Bzimogeni bzinthu bzimwebzi

Ndokoni pa mbuto ya misolo ya nkhani

 Pfunziro 12

Kodi Mungam’fenderere Tani Mulungu?

Kodi Mungam’fenderere Tani Mulungu?

1. Kodi Mulungu ambatetekera mipembo yense?

Mulungu ambacemera wanthu wa madziko yense kuti wamufenderere mu mpembo. (Psalymo 65:2) Tsono, iye si ambatetekera, ayai kubvuma, mipembo yense. Mwa ciratizo, mipembo ya mwamuna omwe ambaboneresa mkazace yingaphingizidwe. (1 Pedru 3:7) Ndipo, ipo waJirayeri wakhapitiriza kucita bzakuipa, Mulungu akhalamba kubva mipembo yawo. Bzinkuwonekeratu kuti kupemba n’cinthu cakupambulika. Napo n’tenepo, Mulungu an’dzabvuma mipembo ya anyakuphonyeratu koma kokha wakakungula.Werengani Zaiya 1:15; 55:7.

2. Kodi tin’funika kupemba tani?

Kupemba n’cipande ca kunamata kwathu, tenepo ifepano tin’funika kupemba Mulengi wathu basi, Yahova. (Mateu 4:10; 6:9) Ndipo, pakuti tidaperewera, ifepano tin’funika kupemba m’dzina la Jezu thangwe iye adafera bzakuphonya bzathu. (Juwau 14:6) Yahova ambafuna lini kuti timbabwerezere mipembo ya kukoyedwa m’msolo ayai yakunembedwa. Iye an’funa timbam’pembe kucokera mkati mwa mtima wathu.Werengani Mateu 6:7; Wafiripo 4:6, 7.

Mulengi wathu ambabva napo mipembo yakazizizi. (1 Samuweri 1:12, 13) Iye ambatiuza kuti tim’pembe pa nyengo iri yense, ninga pa nthawe yakumuka ayai yakugona, nthawe ya kudya na pomwe tagumana mabvuto.—1Werengani Psalymo 55:22; Mateu 15:36.

3. Thangwe ranyi Wakristau wambakonkhana pabodzi?

Bziribe kupusa kufenderera Mulungu thangwe ifepano timbakhala pakati pa wanthu wakusaya kukhulupira Mulungu  ndipo wambanyoza piciro lace la dziko la mtendere. (2 Timotio 3:1, 4; 2 Pedru 3:3, 13) Tenepo ifepano tin’funika kukonkhana na wanzathu wacikhulupiro kuti tilimbisane.Werengani Wahebereu 10:24, 25.

Kukonkhana na anyakufuna Mulungu kun’tithandiza kufenderera Mulungu. Mitsonkhano ya Mboni za Yahova yimbapasa mipata yabwino yakucosa phindu pa cikhulupiro ca wanzathu.Werengani Waroma 1:11, 12.

4. Mungam’fenderere tani Mulungu?

Imwepo mungafenderere Yahova mwa kukumbuka bzomwe mwapfunza m’Fala lace. Mbayadingani mabasa yace, malango yace, na mapiciro yace. Kukumbuka bzimwebzi na mpembo kun’dzatithandiza kusimba lufoyi na nzeru za Mulungu.Werengani Djosuwe 1:8; Psalymo 1:1-3.

Mungafenderere Mulungu kokha mukam’khulupira. Tsono cikhulupiro ciri ninga cinthu ca moyo comwe cimbafunika kudyesedwa. Imwepo mun’funika kawiri-kawiri kudyesa cikhulupiro canu mwa kupfunza pomwe mwakubwerezera mathangwe ya cikhulupiro canu.Werengani Mateu 4:4; Wahebereu 11:1, 6.

5. Kodi phindu liponi mun’dzagumana mukafenderera Mulungu?

Yahova ambasamala womwe wambam’funa. Iye ambawakhotcerera kwa ciri cense comwe cingaikhe pa ngozi cikhulupiro cawo na cidikhiro cawo ca moyo wa muyaya. (Psalymo 91:1, 2, 7-10) Iye ambaticenjeza bza makhalidwe yakuipa yomwe yangaikhe moyo wathu na cikondweso cathu pa ngozi. Yahova ambatipfunzisa mkhalidwe wabwino wa moyo.Werengani Psalymo 73:27, 28; Tiyago 4:4, 8.