OTYILI konthele yatyi? Otyili konthele yomapulo omanyingi akolela unene ovanthu vehole okulinga. Hamue uhole okulinga omapulo ngaa:

Opi upondola okukaovola omakumbululo omapulo oo? Inkha wenda monondyuo mupakwa omikanda ine muna vilandeswa, movasimo omikanda ominyingi vati vipondola okukumbulula omapulo oo. Mahi, omikanda ovio, kese umue upopia tyityatyo. Vimue visilivila vala pomuvo viahoneka, iya mononthiki mbehehi kavikala vali nesilivilo. Moluotyo, vipilululwa ine papinga vimue vali.

Anthi, kuna omukanda umue wokuna omakumbululo otyotyili. Omukanda oo, upopia vala otyili. Jesus Kristu wapopile na Huku melikuambelo okuti: “Ondaka yove otyili.” (João 17:17) Hono, tuanoñgonoka okuti Ondaka oyo, Ombimbiliya Ikola. Pomafo maalandulako, mokanoñgonoka nawa omakumbululo otyotyili ayandyuluka nawa Ombimbiliya yava konthele yomapulo oo.

Okuti Huku Tyotyili Wasuka Umue Nonthue?

OITYI TUPULILA NGOTYO: Tukahi mouye weyula ovivi unene novipuka vihaviukile. Onongeleya ononyingi mbulongesa okuti o Huku uhanda tumone ononkhumbi.

OITYI OMBIMBILIYA ILONGESA: Yati Huku nalumue aetele ovivi. Omukanda wa Jó 34:10 wati: “Huku yotyotyili kalingi ovivi. Wepondolo Aliho kalingi natyike tyihaviukile!” Huku moluembia luae una ehando ewa pala ovanthu. Otyo Jesus etulongesila tulikuambele okuti: “Tate yetu keulu…Ouhamba wove uye. Ehando liove lilingwe pano pohi, ngetyi lilingwa keulu.” (Mateus 6:9, 10) Mokonda Huku wasuka unene nonthue, ukahi nokulinga atyiho opo afuisepo ehando liae. —João 3:16.

Tupu tala Gênesis 1:26-28; Tiago 1:13; na 1 Pedro 5:6, 7

Okuti Onthiki Imue Ovita Nononkhumbi Mavikapwako Umue?

OITYI TUPULILA NGOTYO: Omokonda ovita vitualako okuipaa ovanthu ovanyingi unene. Atuho onthue tuapitale mononkhumbi.

OITYI OMBIMBILIYA ILONGESA: Yati Huku wapopia konthele yomuvo makaeta ombembwa kombanda yoohi aiho. Moutumini Wouhamba wae, outumini wo keulu, ovanthu “kamavekelilongesa vali ovita.” Anthi, “omitunga viavo mavekevinthila omatemo.” (Isaías 2:4) Huku makanyimako ovivi nononkhumbi ambuho. Ombimbiliya ilaa okuti: “[Huku] makasekuna ononkhuka momaiho avo, ononkhia, okulila, no nongembia kamavikakalako vali. Ovipuka ovio, [kumue novipuka vihaviukile nononkhumbi mbo hono], aviho mavikalamba.” —Revelação (Apocalipse) 21:3, 4.

Tupu tala Salmo 37:10, 11; 46:9; na Miquéias 4:1-4.

Oityi Tyipita Nonthue Tyina Tunkhia?

OITYI TUPULILA NGOTYO: Onongeleya ononyinyi mouye mbulongesa okuti, omunthu una otyipuka tyimue mokati kae, tyitualako nomuenyo tyina amankhi. Vamue vetavela okuti vokuankhia vapondola okulinga omapita ovanthu vokuna omuenyo. Tupu, vati Huku umonesa onondingavivi ononkhumbi mbahapu moifelunu yotupia.

OITYI OMBIMBILIYA ILONGESA: Yati pononkhia, ovanthu vanyima. Eclesiastes 9:5 yati: “Vokuankhia…kavei vali natyike.” Mokonda vokuankhia kavei vali natyike, kaveivite natyike, kavapondola vali okulinga omapita ine okukuatesako vokuna omuenyo. —Salmo 146:3, 4.

Tupu, tala Gênesis 3:19; na Eclesiastes 9:6, 10.

Okuti Vokuankhia Vena Ekevelelo?

OITYI TUPULILA NGOTYO: Omokonda onthue tuhanda okukala nomuenyo. Tupu, tuhanda okukala nomuenyo oo kumue na vana tuhole. Moluotyo, tuhanda okumona vali ononthyolwa mbetu vokuankhia.

OITYI OMBIMBILIYA ILONGESA: Yati ovanthu ovanyingi vankhia mavakapinduluapo. Jesus walaa okuti “vana vekahi mehinangelo lia Huku momalangalo…mavakatundamo.’ (João 5:28, 29) Ovanthu vana mavakatutila, mavakala nomuenyo momphangu yombembwa pano pohi, ngetyi Huku ahandele ponthyimbi. (Lucas 23:43) Omulao oo, tupu ulekesa okuti ovanthu vokutavela mavakakala nekongoko liafuapo nomuenyo wahapu. Ombimbiliya yati” “Ovaviuki mavapiñgana oohi, avakakalamo apeho.” —Salmo 37:29.

Tupu tala Jó 14:14, 15; Lucas 7:11-17; na Atos 24:15.

Oñgeni Mandyilikuambela opo Huku Anthehelele?

OITYI TUPULILA NGOTYO: Omokonda ovanthu monongeleya ambuho velikuambela. Mahi, ovanyingi velitehelela okuti omalikuambelo avo kaekahi nokukumbululwa.

OITYI OMBIMBILIYA ILONGESA: Jesus wetulongesa okuti tuna okulityilika okupitaulula monondaka apeho momalikuambelo etu. Jesus wati, “tyina ulikuambela, wahapalaukunune mondaka ike vala apeho.” (Mateus 6:7) Inkha tuhanda Huku atehelele omalikuambelo etu, tuna okulikuambela monkhalelo oe ahanda. Moluotyo, tuesukisa okunoñgonoka etyi Huku ahanda, iya atulikuambela konthele yotyo. Omukanda wa 1 João 5:14 wati: “Kese tyimue tuita inkha tyelikuata nehando lia [Huku], oe metutehelela.”

Tupu tala Salmo 65:2; João 14:6, 14; na 1 João 3:22.

Oñgeni Ndyipondola Okuvasa Ombembwa Momuenyo?

OITYI TUPULILA NGOTYO: Omokonda ovanthu vanyingi vetavela okuti onombongo, nenkhimano, ine ouwa, maviveetela ombembwa. Moluotyo, vatutumba nokuovola ovipuka viatyo ovio, mahi kavavasi ombembwa.

OITYI OMBIMBILIYA ILONGESA: Jesus waimbukile osapi yokuvasa ombembwa etyi ati: “Vana vaimbuka okuti vesukisa okunoñgonoka Huku vena ombembwa.” (Mateus 5:3) Matukala vala nombembwa yotyotyili inkha tulitekula nawa mopaspilitu, ine okunoñgonoka nawa otyili konthele ya Huku netyi ahanda pala onthue. Otyili otyo, tyivasiwa mo Mbimbiliya. Okunoñgonoka otyili otyo, matyitukuatesako okupunga oityi tyakolela vali, netyi tyahasilivila. Iya okuyeka otyili tyo Mbimbiliya tyituhongolele momatokolo etu nomuevi tulinga, matyituetela omuenyo omuwa unene. —Lucas 11:28.

Tupu tala Provérbios 3:5, 6, 13-18; na 1 Timóteo 6:9, 10.