Bzimogeni bzinthu bzimwebzi

Ndokoni pa menu yaciwiri

Ndokoni pa mbuto ya misolo ya nkhani

Mboni za Yahova

Cinyungwe

Bzipsa Bzabwino Bzakucokera kwa Mulungu!

 Pfunziro 11

Mitemo ya m’Bibliya Yingatipase Phindu Liponi?

Mitemo ya m’Bibliya Yingatipase Phindu Liponi?

1. Thangwe ranyi tin’funika kutsogoledwa?

Kodi mitemo ya m’Bibliya yingatithandize tani kusamala moyo wathu na wa wanzathu?—PSALYMO 36:9.

Mulengi wathu ngwa nzeru kuposa ifepano. Ninga Baba wa lufoyi, iye ambaticengeta. Ndipo, iye an’funa lini kuti tibzitongere tekha. (Jeremiya 10:23) Tenepo ninga kamwana kang’ono kan’funika kutsogoledwa na wabereki, ifepano tense tin’funika kutsogoledwa na Mulungu. (Zaiya 48:17, 18) Mitemo ya m’Bibliya yimbatitsogolera ndipo ni mphaso yakucokera kwa Mulungu.Werengani 2 Timotio 3:16.

Malamulo na mitemo ya Yahova yambatipfunzisa njira ya moyo wabwino tsapano ndipo yambatilatiza momwe tingatambirire mabai-bai ya muyaya kutsogolo. Pakuti Mulungu adatilenga, nkwabwino kuti ifepano timbateweze mwakutenda utsogoleri bwace.Werengani Psalymo 19:7, 11; Cibvumbulutso 4:11.

2. Kodi mitemo ya m’Bibliya n’ciani?

Mitemo ya m’Bibliya ni cadidi ca tsinde la malamulo. Mwakusiyana, malamulo yambaphata basa pa bzomwe iyo yambalewa. (Bzakutonga 22:8) Ifepano tin’funika kuphatisa basa luso lakukumbuka kuti tibvesese momwe mitemo yimbaphatira basa pa bzakucitika bzakusiyana-siyana. (Mimwani 2:10-12) Mwa ciratizo, Bibliya limbapfunzisa kuti moyo ni mphaso yakucokera kwa Mulungu. Mtemoyu ungatitsogolere pa basa, pa mui, na pa ulendo. Mtemo umweyu umbaticitisa kuti timbacengete moyo wathu na wa wanzathu.Werengani Mabasa 17:28.

3. Njiponi mitemo miwiri yakutoma?

Jezu adalewa bza mitemo miwiri yakufunika pakuyambirira. Mtemo wakutoma umbalatiza thangwe likulu lakuwoneka kwa wanthu pansi pano—kudziwa  Mulungu, kum’funa na kum’tumikira mwakukhulupirika. Mtemo wakutomayu un’funika kuphatisiridwa basa pa bzakutonga bzathu bzense. (Mimwani 3:6) Womwe moyo wawo umbabverana na mtemo umweyu wambawina uxamwali na Mulungu, cikondweso cacadidi na moyo wa muyaya.Werengani Mateu 22:36-38.

Mtemo waciwiri ungatitsogolere pakucita uxamwali wabwino na wanzathu. (1 Wakolinto 13:4-7) Kuteweza mtemo waciwiriyu kumbaphatanidza kutewezera momwe Mulungu ambasamalira wanthu.Werengani Mateu 7:12; 22:39, 40.

4. Kodi mitemo ya m’Bibliya yimbatipasa phindu liponi?

Mitemo ya m’Bibliya yimbapfunzisa mabanja momwe yangaphatane mwa lufoyi. (Wakoloso 3:12-14) Fala la Mulungu limbakhotcererambo mabanja mwa kupfunzisa mtemo wina wakutitsogolera—wakuti malowozi yan’funika kukhalisa.Werengani Ciyambo 2:24.

Mwa kuteweza mapfunziso ya m’Bibliya ifepano tingakhotcerere ubwino wa moyo na bzomwe timbabva mu ntima mwathu. Mwa ciratizo, weneciro pa basa kawiri-kawiri wambafuna anyabasa womwe moyo wawo umabverana na mitemo ya m’Bibliya ya kulewa bza cirungamo na kuphata basa na nyongo. (Mimwani 10:4, 26; Wahebereu 13:18). Fala la Mulungu limbatipfunzisambo kukomedwa na bzomwe n’bzakufunika pa moyo na kutenda uxamwali wathu na Mulungu kuposa bzinthu bzense.Werengani Mateu 6:24, 25, 33; 1 Timotio 6:8-10.

Kuphatisira basa mitemo ya m’Bibliya kungakhotcerere moyo wathu. (Mimwani 14:30; 22:24, 25) Mwa ciratizo, kuteweza lamulo la Mulungu la kuletsa kuledzera kumbatikhotcerera kuna matenda yakupha na ngozi. (Mimwani 23:20) Yahova ambabvumiza kumwa bzakumwa bzakuledzeresa koma kokha mwacikati-kati. (Psalymo 104:15; 1 Wakolinto 6:10) Mitemo ya Mulungu yimbatipasa phindu mwa kutipfunzisa kusunga bzakucita na bzakukumbuka bzathu. (Psalymo 119:97-100) Tsono, Wakristau wacadidi sikuti wambalemekeza Bibliya kokha thangwe wan’funa kugumana phindu. Iwo wambacita tenepo kuti walemekeze Yahova.Werengani Mateu 5:14-16.

 

Dziwani bzinango

Kodi Bibliya Limbapfunzisa Ciyani Maka-maka?

Khalani na Moyo Wakukondwesa Mulungu

Mpsakukwanisika kukhala na moyo wakukondwesa Yahova. Ncadidi, imwepo mungakhale xamwali wace.

Kodi Bibliya Limbapfunzisa Ciyani Maka-maka?

Momwe Mulungu Ambawonera Moyo

Kodi Mulungu ambawona tani kucosa mimba, kuikhidwa mulopa, na moyo wa bzirombo?

BZA IFE

Kumbirani Pfunziro la Bibliya

Khalani na mapfunziro ya Bibliya ya fovolo ku mbuto na nthawe yakukudekerani.