Zokhudza screen reader

Sankhani chinenero

Pitani ku menyu yachiwiri

Pitani ku mitu ya nkhani

Pitani ku nkhani yake

Mboni za Yehova

Chichewa

Uthenga Wabwino Wochokera kwa Mulungu

 PHUNZIRO 13

Kodi Pali Uthenga Wabwino Wotani Wokhudza Zipembedzo?

Kodi Pali Uthenga Wabwino Wotani Wokhudza Zipembedzo?

1. Kodi zipembedzo zonse n’zabwino?

M’zipembedzo zonse mumapezeka anthu ena oona mtima. Uthenga wabwino ndi wakuti Mulungu amaona anthu oterowo ndipo amawakonda. Komabe, chomvetsa chisoni n’chakuti anthu akugwiritsa ntchito chipembedzo pochita zinthu zoipa. (2 Akorinto 4:3, 4; 11:13-15) Mogwirizana ndi zimene malipoti ena amanena, zipembedzo zina zafika poyamba kuchita nawo zauchigawenga, kupha anthu ambirimbiri nthawi imodzi, kulowerera nkhondo komanso kuchitira ana nkhanza. Zimenezi zimakhumudwitsa kwambiri anthu amene amakhulupirira Mulungu moona mtima. Werengani Mateyu 24:3-5, 11, 12.

Pamene chipembedzo choona chikulemekeza Mulungu, chipembedzo chonyenga chikuchita zinthu zosamusangalatsa. Chipembedzo chonyenga chimaphunzitsa mfundo zosachokera m’Baibulo, monga ziphunzitso zabodza zokhudza Mulungu ndiponso zimene zimachitika munthu akafa. Koma Yehova akufuna kuti anthu adziwe zoona zokhudza iyeyo. Werengani Ezekieli 18:4; 1 Timoteyo 2:3-5.

2. Kodi pali uthenga wabwino wotani wokhudza zipembedzo?

Mulungu sasangalala ndi zipembedzo zomwe zimanena kuti zimamukonda pamene kwenikweni zimakonda dziko la Satanali. (Yakobo 4:4) Mawu a Mulungu amanena kuti zipembedzo zonse zonyenga zimatchedwa “Babulo Wamkulu.” Dzina limeneli linachokera pa dzina la mzinda wakale wa Babulo, kumene chipembedzo chonyenga chinayambira pambuyo pa Chigumula cha m’nthawi ya Nowa. Posachedwapa, Mulungu awononga zipembedzo zonyenga zomwenso zimachitira anthu nkhanza. Werengani Chivumbulutso 17:1, 2, 5, 16, 17; 18:8.

Palinso uthenga wina wabwino. Yehova sanaiwale anthu oona mtima amene ali m’zipembedzo zonyenga padziko lonse, omwe akufunitsitsa kumulambira. Iye akugwirizanitsa anthu  amenewa powaphunzitsa choonadi. Werengani Mika 4:2, 5.

3. Kodi anthu amene akufunadi kulambira Mulungu woona ayenera kuchita chiyani?

Chipembedzo choona chikugwirizanitsa anthu

Yehova amakonda anthu amene amakonda choonadi komanso amene amakonda zinthu zabwino. Iye akuwalimbikitsa kuti achoke m’chipembedzo chonyenga. Anthu amene amakonda Mulungu akusinthadi mofunitsitsa kuti akondweretse Mulunguyo. Werengani Chivumbulutso 18:4.

Mu nthawi ya atumwi, anthu a mitima yabwino anasangalala kwambiri atamva uthenga wabwino womwe atumwiwo ankalalikira. Iwo anaphunzira zinthu zatsopano kuchokera kwa Yehova, n’kuyamba kukhala ndi moyo wosangalala komanso ali ndi chiyembekezo chabwino. Anthu amenewa ndi chitsanzo chabwino kwa ife masiku ano chifukwa anamvera uthenga wabwino ndipo anachita zimenezi posonyeza kuti kumvera Yehova ndi chinthu chofunika kwambiri pa moyo wawo. Werengani 1 Atesalonika 1:8, 9; 2:13.

Yehova akulandira anthu onse amene achoka kuchipembedzo chonyenga kuti akhale limodzi ndi anthu amene amamulambira. Mukamvera Yehova n’kubwera m’gulu lake, mudzakhala naye pa ubwenzi, mudzapeza anthu okukondani omwe muzidzalambira nawo Yehova komanso mudzapeza moyo wosatha. Werengani Maliko 10:29, 30; 2 Akorinto 6:17, 18.

4. Kodi Mulungu adzachita chiyani kuti padziko lonse anthu akhale osangalala?

Zoti chipembedzo chonyenga chiwonongedwa posachedwapa ndi uthenga wabwino. Zimenezi zidzachititsa kuti anthu asamaponderezedwenso padziko lonse. Ndipo chipembedzo chonyenga sichidzasochoretsa anthu komanso kuwagawanitsa. Anthu onse adzagwirizana polambira Mulungu woona mmodzi. Werengani Chivumbulutso 18:20, 21; 21:3, 4.

 

Onaninso

Kulambira Kumene Mulungu Amavomereza

Werengani nkhaniyi kuti mudziwe zinthu 6 zimene zingakuthandizeni kudziwa anthu amene ali m’chipembedzo choona.

Yesetsani Kuti Muzilambira Mulungu M’njira Yovomerezeka

Kodi pangakhale mavuto otani mukamauza ena zimene mumakhulupirira? Kodi mungawafotokozere bwanji m’njira yoti asakhumudwe?