Zokhudza screen reader

Sankhani chinenero

Pitani ku menyu yachiwiri

Pitani ku nkhani yake

Mboni za Yehova

Chichewa

ZIMENE ACHINYAMATA AMADZIFUNSA

Kodi Ndithetse Chibwenzichi?—Gawo 2

Kodi Ndithetse Chibwenzichi?—Gawo 2

Choyamba, sankhani malo ndi nthawi yabwino kuti mukambirane zimenezi. Kodi nthawi komanso malo abwino angakhale otani?

Ganizirani zimene inuyo mungakonde kuti akuchitireni zitakhala kuti akuthetsa chibwenzi ndi mnzanuyo. (Mateyu 7:12) Kodi mungasangalale ngati atakuuzirani pagulu? Ayi ndithu.

Mungachite bwino kwambiri kuti musathetse chibwenzicho pafoni kapena pa imelo, koma muonane pamasom’pamaso. Pokhapokha ngati patakhala zifukwa zomveka zoti simungaonane pamasom’pamaso, mwina mungagwiritse ntchito foni kapena kompyuta. Choncho sankhani nthawi ndi malo abwino kuti mukumane n’kukambirana nkhaniyi.

Mukakumana, kodi munganene zotani? Mtumwi Paulo analimbikitsa Akhristu kuti ‘azilankhula zoona’ nthawi zonse.—Aefeso 4:25.

Choncho njira yabwino ndi yakuti muzilankhula mosamala koma motsimikiza. Fotokozani mosapita m’mbali chifukwa chimene inuyo mukuonera kuti chibwenzicho chithe.

Simukufunikira kumuyalira zolakwa zake zonse kapena kunena zinthu zambirimbiri zomunyoza. M’malo monena kuti, “Suchita zakutizakuti” kapena “Sunachitepo zakutizakuti,” zingakhale bwino kugwiritsa ntchito mawu osonyeza mmene inuyo mukuonera. Mungagwiritse ntchito mawu ngati akuti, “Ineyo ndikufuna munthu amene . . . ” kapena “Ndikuona kuti chibwenzi chithe chifukwa chakuti . . . ”

Imeneyi si nthawi yolankhula mokayikira kapena yosintha maganizo n’kulolera zimene mnzanuyo anganene kuti musathetse chibwenzicho. Kumbukirani kuti mwasankha kuthetsa chibwenzicho chifukwa chakuti pali vuto lalikulu. Choncho samalani ngati mnzanuyo akuchita zinthu kapena kulankhula mochenjera n’cholinga choti musinthe maganizo. Mtsikana wina dzina lake Lori ananena kuti: “Nditathetsa chibwenzi, mnyamatayo anayamba kuchita zinthu ngati wasokonezeka maganizo kwambiri. Ndikuganiza kuti ankachita zimenezo kuti ndimumvere chisoni. Ngakhale kuti ndinamumveradi chisoni, sindinasinthe maganizo.” Mofanana ndi Lori, tsimikizirani kuti musasinthe zimene mwasankha. Mukati ayi akhaledi ayi.Yakobo 5:12.

Zimene Zingachitike Mutathetsa Chibwenzi.

Sizachilendo kukhala wokhumudwa kwambiri pambuyo pothetsa chibwenzi. Mwinanso mungamve ngati mmene anamvera wamasalimo amene anati: “Ndasokonezeka ndipo ndawerama kwambiri chifukwa cha chisoni changa. Ndayenda uku ndi uku tsiku lonse ndili wachisoni.”—Salimo 38:6.

Anzanu ena okufunirani zabwino angayese kukuthandizani mwa kukulimbikitsani kuti muyambirenso chibwenzicho. Koma samalani. Inuyo ndi amene mungadzavutike mukayambiranso chibwenzicho, osati anzanuwo. Choncho musalole kusintha maganizo, ngakhale kuti mungamve chisoni ndithu.

Dziwani kuti m’kupita kwa nthawi chisonicho chidzatha. Koma panopa, yesani kuchita zinthu ngati zotsatirazi, zomwe zingakuthandizeni kupirira.

  • Uzani mnzanu wapamtima mmene mukumvera.—Miyambo 15:22.

  • Pempherani kwa Yehova kuti akuthandizeni pa vutolo.—Salimo 55:22.

  • Muzitanganidwa ndi zinthu zina.—1 Akorinto 15:58.

  • Musamadzipatule.—Miyambo 18:1.

  • Yambani kucheza ndi anthu ena amene angakulimbikitseni. Yesetsani kumaganizira zinthu zolimbikitsa zokhazokha.—Afilipi 4:8.