Bzimogeni bzinthu bzimwebzi

Ndokoni pa menu yaciwiri

Ndokoni pa mbuto ya misolo ya nkhani

Mboni za Yahova

Cinyungwe

Kabukhu ka Mitsonkhano wa Moyo Wathu Wacikristau na Utumiki  |  Novembro 2016

 KUKHALA NA MOYO WACIKRISTAU

Momwe Tingaphatisire Basa Bukhu la Bzomwe Bibliya Limbapfunzisa

Momwe Tingaphatisire Basa Bukhu la Bzomwe Bibliya Limbapfunzisa

Bukhu la Bzomwe Bibliya Limbapfunzisa, ndakundendemerana na lakuti Bibliya Limbapfunzisa Ciyani. Mabukhuya timbayaphatisira basa pakupfunzisa, ndipo yambafotokoza cadidi ca m’Bibliya m’njira yakundendemerana. Tsono, bukhu la Bzomwe Bibliya Limbapfunzisa lina nkhani zakusaya kunesa kubvesesa, ndipo lidakonzedwera wale omwe ambaneseka kubvesesa nkhani za m’bukhu lakuti Bibliya Limbapfunzisa Ciyani. Bukhuli lina mbali ya Mafala Yakuthumizira, yomwe imbafotokoza na kubvekesa nfundo ayai mafala manango yomwe yankugumanika mu ndime zakusiyana-siyana. Ndipo mwakusiyana na bukhu la Bibliya Limbapfunzisa Ciyani, bukhu la Bzomwe Bibliya Limbapfunzisa liribe mibvunzo kumayambiriro kwa msolo uli-wense ne kwadru kuphampha kwa msolo, m’mbuto mwace, lina mbali ya Nfundo Zikulu-zikulu yomwe imbafotokoza mwacigwatho bzomwe bzapfunzidwa mkati mwa msoloyo. Bukhuli liti limbagawiridwe mu utumiki bwakumunda nthawe iri-yense, ninga momwe timbacitira na bukhu la Bibliya Limbapfunzisa Ciyani. Tsono, kodi tingaphatise tani basa bukhuli pomwe tinkucitisa pfunziro la Bibliya?

NFUNDO ZIKULU-ZIKULU: Kupfunzisa kwathu Bibliya mwakuphatisa basa bukhu la Bibliya Limbapfunzisa Ciyani, mwa kuwerenga ndime patsogolo pace kucita mbvunzo, kumbathandiza wanthu azinji. Tsono tani penu nyakupfunzayo ambaneseka kuwerenga ayai akanati kuzerewera mafala mazinji ya m’bukhuli? Pa cakucitika ninga cimweci, imwepo pinango mungaphatise basa kwadru ya Nfundo Zikulu-zikuluyi yomwe iri m’bukhu la Bzomwe Bibliya Limbapfunzisa, kuti mucitise pfunziro lanu la Bibliya, muciuza nyakupfunza wanuyo kuti awerenge yekha msolo wenseyo nthawe inango. Pinango mphindi 15 zingakhale zakukwanira kuti mucezerane nfundo zimwezi. Tsono, pakuti kwadruyi imbafotokoza lini nfundo zense za msoloyo, mun’funika kumbakonzekera, mucikumbukirambo momwe mungathandizire nyakupfunza wanuyo. Koma mukapfunzisa msolo wenseyo, mungadzafotokoze Nfundo Zikulu-zikuluzo mwacigwatho.

MAFALA YAKUTHUMIZIRA: Nfundo zomwe zimbagumanika pa mbali imweyi zidandandalikidwa mwakuphatisa basa mirewengo. Ali-wense angasankhule penu aniwerenga mbali imweyi m’bukhu la Bzomwe Bibliya Limbapfunzisa na nyakupfunza wace pomwe ankucita pfunzirolo.