe in’funa thandizo? Kodi mungamuyendesere cakudya, ayai mungamucitire basa linango pamui pace, pinango mungamutakule na kanderendere wanu kuyenda ku mitsonkhano ayai kumbayenda naye pabodzi mu utumiki? (Werengani Luka 14:12-14.) Mbatiyendeni tisiye kuti lufoyi la Mulungu litithandize kulatiza lufoyi kwa abale wathu.

LATIZANI NSISI KWA ABALE NA MPFUMAKAZI

15. Pakukhala wana wa Adamu, kodi ali-wense payekha an’funika kuzindikira ciyani?

15 Cacitatu, lufoyi la Yahova lin’funika kutilimbisa kumbalekerera abale na mpfumakazi zathu. Pakukhala wana wa Adamu, tense tidabadwa na pikado ndipo cirango cace ni infa. Palibe na m’bodzi wa ifepano omwe angalewe kuti: ‘Inepano  ndin’funikira lini cakulombolera.’ Napo mtumiki wakukhulupirika kwene-kwene wa Yahova, an’funikambo kudeka mtima kukulu kwa Yahova komwe wakupereka mwa Kristu. Ali-wense wa ifepano an’funika kukumbukira kuti ifepano tidalekereredwa mangawa mazinji kwene-kwene. Thangwe ranyi bzimwebzi mpsakufunika? Mbatiwone mtawiro wace mu there la Jezu.

16, 17. (a) Kodi tin’funikira kupfunza ciyani na there la Jezu la mambo omwe adalekerera mangawa mazinjisa kapolo wace? (b) Pambuyo pa kukumbukira there la Jezu kodi ndimwe wakukonzeka kucita ciyani?

16 Jezu adafotokoza momwe mambo m’bodzi akhadalekerera kapolo wace mangawa ya matalento 10.000, ayai kuti madinario yakukwana 60.000.000. Tsono kapolo omwe adalekereredwa mangawa mazinjiyu akhali lini wakukonzeka kulekerera mangawa ya kapolo mwanzace yomwe yakhali mang’ono-ng’ono ya kobiri zakukwana 100 dinario. Mambo ule adakalipa kwene-kwene atadziwa kuuma mtima kwa kapolo omwe iye akhadamulekerera mangawa yace. Ndipo mamboyo adati: ‘Iwe, kapolo wakuipawe, ine ndakulekerera mangawa yako yense, pomwe iwepo wandidandaulira. Kodi iwepombo ungadaleka lini kumubvera nsisi kapolo mwanzako ule, ninga momwe ine ndakucitira nsisi?’ (Mat. 18:23-35) Inde, kudeka mtima kukulu kwa mambo ule kungadacitisambo kapolo ule kudekera mtima kapolo mwanzace. Mwa kundendemerana na thereli, kodi kudeka mtima kukulu kwa Yahova pabodzi na nsisi zace zin’funa kutilimbisa kucita ciyani?

17 Pa nyengo ya cikumbuso tingacite bwino kupambula nthawe ya kubzifufudza kuti tiwone penu tidasungira cakukhosi m’bale ayai mpfumakazi yathu. Penu tidasunga, imweyi ni nthawe ya bwino ya kumulekerera pa kutewezera Yahova omwe ambakhala ‘wakukonzeka kulekerera.’ (Neh. 9:17; Psal. 86:5) Ifepano tinkutenda Yahova thangwe ra kutilekerera mangawa yathu mazinjisa, tenepo ifepano tin’funika kumbalekererambo anzathu mwakucokera pansi pa mtima. Tsono, kuti Mulungu atilatize lufoyi na kutilekerera mangawa yathu bzin’funika ifepano tilatizembo lufoyi na kumbalekerera anzathu mangawa yawo. (Mat. 6:14, 15) Napo n’cadidi kuti kulekerera kungacinje lini bza kumbuyo koma mwakusaya kupenukira kun’dzacinja tsogolo lathu licikhala la bwino.

18. Kodi lufoyi la Mulungu lidathandiza tani mpfumakazi kumbalekerera bzakuphonya bza mpfumakazi inango m’gwere?

18 Azinji wa ifepano ‘kulekerera’ abale na mpfumakazi zathu cingakhale cinthu cakunesa kwene-kwene. (Werengani Wakolose 3:13, 14; Wayefezo 4:32.) Mwa ciratizo, Lily [1] ni mpfumakazi yakusaya kulowodwa yomwe idabzipereka kuthandiza mpfumakazi yakufedwa mwamuna ya m’gwere lace yakucemeredwa Carol. Lily akhambamunyamula Carol na kanderendere wace, akhambamunembera matsamba, ndipo akhambamuthandizambo mu njira zinango zakusiyana-siyana. Napo pa bzense bzomwe Lily akhamucitirabzi, Carol akhali munthu wakunesa kwene-kwene kukhala naye. Koma Lily akhambandoyang’ana bzinthu bzabwino bzomwe Carol akhacita. Mpfumakaziyi idapitiriza kuthandiza Carol kwa magole mazinji mpaka pa nthawe yomwe mpfumakaziyi idaduwala icisayika. Napo bziri tenepoyo, Lily adati: “Ndinkufunisisa kudzawonana na Carol atalamusidwa kwa anyakufa. Ndin’funa kudzamudziwa pomwe iye an’dzakhala wakulungamiratu.” Inde, lufoyi la Mulungu lin’dzatilimbisa kulekerera bzakuphonya bza abale na mpfumakazi zathu ndipo ndife wakufunisisa kudzakhala mu nthawe yomwe wanthu wan’dzakhala lini pomwe wakuperewera.

19. Kodi ‘mphaso ya fovolo, yomwe tingakwanise lini kuifotokoza’ ya Mulungu in’dzakulimbisani kucita ciyani?

19 Ifepano tapasidwa ‘mphaso ya fovolo, yomwe tingakwanise lini kuifotokoza’ na Yahova. Mphaso imweyi tin’funika lini kuiwona ninga cinthu cakunyozeka. Maka-maka pa nyengo ino ya cikumbuso tin’funika kukumbukira bzense bzomwe Yahova pabodzi na Jezu adaticitira. Inde, lufoyi la Mulungu lin’dzatilimbisa kutewera mathanya ya Jezu mwa pafupi kwene-kwene, mwa kulatiza lufoyi kwa abale wathu na kumbalekerera abale wathu mwakucokera pansi pa mtima.

^ [1] (ndime 18) Madzina manango mu nkhani ino yacinjidwa.