Pitani ku nkhani yake

Sukulu ya Utumiki Waupainiya ikuchitikira m’Nyumba ya Ufumu ku Sambir (pamwamba) ndipo ina ikuchitikira m’chipinda cha pansi pa nthaka ku Zhytomyr (m’munsi)

1 FEBRUARY 2023
UKRAINE

LIPOTI #16 | Abale Akupitiriza Kukondana pa Nthawi Yankhondo ku Ukraine

Kuyambiranso Kuchita Sukulu ya Utumiki Waupainiya

LIPOTI #16 | Abale Akupitiriza Kukondana pa Nthawi Yankhondo ku Ukraine

Kungoyambira pa 26 December 2022, apainiya apadera ndi okhazikika anayamba kuchita Sukulu ya Utumiki Waupainiya m’madera omwe anali otetezeka kuchita zimenezi. Potengera dera lomwe akukhala, apainiyawa ankachita sukuluyi pamasom’pamaso kapena kudzera pa Zoom. Ngakhale kuti abale ndi alongo athu ankakumana ndi mavuto monga phokoso la masayilini ochenjeza anthu, kuzima kwa magetsi, kusowa kwa ndalama komanso mavuto a Intaneti, iwo ankaona kuti ndi zofunika kwambiri kulandira maphunziro apaderawa. Kuchita zimenezi kwawathandiza kuti apitirize kukonda kwambiri Yehova komanso chikhulupiriro chawo chalimba kwambiri.

Alongo asonkhana pamodzi kuti alumikizidwe kusukulu ya utumiki waupainiya kudzera pa Zoom pa nthawi imene magetsi anazima. Iwo alumikiza zipangizo zawo pogwiritsa ntchito batire

Natalia yemwe amakhala ku Kryvyi Rih, ananena kuti: “Kwa ine sukuluyi inali ngati chinthu chopangitsa munthu kuti asamire ndi madzi. Yandithandiza kuti ndisamire ndi nkhawa komanso mantha.” Nayenso Anastasia wa ku Chernivtsi, ananena kuti: “Sukuluyi yandithandiza kutsimikizira kuti Yehova amandikonda kwambiri. Chaka chapitachi, panachitika zinthu zambiri zoopsa, koma sukuluyi inali ya pa nthawi yake. Ndiyesetsa kuchita zonse zomwe ndingathe kuti Yehova apitirize kundidalitsa.”

Mlongo Svitlana, yemwe ndi mpainiya ku Kitsman, atalandira kalata yomuuza kuti akachite nawo sukuluyi, anachita mantha kwambiri. Iye ananena kuti: “Ndinamuuza Yehova nkhawa zanga kuphatikizaponso vuto la kusowa ndalama. Zimenezi zinandipangitsa kuti ndimudalire ndipo sindinanong’oneze bondo. Ndinaona Yehova akundisamalira komanso kundikonda.” Chifukwa cha khama la Mlongo Svitlana, mwamuna wake yemwe si wa Mboni anayamba kupita naye limodzi kumisonkhano yampingo.

Foni yake itaduka Intaneti, Victoria wapita pafupi ndi siteshoni ya sitima kukalumikizanso Intaneti kuti apitirize kuchita sukulu ya utumiki waupainiya

Kwa maulendo awiri, apainiya ku Zhytomyr anasamukira kuchipinda cha pansi pa nthaka chifukwa cha phokoso la kulira kwa masayilini ochenjeza anthu. Iwo ankatenthetsa chipindacho pogwiritsa ntchito moto wa nkhuni wa pambaula ndipo anakwanitsa kuchita nawo sukuluyi. Ngakhale kuti ankakumana ndi mavuto amenewa, Valentyna yemwe anasamukira ku Zhytomyr, ananena kuti: “Sindidzaiwala sukulu imeneyi. Chifukwa ndinkamva ngati ndili pansi pa mapiko a Yehova.”

Mofanana ndi mayiko ena onse, apainiya ku Ukraine anasangalala kwambiri atamva zoti maola a utumiki ofunika kupereka pa mwezi atsitsidwa. Atangomva za chilengezochi, Yulia ananena kuti: “Ndikusangalala kwambiri mumtimamu ndipo chikondi changa pa Yehova chakula. M’mawawu ndinapemphera kwa Yehova ndipo ndinamupempha kuti andithandize kuti ndisasiye kuchita upainiya. Sindinkadziwa kuti andiyankha motani, koma ndinkadziwa kuti andiyankha ndithu. Nditangomva zoti maola a utumiki ofunika kupereka pa mwezi atsitsidwa, ndinayamba kuona kuti ndikufunika kuchita zambiri posonyeza kuyamikira pa zimene amandichitira. Nkhani yosangalatsayi inali ngati keke wokoma kwambiri pambuyo pomaliza sukuluyi.”

Pofika pa 24 January 2023, tinalandira malipoti otsatirawa kuchokera ku Ukraine. Ziwerengerozi zinatsimikiziridwa ndi abale am’dzikolo. Komabe, n’kutheka kuti ziwerengerozi ndi zokwera kwambiri kuposa pamenepa chifukwa sitikutha kulankhulana ndi abale am’zigawo zonse za dzikolo.

Mmene Zakhudzira Abale ndi Alongo Athu

  • Ofalitsa 47 anafa

  • Ofalitsa 97 anavulala

  • Ofalitsa 8,953 anathawa m’nyumba zawo

  • Nyumba 590 zinawonongekeratu

  • Nyumba 645 zinawonongeka kwambiri

  • Nyumba 1,722 zinawonongeka pang’ono

  • Nyumba za Ufumu 8 zinawonongekeratu

  • Nyumba za Ufumu 17 zinawonongeka kwambiri

  • Nyumba za Ufumu 76 zinawonongeka pang’ono

Ntchito Yopereka Chithandizo

  • Pali Makomiti Othandiza pa Ngozi za Mwadzidzidzi okwana 26 omwe akugwira ntchito ku Ukraine

  • Nyumba 46 zinakonzedwa

  • Nyumba za Ufumu 5 zinakonzedwa

  • Anthu 54,445 anathandizidwa ndi makomitiwa kuti athawire kumalo otetezeka

  • Ofalitsa 27,655 anathawira kumayiko ena komwe akuthandizidwa ndi Akhristu anzawo