Zokhudza screen reader

Sankhani chinenero

Pitani ku menyu yachiwiri

Pitani ku mitu ya nkhani

Pitani ku nkhani yake

Mboni za Yehova

Chichewa

Banja Lanu Likhoza Kukhala Losangalala

 MUTU 7

Zimene Mungachite Pophunzitsa Mwana Wanu

Zimene Mungachite Pophunzitsa Mwana Wanu

“Mawu awa amene ndikukulamula lero azikhala pamtima pako, ndi kuwakhomereza mwa ana ako.”—Deuteronomo 6:6, 7

Yehova amafuna kuti makolo azitsogolera ana awo. (Akolose 3:20) Choncho makolo ali ndi udindo wophunzitsa ana awo kuti azikonda Yehova komanso kuti adzakhale anthu odalirika. (2 Timoteyo 1:5; 3:15) Makolo ayeneranso kudziwa zimene zili mumtima mwa ana awo. Musaiwale kuti ana amatsatira zimene mumachita. Choncho Mawu a Yehova ayenera kukhala mumtima mwanu choyamba kuti muphunzitse bwino ana anu.—Salimo 40:8.

 1 ATHANDIZENI KUTI AZIMASUKA NANU

ZIMENE BAIBULO LIMANENA: “Aliyense akhale wofulumira kumva, wodekha polankhula.” (Yakobo 1:19) Muzithandiza ana anu kuti azimasuka kulankhula nanu. Ana ayenera kudziwa kuti mukhoza kuwamvetsera nthawi iliyonse imene akufuna kukuuzani zinazake. Mukamakhala mwamtendere m’banja mwanu, ana amamasuka kufotokoza maganizo awo. (Yakobo 3:18) Koma sangamasuke akaona kuti mukhoza kukwiya kapena kuwadzudzula akakuuzani zinazake. Muyenera kuwalezera mtima ndipo muziwatsimikizira kuti mumawakonda.—Mateyu 3:17; 1 Akorinto 8:1.

ZIMENE MUNGACHITE:

  • Muzimvetsera ana anu akafuna kulankhula nanu

  • Muzilankhulana ndi ana anu nthawi zonse osati pakakhala vuto basi

2 MUZIYESETSA KUMVETSA MAGANIZO AWO

ZIMENE BAIBULO LIMANENA: “Munthu wosonyeza kuzindikira pa zinthu adzapeza zabwino.” (Miyambo 16:20) Nthawi zina mwana akalankhula musamaganizire zimene wanena koma zimene akutanthauza komanso mmene akumvera mumtima mwake. Achinyamata amakonda kukokomeza zinthu kapena kulankhula zina koma akutanthauza zina. Paja Baibulo limati: “Munthu aliyense woyankhira nkhani asanaimvetsetse n’ngopusa.” (Miyambo 18:13) Choncho musamafulumire kukwiya.—Miyambo 19:11.

ZIMENE MUNGACHITE:

  • aya mwana wanu alankhule zotani, yesetsani kuti musamudule mawu kapena kumupsera mtima

  • Muzikumbukira mmene munkamvera muli msinkhu wakewo komanso zimene munkaona kuti n’zofunika

 3 MUZICHITA ZINTHU MOGWIRIZANA

ZIMENE BAIBULO LIMANENA: “Mwana wanga, tamvera malangizo a bambo ako, ndipo usasiye malamulo a mayi ako.” (Miyambo 1:8) Yehova wapereka udindo wolera ana kwa bambo komanso mayi. Muyenera kuphunzitsa ana anu kuti azikulemekezani ndiponso kukumverani. (Aefeso 6:1-3) Ana amadziwa ngati makolo awo ‘sagwirizana.’ (1 Akorinto 1:10) Ngati simunagwirizane pa nkhani inayake, muziyesetsa kuti ana anu asaone zimenezi chifukwa angasiye kukulemekezani.

ZIMENE MUNGACHITE:

  • Muyenera kugwirizana zimene muzichita polangiza ana anu

  • Ngati mukusiyana maganizo pa nkhaniyi, yesetsani kumvetsa zimene mnzanuyo akufuna

 4 MUZIGWIRIZANA MMENE MUNGAWAPHUNZITSIRE

ZIMENE BAIBULO LIMANENA: “Phunzitsa mwana m’njira yomuyenerera.” (Miyambo 22:6) Sikuti kuphunzitsa bwino ana anu kumangochitika kokha. Koma muyenera kugwirizana zimene muzichita powaphunzitsa ndiponso kuwalangiza. (Salimo 127:4; Miyambo 29:17) Muyenera kuthandiza ana kumvetsa ubwino wa malamulo anu komanso zifukwa zimene mumawalangira. (Miyambo 28:7) Muziwaphunzitsanso kukonda Mawu a Yehova ndiponso kumvetsa mfundo zake. (Salimo 1:2) Zimenezi zingawathandize kukhala ndi chikumbumtima chabwino.—Aheberi 5:14.

ZIMENE MUNGACHITE:

  • Muziyesetsa kuthandiza ana anu kuti adziwe bwino Mulungu n’kumamudalira

  • Muziwathandiza kuzindikira ndiponso kupewa zinthu zoipa zimene zimapezeka pa Intaneti. Muziwaphunzitsanso mmene angapewere ogwirira ana

“Phunzitsa mwana m’njira yomuyenerera”

Onaninso

Zoti Ana Achite

Pezani nkhani zimene mungagwiritse ntchito pophunzitsa ana anu mfundo za m’Baibulo.

Kodi Mungatani Kuti Muzilangiza Bwino Ana Anu?

Baibulo limatchula zinthu zitatu zimene makolo ayenera kuchita polangiza ana.

Kodi Makolo Angatani Kuti Aphunzitse Ana Awo Nkhani Zokhudza Kugonana?

M’Baibulo muli mfundo zambiri zimene zingakuthandizeni mukafuna kuphunzitsa ana anu mmene angadzitetezere kwa anthu ogwiririra.