Bzimogeni bzinthu bzimwebzi

Ndokoni pa menu yaciwiri

Ndokoni pa mbuto ya misolo ya nkhani

Mboni za Yahova

Cinyungwe

Banja Lanu Lingakhale Lakukondwa

 MBALI 2

Khalani Wakukhulupirana Winango na Mwanzace

Khalani Wakukhulupirana Winango na Mwanzace

“Comwe Mulungu wacimanga pabodzi, munthu aleke kucilekanisa.”—Marko 10:9

Yahova akufuna kuti ‘timbacite [“kukhulupirika”NW] cirungamo.’ (Mikeya 6:8) Bzimwebzi mpsakufunika kwene-kwene pa malowozi yanu, thangwe pakakhala palibe kukhulupirika, palibe kukhulupirirana. Ndipo kukhulupirika n’kwakufunika kuti lufoyi lipitirize kukula.

Lerolino, kukhulupirirana pa malowozi kukukhala kwakunesa. Kuti mukhotcerere malowozi yanu, imwepo mun’funika kutsimikiza kucita bzinthu bziwiri.

 1 MALOWOZI YANU YAKHALE CINTHU CAKUYAMBA

BIBLIYA LIMBATI: “Mutsimikize kuti mpsiponi bzinthu bzakufunika kwene-kwene.” (Wafiripo 1:10) Malowozi yanu ni cibodzi mwa bzinthu bzakufunika kwene-kwene pa moyo wanu. Na tenepo yambafunika kuyaikha pa mbuto yakuyamba.

Yahova ankufuna kuti imwepo mumbamusamale mwanzanu wa m’banja ‘mucipfatsa na moyo’ pabodzi. (Mpalizi 9:9) Ndipo iye akufuna lini kuti imwepo mumbalekerere mwanzanu wa m’banja, koma mwense mun’funika kunyang’ana njira ya momwe mungatsangalazirane. (1 Wakolinto 10:24) Citani bzinthu bzakucitisa mwanzanu wa m’banja kubzibva kukhala wakufunika na wakutendedwa.

BZOMWE MUNGACITE:

  • Onesesani nthawe yomwe mumbamala muli pabodzi, kuti mumbasamale mwanzanu wa m’banja

  • Kumbukani bza “ife” sikuti “ine”

 2 KHOTCERERANI MTIMA WANU

BIBLIYA LIMBATI: “Ali-wense wakunyang’anisisa mkazi mpaka kumukhumba, wacita naye kale upombo mu mtima mwace.” (Mateu 5:28) Penu munthu angapitirize kumbakumbuka bzinthu bza unzazi, angayambe kusaya kukhulupirika kwa mwanzace wa m’banja.

Yahova ankukuuzani kuti mun’funika ‘kukhotcerera mtima wanu.’ (Mimwani 4:23; Jeremiya 17:9) Kuti mucite bzimwebzi, mun’funika kusamala na maso yanu. (Mateu 5:29, 30) Tewezani ciratizo ca munthu wakukhulupirika wakale Djobi, omwe adapangana na maso yace kuti cipo acidzanyang’ana mkazi munango mwa kumukhumba. (Djobi 31:1) Khalani wakutsimikiza kuleka kuwona bzinthu bzamaika. Ndipo tsimikizani kutcenkha kubverana kwene-kwene na munthu munango kuposa mwanzanu wa m’banja.

BZOMWE MUNGACITE:

  • Bzidziwikiseni kwa winango kuti muna mwanzanu wa m’banja

  • Mbakumbukirani momwe mwanzanu wa m’banja ankubvera, mucimalisiratu mbverano uli wense omwe ungamukomere lini