Bzimogeni bzinthu bzimwebzi

Ndokoni pa menu yaciwiri

Ndokoni pa mbuto ya misolo ya nkhani

Mboni za Yahova

Cinyungwe

Kodi Bibliya Limbapfunzisa Ciyani Maka-maka?

 MAFALA YAKUTHUMIZIRA

Kodi Sheol na Hades n’Ciyani?

Kodi Sheol na Hades n’Ciyani?

MU bzirewedwe bzakuyambirira, Bibliya limbaphatisa basa fala la Cihebereu lakuti sheʼohlʹ mwakundendemerana na fala la Cigirego lakuti haiʹdes mwakupitirira nthawe 70. Mafala yense mawiriya yambalewa bza mbuto yomwe wanthu ambayenda akafa. Ma Bibliya manango yambasandulizira mafalaya kuti “thenje,” “mbuto ya kupsa na moto,” ayai “dindi.” Tsono, m’bzirewedwe bzizinji mulibe mafala yomwe yambabvekesa bwino mafalaya mu Cihebereu na Cigirego. Kodi mafalaya yambathandauza ciyani maka-maka? Mbatiwoneni momwe mafalaya yambaphatisidwira basa m’ma Bibliya yakusiyana-siyana.

Pa Mpalizi 9:10 pambati: ‘Pakuti ku thenje komwe unkuyendako, kulibe mabasa, ne kukumbuka bzakucita, ne cidziwiso ne nzeru.’ Kodi bzimwebzi bzinkuthandauza kuti Sheol ni mbuto, cinthu ayai thenje lomwe timbakataya wakufunidwa wathu womwe wafa? Ne. Pomwe Bibliya limbalewa bza thenje iro limbaphatisa basa mafala manango, sikuti sheʼohlʹ ayai haiʹdes. (Ciyambo 23:7-9; Mateu 28:1) Kuthumizira bzimwebzi, Bibliya limbaphatisa lini basa fala lakuti “Sheol” pakulewa bza thenje lomwe wanthu azinji ambakaikhidwa pabodzi ninga thenje la banja ayai thenje la wanthu wense.Ciyambo 49:30, 3.

Tsono kodi ni mtundu uponi wa “Sheol” womwe unkulewedwa? Fala la Mulungu limbalatiza kuti “Sheol” ayai “Hades” limbalewa bza cinthu cinango sikuti thenje lakuikhidwa wanthu wense. Mwa ciratizo, pa Zaiya 5:14 pambalewa kuti Thenje ayai Sheol ‘labzikulisa, ndipo lafungula mulomo wace mwakupitirira malire.’ Napo tingalewe kuti Sheol yameza wanthu azinjisa, iyo nthawe zense imbakhala na njala kwene-kwene. (Mimwani 30:15, 16) Mwakusiyana na dindi libodzi lomwe mungadzaze wanthu wakufa, Thenje limbakhuta lini. (Mimwani 27:20) Bzimwebzi bzin’funa kulewa kuti Sheol cipo licidzala. Iro liribe malire. Tenepo, Sheol, ayai Hades, sikuti ni mbuto caiyo yakukonzedwera cakulinga cimweci. Koma thenje ni mbuto yomwe imbataidwa wanthu wense wakufa, yomwe ni mbuto yakundendemezera ya wanthu azinji womwe adagona mu infa.

Cipfunziso ca m’Bibliya cakulewa bza cilamuso cimbatithandiza kubvesesa bwino thandauzo la “Sheol” na “Hades”. Fala la  Mulungu limbalatiza kuti mafala yakuti Sheol ayai Hades yambalewa bza thenje lomwe lina wanthu omwe an’dzalamusidwa. * (Djobi 14:13; Mabasa 2:31; Cibvumbulutso 20:13) Fala la Mulungu limbalewambo kuti Sheol ayai Hades, kuna wanthu womwe akhatumikira Yahova na womwe akhamutumikira lini. (Ciyambo 37:35; Psalymo 55:15) Ndipopa, Bibliya limbapfunzisa kuti ‘kun’dzakhala kumuka kwa anyakufa wakulungama na wakusaya kulungama.’Mabasa 24:15.

^ ndi. 1 Koma wanthu womwe alibe cidikhiro ca cilamuso ambalewedwa kuti ali “Gehena” sikuti ku Sheol ayai ku Hades. (Mateu 5:30; 10:28; 23:33) Mwakundendemerana na Sheol ayai Hades, Gehena ni mbuto lini caiyo yomwe imbataidwa wanthu.